Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Ioane 12:1-50

12  E ono aso mai mua o te Paseka kae oko atu a Iesu ki Petania, ko te koga e nofo i ei a Lasalo telā ne fakatu aka ne ia mai te mate.  Ne fai ei ne latou se ‵kaiga mō Iesu i te afiafi tenā, kae ne laulau ne Maleta a meakai, a ko Lasalo se tokotasi o tino kolā ne saga‵saga mo ia i te taipola.  Ne puke ne Malia se pauna sinu e tasi telā ne faite mai te nato kae e ‵togi ‵mafa ‵ki, ‵mili ne ia ki ei a vae o Iesu, kae ‵solo ne ia ki ana laulu. Ne pusaki atu te manogi o te sinu tenā ki te fale kātoa.  Kae ko Iuta te Isikaliota, telā ko pili o fakatogafiti ne ia a Iesu, ne fai atu penei:  “Kaia e se fakatau atu ei a te sinu manogi tenei ki se 300 tenali kae tufa atu ki tino ma‵tiva?”  Ne seki fai atu ne ia a pati konei ona ko tena manavase ki tino ma‵tiva, kae ona ko ia se tino kaisoa kae ne nofo mo te pokisi tupe, ne kaisoa sale ne ia a tupe kolā e lafo atu ki ei.  Ne fai atu a Iesu: “Tuku malie ei a ia, ko te mea ke fai ne ia te fakamanatuga tenei mō te aso e tanu ei au.  Me e ‵nofo fakatasi faeloa koutou mo tino ma‵tiva, ka ko au ka se ‵nofo faeloa mo koutou.”  Ne iloa ne se vaitino tokouke o tino Iutaia i a Iesu ko nofo i konā, telā ne olo atu ei latou ki ei, e se gata fua i te fia lavea ne latou a Iesu kae ke lavea foki ne latou a Lasalo telā ne fakatu aka ne ia mai te mate. 10  Ne fono fakatasi ei a faitaulaga pule ke tamate foki ne latou a Lasalo, 11  ona ko te mea ko fakatuanaki ki a Iesu a tino Iutaia e tokouke kolā ne olo atu ki konā. 12  I te suā aso ne ‵logo a te vaitino tokouke kolā ne olo atu ki te ‵kaiga, i a Iesu ko fanatu ki Ielusalema. 13  Ne puke ne latou a kaula o lakau ko te pama kae olo atu o fakafetaui ki a ia kae kamata o paka‵laga atu penei: “Matou e ‵talo ke fakaola a koe! Ke manuia a ia telā e vau i te igoa o Ieova, te tupu o Isalaelu!” 14  Ne maua ne Iesu se tamā asini kae ne sagasaga a ia i luga i ei, e pelā eiloa mo muna ne tusi i te tusi: 15  “Sa mataku, e te tama fafine a Siona, ‘Kiloke! Ko fanatu tou tupu ki a koe, e sagasaga i luga i se tamā asini.” 16  Ne seki malamalama ana soko i mea konei i te taimi muamua, kae i te taimi ne faka‵malugina ei a Iesu, ne masaua ei ne latou me ne tusi a mea konei e uiga ki a ia i te tusi kae ne fai eiloa ne latou a mea konei ki a ia. 17  Ne molimau atu faeloa a te vaitino kolā ne ‵nofo mo ia i te taimi ne kalaga atu ei a ia ki a Lasalo i te tanuga kae fakatu aka ne ia mai te mate. 18  Tenei te pogai ne olo atu ei te vaitino o fakafetaui ki a ia, ona ko te mea ne lagona ne latou me ne fai foki ne ia a te galuega ‵mana tenei. 19  Ne fai aka ei a te kau Falesaio i a latou eiloa: “Ko lavea ne koutou me ko seai eiloa se mea e mafai ne tatou o fai. Kiloke! Ko tau‵tali atu a te lalolagi kātoa i a ia.” 20  E isi ne tino Eleni i a latou kolā ne olo atu o tapuaki i te taimi o te fakamanatuga. 21  Ne olo atu a latou konei ki a Filipo mai Petesaita i Kalilaia, kae fakamolemole atu, olotou muna: “Tou ‵malu, e fia lavea ne matou a Iesu.” 22  Ne fakailoa atu ne Filipo te mea tenā ki a Anitelea. Ne olo atu ei a Anitelea mo Filipo o fakailoa ki a Iesu. 23  Ne tali atu a Iesu ki a lāua, ana muna: “Ko oko mai te itula ka faka‵malugina ei a te Tama a te tagata. 24  Au e fai ‵tonu atu ki a koutou, Kafai e se tō se fuaga ki te laukele kae pala* ka tasi fua te fuaga e maua; kae kafai e pala, ka ‵fua mai ei a fuaga e uke. 25  A te tino telā e fakapelepele ne ia tena ola e fakaseai ne ia, a ko te tino telā e takalialia ki tena ola i te lalolagi tenei ka puipui eiloa ne ia mō te ola se-gata-mai. 26  So se tino e fia tavini mai ki a au, ke na tautali mai i a au. Ko te koga e nofo ei au e nofo foki i konā taku tavini. So se tino e fia tavini mai ki a au ka fakaaloalogina a ia ne te Tamana. 27  Ko se toka toku loto i te taimi nei, kae ne a foki aku pati ka fai atu? Toku Tamana, fakaola aka au mai i te itula tenei. E ui i ei, tenei eiloa te pogai ne oko mai ei au ki te itula tenei. 28  Toku Tamana, faka‵malu tou igoa.” Ne oko mai ei se leo mai te lagi: “Ko oti ne faka‵malu ne au kae ka toe faka‵malu foki ne au.” 29  I te lagonaga ne te vaitino kolā ne takatu‵tu i konā a te mea tenā, ne fai mai latou me e isi se fa‵tili ne ‵pa. Kae ne fai mai a nisi tino: “Ne faipati atu se agelu ki a ia.” 30  Ne tali atu a Iesu: “E seki oko mai te leo tenei ona ko au, kae mō koutou. 31  Nei la, ka fakamasinogina te lalolagi tenei; kae ko te pule o te lalolagi tenei ka ‵tuli keatea. 32  Kafai ko sisi aka au ki luga mai te lalolagi, ka ‵futi mai ei ne au a tino e tokouke ki a au. 33  Ne fai mai ne ia a pati konei ke fakaasi atu ei te vaegā mate telā ko pili o mate ei a ia. 34  Ne fai atu a te vaitino ki a ia: “Ne lagona ne matou mai te Tulafono me i te Keliso e tumau ki te se-gata-mai; kae e pefea o fai mai koe me i te Tama a te tagata e ‵tau o sisi aka ki luga? Ko oi te Tama a te tagata tenei?” 35  Ne fai atu a Iesu ki a latou: “Ka nofo te mainaga i a koutou i se taimi toetoe fua. Sa‵sale a koi maua ne koutou te mainaga, ko te mea ke se taka‵vale koutou i te pouliga. A te tino telā e sasale i te pouliga e se iloa ne ia te koga e fano a ia ki ei. 36  Ke fakatuanaki koutou ki te mainaga i te taimi e nofo ei i a koutou a te mainaga, ko te mea ke fai koutou mo tama o te mainaga.” Ne faipati a Iesu ki mea konei fano ei a ia o ‵muni mai i a latou. 37  E tiga eiloa te uke o galuega ‵mana ne fai ne ia i mua o latou, ne seki fakatuanaki latou ki a ia, 38  ko te mea ke fakataunu a pati a te pelofeta ko Isaia, kolā ne fai mai: “Ieova, ko oi ne fakatuanaki ki te mea ne lagona ne matou? Kae ko oi ne fakaasi atu ki ei a te lima o Ieova?” 39  Ne toe fai mai ne Isaia a te pogai ne seki mafai ei o tali‵tonu latou: 40  “Ko oti ne faka‵kivi ne ia olotou mata kae fai olotou loto ke ma‵keke, ko te mea ke se lavea ne latou ki olotou mata kae ke se malama‵lama foki latou i olotou loto, ko ‵fuli mai ei ke faka‵lei ne au latou.” 41  Ne fai mai ne Isaia a pati konei me ne lavea ne ia tena ‵malu kae ne faipati mai e uiga ki a ia. 42  E ui i ei, e tokouke a tino pule ne fakatuanaki ki a ia, kae ona ko te kau Falesaio ne seki mafai ei o fakaasi ‵tonu mai ne latou me e fakatuanaki latou ki a ia, ko te mea ke se faka‵tea latou mai te sunako; 43  me ne fia‵fia atu latou ki tavaega mai tino i lō tavaega mai te Atua. 44  Kae ne pakalaga a Iesu, kae fai atu: “Ko te tino telā e fakatuanaki mai ki a au, e se fakatuanaki mai fua ki a au, kae ki a ia foki telā ne uga mai ne ia au. 45  A ko te tino telā e lavea ne ia au e lavea foki ne ia a ia telā ne uga mai ne ia au. 46  Au ne vau e pelā me se mainaga ki te lalolagi, ko te mea ko tino katoa kolā e fakatuanaki ki a au ke se ‵nofo tumau i te pouliga. 47  Kae ko so se tino e lagona ne ia aku pati kae se tausi ki ei, e se fakamasino ne au; me i a au ne seki vau o fakamasino te lalolagi, kae o faka‵sao te lalolagi. 48  A te tino telā e se fia saga mai ki a au kae e se talia ne ia aku pati e isi se tino e fakamasino ne ia a te tino tenā. A pati kolā e fai atu ne au e fakamasino ei a ia i te aso fakaoti; 49  me ne seki fai atu ne au a pati konā i a au eiloa, kae ko te Tamana eiloa telā ne uga mai ne ia au ne tuku mai ne ia te fakatonuga ki a au ki mea kolā e ‵tau o fakailoa atu kae faipati au ki ei. 50  E iloa foki ne au me e fakauiga tena fakatonuga ki te ola se-gata-mai. Tela la, a mea kolā e faipati atu ne au, ko mea fua kolā ne fai mai ne te Tamana ki a au, ke faipati atu ne au.”

Fakamatalaga mai lalo

 Io me “kafai e se tō se fuaga ki te laukele kae mate.”