Ioane 17:1-26
17 Ne faipati atu ne Iesu a mea konei, kae ne kilo aka ki te lagi, fai atu ei “Te Tamana, ko oko mai te itula; ke faka‵malu aka tau tama ko te mea ke faka‵malu koe ne tau tama,
2 e pelā eiloa mo te tukuatuga ne koe ki a ia a te pule i luga i tino katoa, ko te mea ke mafai o tuku atu ne ia a te ola se-gata-mai ki a latou katoa* kolā ko oti ne tuku atu ne koe ki a ia.
3 Tenei te uiga o te ola se-gata-mai, ke iloa tonu* ne latou a koe, ko te Atua tonu e tokotasi, penā foki loa mo te tino telā ne uga mai ne koe, ko Iesu Keliso.
4 Ko oti ne faka‵malu ne au a koe i te lalolagi, me ne fakaoti ne au a te galuega telā ne tuku mai ne koe ke fai ne au.
5 Tela la, e te Tamana, ke faka‵malu ne koe au i ou tafa e pelā eiloa mo te ‵malu tela ne maua ne au i ou tafa a koi tuai o faite te lalolagi.
6 “Ko oti ne fakaasi atu ne au a tou igoa ki tāgata kolā ne tuku mai ne koe ki a au mai te lalolagi. Ko ou tino latou, kae ne tuku mai ne koe latou ki a au, kae ne faka‵logo latou ki au muna.
7 Ko iloa nei ne latou me i mea katoa kolā ne tuku mai ne koe ki a au i a koe.
8 Me i muna kolā ne tuku mai ne koe ki a au ko oti ne tuku atu ne au ki a latou, kae ko oti ne maua ne latou konā. Ko iloa foki ne latou mo te mautinoa i a au ne vau e pelā me ko tou sui, kae ko tali‵tonu latou i a au ne uga mai ne koe.
9 E fakatagi atu au e uiga mō latou. E se fakatagi atu au mō te lalolagi, kae mō latou kolā ko oti ne tuku mai ne koe ki a au; me i a latou ko ou tino.
10 Ko aku mea katoa i a koe a ko au mea i a aku, kae ko oti ne faka‵malugina au i tafa o latou.
11 “E se gata i ei, au e se nofo faeloa i te lalolagi, a ko latou e ‵nofo eiloa i te lalolagi, kae ka fanatu au ki a koe. Te Tamana Tapu, ke tausi ne koe latou ona ko tou igoa telā ko oti ne tuku mai ne koe ki a au, ko te mea ke tasi latou e pelā mo tāua e tasi.
12 I te taimi ne ‵nofo fakatasi ei matou ne tausi ne au latou ona ko tou igoa telā ko oti ne tuku mai ne koe ki a au. Ko oti ne puipui ne au latou, kae ka seai se tino i a latou ka fakaseai kae na ko te tama o te fakamaseiga, ko te mea ke fakataunu ei a Tusitusiga Tapu.
13 Kae nei la au ka fanatu ki a koe, kae e faipati ne au a mea konei i te lalolagi ko te mea ke maua i loto i a latou toku fiafia kae ke katoatoa foki.
14 Ko oti ne tuku atu ne au tau muna ki a latou, kae ne takalia‵lia te lalolagi ki a latou, me i a latou e se ne vaega o te lalolagi, e pelā eiloa mo au e sē se vaega o te lalolagi.
15 “Au e se fakatagi atu ki a koe, ke ave latou keatea mai te lalolagi, kae ke tausi ne koe latou ona ko te tino masei.
16 A latou e se ne vaega o te lalolagi, e pelā eiloa mo au e sē se vaega o te lalolagi.
17 Ke fakatapu latou e auala i te munatonu; a tau muna ko te munatonu.
18 E pelā eiloa mo au ne uga mai ne koe ki te lalolagi, e uga atu foki ne au latou ki te lalolagi.
19 Kae ko fakatapu ne au a au eiloa mō latou, ko te mea ke mafai foki o fakatapugina latou e auala i te munatonu.
20 “E se fakatagi atu au mō latou fua konei, kae e pelā foki mo latou kolā e fakatuanaki mai ki a au e auala i olotou pati;
21 ko te mea ke tasi latou katoa, e pelā eiloa mo koe, te Tamana e ‵kau fakatasi mo au, a ko au e ‵kau fakatasi mo koe, kae ke ‵kau fakatasi foki latou mo tāua, ko te mea ke tali‵tonu te lalolagi i a au ne uga mai ne koe.
22 Ko oti foki ne tuku atu ne au ki a latou a te ‵malu telā ko oti ne tuku mai ne koe ki a au, ko te mea ke tasi latou e pelā eiloa mo tāua e tasi.
23 Au e ‵kau fakatasi mo latou a ko koe e ‵kau fakatasi mo au, ko te mea ke mafai o katoatoa latou e pelā me se foitino e tasi, ke iloa ne te lalolagi i a au ne uga mai ne koe a ko koe e alofa ki a latou e pelā eiloa mo tou alofa mai ki a au.
24 Te Tamana, e pelā mo mea ko oti ne tuku mai ne koe ki a au, e manako au, ke ‵nofo foki latou i te koga e nofo au i ei, ko te mea ke lavea ne latou toku ‵malu telā ne tuku mai ne koe ki a au, me i a koe ne alofa mai ki a au a koi tuai o faite te lalolagi.
25 Te Tamana amiotonu, se mea tonu me e seki iloa ne te lalolagi a koe; kae ko oti ne iloa ne au a koe, ko iloa foki ne latou konei me i a au ne uga mai ne koe.
26 Ko oti ne fakailoa atu ne au tou igoa ki a latou kae ka toe fakailoa atu ne au, ko te mea ke maua ne latou te alofa telā ne alofa mai ei koe ki a au a ko au ke ‵kau fakatasi foki mo latou.”
