Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Ioane 16:1-33

16  “Ne faipati atu ne au a mea konei ki a koutou ke mo a e pa‵ku koutou.  Ka faka‵tea koutou ne tino mai te sunako. E tonu, ka oko mai te itula ka mafau‵fau aka ei a tino katoa kolā e tamate ne latou koutou me ko oti ne fai ne latou se taviniga tapu ki te Atua.  Kae ka fai eiloa ne latou a mea konei me e se iloa ne latou te Tamana kae e se iloa foki ne latou au.  Kae ko faipati atu nei ne au a mea konei ki a koutou ko te mea ke masaua ne koutou me ko oti ne faipati atu ne au ki a koutou, māfai ko oko mai a mea konā. “Ne seki faipati atu muamua ne au a mea konā ki a koutou me i a au ne ‵nofo mo koutou.  Kae nei la au ka fano ki te tino telā ne uga mai ne ia au, kae e seai se tino i a koutou ne fesili mai ki a au, ‘E fano koe ki fea?’  Kae ona ko te mea ne faipati atu ne au a mea konei ki a koutou ko fanoa‵noa ei otou loto.  E ui i ei, e fai atu ne au ki a koutou te mea tonu, Au e fano keatea mō te ‵lei o koutou. Me kafai e se fano au keatea, ka se mafai eiloa o fanaifo ki a koutou a te fesoasoani. Kae kafai e fano au, ko uga mai ei ne au ki a koutou.  Kae kafai e oko mai a te fesoasoani tenā ka tuku atu i ei se fakamaoniga mautinoa ki te lalolagi e uiga ki te agasala, te amiotonu, mo te faiga o fakamasinoga:  ka tuku atu se fakamaoniga e uiga ki te agasala, me e se fakatuanaki latou ki a au; 10  ka tuku atu se fakamaoniga e uiga ki te amiotonu, me i a au ka fano ki te Tamana kae ka se toe lavea ne koutou au; 11  ka tuku atu se fakamaoniga e uiga ki te faiga o fakamasinoga, me ko oti ne fakamasino aka a te pule o te lalolagi tenei. 12  “E uke a mea koi fia fai atu ne au ki a koutou, kae e se mafai o malamalama koutou i ei i te taimi nei. 13  Kae kafai e oko mai a te fesoasoani tenā, ko te agaga o te munatonu, ka takitaki ne ia koutou ki mea ‵tonu katoa, me ka se faipati eiloa a ia ki ana pati, a ko mea kolā e lagona ne ia ka faipati ne ia, kae ka folafola atu ne ia ki a koutou a mea kolā ka oko mai. 14  Ka faka‵malu ne ia au, me ka maua ne ia a mea mai i a au kae ka folafola atu ne ia a mea konā ki a koutou. 15  A mea katoa a te Tamana i a aku. Tenā te pogai ne fai atu ei au me ne maua ne ia a mea mai i a au kae ka folafola atu ne ia a mea konā ki a koutou. 16  E se leva nei ko se toe lavea ei au ne koutou, kae e se leva foki ka toe lavea ne koutou au.” 17  Ne fai aka ei ana nisi soko i a latou eiloa; “Se a te uiga o ana pati konei ne fai mai ki a tatou, ‘E se leva nei ko se toe lavea ei au ne koutou, kae e se leva foki ka toe lavea ne koutou au,’ mo ana pati foki, ‘me i a au ka fano ki te Tamana’?” 18  Telā ne fai aka ei olotou pati: “Se a te uiga o ana pati, ‘e se leva nei’? E se iloa ne tatou a te mea e faipati a ia ki ei.” 19  Ne iloa ne Iesu me ne fia fesili atu latou ki a ia, fai atu ei a ia ki a latou: “Kaia e fakatau fesilisili ei koutou e uiga ki te mea tenei me i a au ne fai atu, E se leva nei ko se toe lavea ei au ne koutou kae e se leva foki ka toe lavea ne koutou au? 20  Au e fai ‵tonu atu ki a koutou, a koutou ka ‵tagi kae ‵tagi mautuutu, kae ko te lalolagi ka fia‵fia; ka fanoa‵noa koutou kae ka ‵fuli te otou fanoa‵noa ki te fiafia. 21  E fanoanoa se fafine māfai ko fanau me ko oko mai tena itula. Kae kafai ko oti ne fanau mai ne ia te tamaliki, ko puli ei i a ia te logo‵mae ona ko te fiafia me ko oti ne fanau mai se tino ki te lalolagi. 22  Tela la, ka fanoa‵noa foki nei koutou; kae kafai e toe lavea ne au koutou ko ‵fonu otou loto i te fiafia, kae e seai se tino ka ave ne ia keatea te fiafia tenā mai i a koutou. 23  I te aso tenā ka seai eiloa se fesili e ‵sili mai ne koutou ki a au. Au e fai ‵tonu atu ki a koutou, kafai e fakatagi atu koutou ki te Tamana mō so se mea, ka tuku atu eiloa ne ia ki a koutou a te mea tenā i toku igoa. 24  E seki fakatagi atu eiloa koutou ki se mea i toku igoa ke oko mai ki te taimi nei. Fakatagi atu kae ka maua ne koutou, ko te mea ke katoatoa te otou fia‵fia. 25  “Ko oti ne faipati atu ne au a mea konei i tala fakatusa. Ka oko mai te taimi ka se toe faipati atu ei au i tala fakatusa, kae ka faipati ‵tonu atu ne au ki a koutou a mea e uiga ki te Tamana. 26  I te aso tenā ka fakatagi atu koutou ki te Tamana i toku igoa, kae e se fai atu au ki a koutou me ka fakatagi atu au ki te Tamana e uiga mō koutou. 27  Me e alofa eiloa te Tamana ki a koutou, ona ko koutou ne a‵lofa mai ki a au, kae e tali‵tonu foki i a au ne vau e pelā me ko te sui o te Tamana. 28  Au ne vau mai te Tamana kae ne vau ki te lalolagi. Nei la, ka tiaki ne au te lalolagi i toku auala o fanatu ki te Tamana.” 29  Ne fai atu ana soko: “Kiloke! Nei la, ko faipati ‵tonu mai eiloa koe, kae ko se faipati mai koe i tala fakatusa. 30  Nei la, ko iloa ne matou me e iloa ne koe a mea katoa, kae e se manakogina ke fakafesili koe ne se tino. Ona ko te mea tenei ko tali‵tonu ei matou i a koe ne vau mai te Atua.” 31  Ne tali atu a Iesu ki a latou: “E a, ko tali‵tonu nei koutou? 32  Kiloke! Ka oko mai te itula, e tonu, ko oti eiloa ne oko mai, kae ka mafuta valevale ei koutou taki tokotasi ki otou fale kae ka tiaki ne koutou au; a ko au e se nofo tokotasi me e ‵nofo fakatasi māua mo toku Tamana. 33  Ne faipati atu ne au a mea konei ki a koutou ko te mea ke maua ne koutou a te filemu e auala i a au. E maua ne koutou a fakalavelave i te lalolagi nei, kae ke loto ‵toa koutou! Ko oti ne fakatakavale ne au te lalolagi nei.”

Fakamatalaga mai lalo