Ioane 14:1-31

14  “Ke mo a ma ‵pole otou loto. Fakatuanaki ki te Atua, kae fakatuanaki mai foki ki a au.  E uke a koga e ‵nofo ei koutou i te fale o toku Tamana. Moi seai, penei ko fai atu au ki a koutou, me i a au ka fano o fakatoka se koga mō koutou.  Kafai foki e fano au o fakatoka se koga mō koutou, ka toe foki mai au o puke* koutou, ko te mea ke ‵nofo foki koutou i te koga telā e nofo au i ei.  Kae ko te koga e fano au ki ei e iloa ne koutou te auala ki ei.”  Ne fai atu a Toma ki a ia: “Te Aliki, e se iloa ne matou te koga e fano koe ki ei. E mafai la pefea o iloa ne matou a te auala?”  Ne fai atu a Iesu ki a ia: “Au ko te auala mo te munatonu mo te ola. E seai se tino e fano ki te Tamana manafai e se ui mai i a au.  Kafai ne iloa ne koutou au, e iloa foki ne koutou toku Tamana; mai te taimi tenei o fano ki mua ko iloa ne koutou a ia kae ko lavea foki ne koutou a ia.”  Ne fai atu a Filipo ki a ia: “Te Aliki, fakaasi mai ki a matou te Tamana, tenā fua te mea e fia iloa ne matou.”  Ne fai atu a Iesu ki a ia: “Ko leva ‵ki te taimi ne ‵nofo fakatasi ei au mo koutou, e Filipo, kae e seki iloa eiloa ne koe au? A te tino telā ko kilo mai ki a au ko kilo foki ki te Tamana. Kaia la e fai mai ei koe, ‘Fakaasi mai ki a matou te Tamana’? 10  E a, e se talitonu koe i a au e ‵kau fakatasi mo te Tamana a ko te Tamana e ‵kau fakatasi mai foki ki a au? A pati kolā e fai atu ne au ki a koutou e se i a aku eiloa; a ko te Tamana telā e ‵kau fakatasi mo au e fai eiloa ne ia ana galuega. 11  Talitonu mai ki a au me i a au e ‵kau fakatasi mo te Tamana kae e kau mai foki te Tamana ki a au; io me talitonu mai ona ko aku galuega. 12  Au e fai ‵tonu atu ki a koutou, a te tino telā e fakatuanaki mai ki a au, e fai foki ne ia a galuega konei e fai ne au; kae e sili atu i te tāua o galuega ka fai ne ia i lō mea konei, me i a au ka fano ki te Tamana. 13  E se gata i ei, so se mea e fakamolemole atu ei koutou i toku igoa, ka fai eiloa ne au, ko te mea ke faka‵malugina te Tamana ona ko te Tama. 14  Kafai e fakamolemole atu koutou ki so se mea i toku igoa, ka fai eiloa ne au te mea tenā. 15  “Kafai e a‵lofa mai koutou ki a au, ka faka‵logo koutou ki aku fakatonuga; 16  kae ka fakamolemole au ki te Tamana kae ka tuku atu ne ia ki a koutou se isi fesoasoani ke ‵nofo mo koutou ki te se-gata-mai, 17  ko te agaga* o te munatonu, telā e se mafai o maua ne te lalolagi, me e se lavea kae e se iloa foki ne latou te mea tenā. Kae e iloa ne koutou te agaga tenā me e ‵nofo mo koutou kae tenā eiloa i loto i a koutou. 18  Ka se tiaki ne au koutou ke fanoa‵noa. Au e vau ki a koutou. 19  Ko se leva nei ko se toe lavea ei au ne te lalolagi, kae ka lavea ne koutou au, me i a au e ola kae ka ola foki koutou. 20  I te aso tenā, ka iloa ei ne koutou me i a au e ‵kau fakatasi mo toku Tamana, a ko koutou e ‵kau fakatasi mai ki a au a ko au e ‵kau fakatasi mo koutou. 21  A te tino telā e nofo mo aku fakatonuga kae fakalogo ki ei, ko ia tenā e alofa mai ki a au. A te tino telā e alofa mai ki a au e alofa foki toku Tamana ki a ia. Ka alofa au ki ei kae ka fakaasi manino atu au ki a ia. 22  Ne fai atu a Iuta, telā e se ko Iuta te Isikaliota, ki a ia: “Te Aliki, se a te mea ne tupu ko manako ei koe o fakaasi manino mai a koe ki a matou kae e se ki te lalolagi?” 23  Ne tali atu a Iesu ki a ia: “Kafai e alofa mai se tino ki a au, ka fakalogo a ia ki aku muna, kae ka alofa toku Tamana ki a ia, kae ka olo atu māua ki a ia o ‵nofo fakatasi mo ia. 24  A te tino telā e se alofa mai ki a au e se fakalogo ki aku muna; kae ko pati kolā e lagona ne koutou e se i a aku, kae i a te Tamana telā ne uga mai ne ia au. 25  “Ko oti ne fai atu ne au a mea konei ki a koutou a koi ‵nofo fakatasi tatou. 26  Kae ko te fesoasoani, ko te agaga tapu, telā ka uga mai ne toku Tamana i toku igoa, ko ia tenā ka akoako atu ne ia ki a koutou a mea katoa kae ka fakamasaua atu ne ia ki a koutou a mea katoa kolā ne fai atu ne au ki a koutou. 27  Ka tiaki ne au koutou mo te filemu, kae ka tuku atu ne au ki a koutou a toku filemu. E se tuku atu ne au i te auala telā e tuku atu ne te lalolagi. Ke mo a ma ‵pole otou loto io me e ma‵taku koutou. 28  Ne lagona ne koutou i a au ne fai atu ki a koutou, au ka fano kae toe foki mai au ki a koutou. Kafai e a‵lofa mai koutou ki a au, ka fia‵fia eiloa koutou i a au e fano ki te Tamana, me e sili atu te Tamana i a au. 29  Tela la, ko oti ne fai atu ne au a mea konei ki a koutou a koi tuai o ‵tupu a mea konā ko te mea ke tali‵tonu koutou māfai ko ‵tupu. 30  Ka se uke aku pati e fai atu ki a koutou, me ko vau a te pule o te lalolagi nei. Kae e seai sena pule i luga i a au. 31  Ko te mea ke iloa ne te lalolagi i a au e alofa ki te Tamana, e fai eiloa ne au a te fakatonuga ne tuku mai ne te Tamana ke fai ne au. ‵Tu ki luga, tatou ka olo kea‵tea mai konei.

Fakamatalaga mai lalo

Ioa 14:3  Io me “ave ne au koutou ki toku fale.”
Ioa 14:17  Io me ko te “malosi galue.”