Ioane 13:1-38

13  Ona ko te mea ko oti ne iloa ne Iesu mai mua o te Paseka me ko oko mai te itula ka tiaki ei ne ia te lalolagi tenei kae fanatu ki te Tamana, ne alofa malosi a Iesu ki ana soko kolā e ‵nofo i te lalolagi, kae ne alofa eiloa a ia ki a latou ke oko ki te fakaotiga.  Tela la, a koi ‵kai latou a ko te Tiapolo, ko leva ne tuku ne ia ki te loto o Iuta te Isikaliota, te tama a Simona, a te manakoga ke fakatogafiti ne ia a Iesu.  Ona ko te mea e iloa ne ia me ko oti ne tuku atu ne te Tamana ki ana lima a mea katoa, a ko ia ne vau mai te Atua kae ka fano foki ki te Atua,  ne tu aka a ia mai te ‵kaiga kae tapale tena gatu. Ne puke ne ia se solo kae ‵sai ki tena taugasulu.  Mai tua ifo i ei, ne ‵ligi ne ia a vai ki loto i se pesini kae kamata o mulumulu ne ia a vae o ana soko kae fakamalō ki te solo telā e ‵sai ki tena taugasulu.  Ne fanatu a ia ki a Simona Petelu, kae ne fai atu a Simona ki a ia: “Te Aliki, e a, e mulumulu ne koe oku vae?”  Ne tali atu a Iesu kae fai atu ki a ia: “A te mea telā e fai ne au e se malamalama nei koe i ei, kae ka malamalama fakamuli koe i ei.”  Ne fai atu a Petelu ki a ia: “Ka se mulumulu eiloa ne koe oku vae.” Ne tali atu a Iesu ki a ia: “Kafai e se mulumulu ne au a koe, e seai sou vaega e maua mai i a au.”  Ne fai atu a Simona Petelu ki a ia: “Te Aliki, e se ko oku vae fua kae ko oku lima foki mo toku ulu.” 10  Ne fai atu a Iesu ki a ia: “A te tino telā ko oti ne koukou e manakogina fua ke mulumulu ana vae, me e ‵ma katoatoa a ia. A koutou e ‵ma, kae e se ko koutou katoa.” 11  Me ne iloa ‵lei ne ia te tagata telā ka fakatogafiti ne ia a ia. Tenā te pogai ne fai atu ei a ia: “E se ko koutou katoa e ‵ma.” 12  I te otiga ne mulumulu ne ia olotou vae, ne toe pei tena gatu kae toe sagasaga ifo ki te taipola, fai atu ei ki a latou: “E malamalama koutou i te mea telā ne fai ne au ki a koutou? 13  E taku ne koutou au ki te ‘Faiakoga,’ mo te ‘Aliki’ kae e tonu eiloa koutou, ko au eiloa tenā. 14  Tela la, kafai au ko te Aliki mo te Faiakoga kae ne mulumulu ne au otou vae, e ‵tau foki mo koutou o fakatau mulumulu otou vae. 15  Me ne tuku atu ne au se fakaakoakoga mō koutou, tela la, e pelā mo te mea ko oti ne fai ne au ki a koutou, ke fai foki koutou penā. 16  Au e fai ‵tonu atu ki a koutou, E se sili atu te pologa i tena matai. E se sili foki a te tino telā e uga atu ne ia se tino i lō te tino telā ne uga atu ne ia. 17  Kafai e iloa ne koutou a mea konei, ka fia‵fia eiloa koutou māfai e fai ne koutou. 18  Au e se faipati e uiga ki a koutou katoa; me e iloa ne au a tino kolā ko oti ne filifili ne au. Kae e ‵tau o fakataunu a pati i Tusitusiga Tapu kolā e fai mai penei, ‘A te tino telā ne kai sale i aku meakai ko oti ne ‵teke* mai ki a au.’ 19  Mai te taimi tenei o fano ki mua ka fakaasi atu ne au ki a koutou a mea kolā ka ‵tupu a koi tuai o ‵tupu a mea konei, ko te mea kafai ko ‵tupu, ko tali‵tonu ei koutou me ko au tenā. 20  Au e fai ‵tonu atu ki a koutou, A te tino telā e talia ne ia so se tino e uga atu ne au e talia foki ne ia au. A te tino telā e talia ne ia au, e talia foki ne ia a te tino telā ne uga mai ne ia au.” 21  I te otiga o ana pati konei, ne mafatia te loto* o Iesu, kae molimau mai, ana muna: “Au e fai ‵tonu atu ki a koutou, au ka fakatogafiti ne se tokotasi o koutou.” 22  Ne fakatau kilo‵kilo a soko i a latou eiloa, me e se iloa ne latou a te tino e fakauiga a ia ki ei. 23  Ne nofo pili atu se soko e tokotasi o Iesu i ana tafa, kae ne alofa a Iesu ki a ia. 24  Ne kalo atu ei te ulu o Simona Petelu ki te soko tenā kae fai atu: “Fai mai me ko oi te tino e fakauiga a ia ki ei.” 25  Ne fakapale atu a ia tenā ki te fatafata o Iesu kae fai atu ki a ia: “Te Aliki, ko oi a te tino tenā?” 26  Ne tali atu a Iesu: “Ko ia telā ka tuku ne au ki ei ne mu falaoa ko oti ne ufi ki vai.” Tela la, i te otiga ne ufi a mu falaoa, ne tuku ei ne ia ki a Iuta, te tama a Simona te Isikaliota. 27  I te otiga ne puke atu ki mu falaoa, ulu atu ei a Satani ki loto i a Iuta. Ne fai atu a Iesu ki a ia: “A te mea telā e mafaufau koe o fai ke na fai fakavave nei.” 28  Kae e seai ne tino i a latou kolā e saga‵saga i te taipola ne iloa ne latou a te pogai ne fai ei ne ia a pati konā ki a Iuta. 29  Ona ko Iuta e nofo mo te pokisi tupe ne leake a nisi tino i a latou me ne fai atu a Iesu: “Ke ‵togi a mea kolā e manakogina ne tatou mō te ‵kaiga,” io me ke tuku atu ne ia ne mea ki tino ma‵tiva. 30  Tela la, i te otiga ne maua ne ia a mu falaoa, fano fakavave ei ki tua, kae ko po. 31  I tena fanoga ki tua, fai atu ei a Iesu: “Ko faka‵malugina nei te Tama a te tagata, ko faka‵malugina foki te Atua ona ko ia. 32  Kae ka faka‵malugina a ia ne te Atua, kae ka faka‵malu ne ia nei eiloa. 33  Aku tama, ko toetoe fua te taimi e ‵nofo fakatasi ei tatou. Ka ‵sala koutou ki a au; kae e pelā mo aku pati ki tino Iutaia, ko fai atu foki nei ne au ki a koutou ‘A te koga e fano au ki ei e se mafai ne koutou o olo ki ei.’ 34  Ko tuku atu ne au ki a koutou se fakatonuga fou, ke fakatau a‵lofa koutou; e pelā eiloa mo au ne alofa ki a koutou, ke fakatau a‵lofa foki koutou. 35  Ona ko te mea tenei ka iloa ei ne tino katoa i a koutou ko oku soko, manafai e fakatau a‵lofa koutou.” 36  Ne fai atu a Simona Petelu ki a ia: “Te Aliki, e fano koe ki fea?” Ne tali atu a Iesu: “A te koga e fano au ki ei e se mafai ne koe o tautali mai i a au i te taimi nei, kae ka tautali fakamuli mai koe i a au.” 37  Ne fai atu a Petelu ki a ia: “Te Aliki, kaia e se mafai ei ne au o tautali atu nei i a koe? Ka tuku atu ne au toku ola mō koe.” 38  Ne tali atu a Iesu ki a ia: “E a, ka tuku atu eiloa ne koe tou ola mō au? Au e fai ‵tonu atu ki a koe, A koi tuai o tagi te moa kae ko oti ne fakafiti fakatolu ne koe au.”

Fakamatalaga mai lalo

Ioa 13:18  I te ‵gana Eleni, “ko oti ne aka ne ia au ki tena mulivae.”
Ioa 13:21  I te ‵gana Eleni, “ne mafatia te agaga.”