Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Ioane 11:1-57

11  E isi se tagata e igoa ki a Lasalo ne masaki. A ia se tino Petania, telā ko te fa‵kai o Malia mo tena taina ko Maleta.  A Malia telā ne ‵mili ne ia te Aliki ki te sinu manogi kae ‵solo ne ia ana vae ki ana laulu, ko te tuagane o Lasalo telā e masaki.  Tela la, uga atu ei te fekau a ana tuagane ki a Iesu penei: “Te Aliki! A tou taugasoa pele telā e alofa malosi koe ki ei e masaki.”  Kae i te lagonaga ne Iesu a te mea tenā, fai aka ei a ia penei: “A te masaki tenei e se iku atu ki te mate, kae e fai penā ke faka‵malu ei te Atua, ko te mea ke faka‵malugina te Tama a te Atua i te mea tenei.”  Ne alofa malosi a Iesu ki a Maleta mo tena taina, e pelā foki mo Lasalo.  Kae i te logoga a Iesu i a Lasalo ko masaki, ne nofo eiloa a ia i te koga tenā i aso e lua.  Fakamuli ifo, fai atu ei a ia ki ana soko: “Tatou ka toe ‵foki ki Iuta.”  Ne fai atu ana soko ki a ia: “Te Faiakoga,* ne fatoa oti fua ne lamalama koe ne tino Iuta ke peipei ki fatu, kae ka toe fano foki koe ki ei?”  Ne tali atu a Iesu: “E a, e se sefululua itula o te ao? Kafai e sasale se tino i te mainaga o te ao, e se poko a ia ki se mea, me e lavea ne ia te mainaga o te lalolagi tenei. 10  Kae kafai e sasale se tino i te po, e poko a ia ki se mea, me e seai se mainaga i loto i a ia.” 11  I te otiga ne fai atu ne ia a pati konei toe fai atu ei a ia: “A Lasalo te ‵tou taugasoa ko moe, kae ka malaga atu au o ‵fagu aka a ia.” 12  Fai atu ei ana soko ki a ia: “Te Aliki, kafai a ia e moe, ka toe ‵lei a ia.” 13  Ne faipati a Iesu e uiga ki tena mate. Kae ne leake latou me ne faipati a ia e uiga ki te moe o malōlō. 14  Ne fai ‵tonu atu ei a Iesu ki a latou i te taimi tenā: “A Lasalo ko oti ne mate. 15  Ona ko koutou, ko fiafia ei au i a au e seki nofo atu i konā, ko te mea ke tali‵tonu koutou. A ko tatou ka olo atu ki a ia.” 16  A ko Toma telā ne fakaigoa ki te Masaga, ne fai atu penei ki nisi soko: “Tatou ka olo foki, ko te mea ke ‵mate fakatasi tatou mo ia.” 17  I te okoatuga a Iesu, ne iloa aka ne ia me ko fa aso ne tuku ei a Lasalo i loto i te tanuga. 18  Ne tu pili a Petania ki Ielusalema i se ‵mao kāti e lua maila.* 19  E tokouke a tino Iutaia ne olo atu o fakamafanafana a Maleta mo Malia e uiga ki te lā tuagane. 20  I te lagonaga ne Maleta i a Iesu ko fanatu, fakafetaui atu ei tou fafine ki a ia; a ko Malia ne sagasaga eiloa i te fale. 21  Ne fai atu a Maleta ki a Iesu: “Te Aliki, moi ne nofo koe i konei penei e se mate toku tuagane. 22  Kae ko iloa nei ne au me i mea katoa kolā e fakamolemole atu ei koe ki te Atua, ka tuku atu eiloa ne te Atua ki a koe.” 23  Ne fai atu a Iesu ki a ia: “Ka toetu mai tou tuagane.” 24  Ne fai atu a Maleta ki a ia: “E iloa ne au me ka toetu mai a ia i te toe‵tuga i te aso fakaoti.” 25  Ne fai atu a Iesu ki a ia: “Au ko te toetu mo te ola. Ko te tino telā e fakatuanaki mai ki a au, e tiga eiloa e mate, kae ka toe ola mai. 26  Kae ko tino katoa kolā e ola kae e fakatuanaki mai ki a au ka se ‵mate eiloa. E a, e talitonu koe ki te mea tenei?” 27  Ne fai atu tou fafine ki a ia: “Ao, e te Aliki, au e talitonu i a koe ko te Keliso te Tama a te Atua, telā e vau ki te lalolagi.” 28  I te otiga o ana pati konei, fano ei a ia o kalaga ki tena taina ko Malia, kae fai lēmū atu ki ei: “A te Faiakoga ko nofo i konei kae ko ‵sala mai ki a koe.” 29  I te lagonaga ne Malia te mea tenei, ne tu fakavave a ia ki luga kae fanatu ki a ia. 30  Ne seki oko eiloa a Iesu ki te fa‵kai me koi nofo atu a ia i te koga telā ne fetaui ei lāua mo Maleta. 31  Tela la, i te laveaga ne tino Iutaia, kolā ne ‵nofo fakatasi mo Malia i konā o fakamafanafana atu a ia, a te ‵tuakaga fakavave a tou fafine kae fanatu ki tua, tau‵tali atu ei latou i a ia, me ne ma‵natu aka latou me ko fano o tagi i te tanuga. 32  I te okoatuga a Malia ki te koga tenā kae lavea atu ne ia a Iesu, ne fakasiga ifo ei tou fafine ki ana vae, kae fai atu ki a ia: “Te Aliki, moi ne nofo koe i konei, penei e se mate toku tuagane.” 33  Tela la, i te laveaga ne Iesu a tou fafine e tagi mautuutu, e pelā foki mo tino Iutaia kolā ne olo atu mo ia, ne mafatia kae otia malosi tena loto. 34  Ne fai atu a ia: “Ne tuku i fea ne koutou a ia?” Ne fai atu latou ki a ia: “Te Aliki, vau o onoono.” 35  Tagi ei a Iesu. 36  Ne fai atu a tino Iutaia: “Kiloke ki te lasi o tena alofa ki a Lasalo!” 37  Kae ne fai atu a nisi tino: “E se mafai ne te tagata telā ne faka‵pula ne ia a mata o te tagata ‵kivi o fai a te tino tenei ke se mate?” 38  Ne toe mafatia foki a Iesu. Oti aka fano ei ki te tanuga, telā se ana mo te fatu e fakapale ki luga i ei. 39  Ne fai atu a Iesu: “Ave keatea te fatu.” Ne fai atu a Maleta, te tuagane o te tino mate: “Te Aliki, ko ‵tau o manogi masei a ia me ko ‵tusa nei mo te fa o aso.” 40  Ne fai atu a Iesu ki a ia: “E a, e seki fai atu au ki a koe me kafai e talitonu mai koe, ka lavea eiloa ne koe a te ‵malu o te Atua?” 41  Ne ave ei ne latou a te fatu keatea. Ne ‵ti aka a mata o Iesu ki te lagi kae fai atu: “Toku Tamana, au e fakafetai atu ki a koe me ko fakalogologo mai koe ki a au. 42  E tonu, e iloa ne au me e fakalogologo mai faeloa koe ki a au; kae ona ko te vaitino konei e sikomia ne latou au, e faipati ei au ko te mea ke tali‵tonu latou me i a au ne uga mai ne koe.” 43  I te otiga o ana pati konei, ne pakalaga atu ei a ia i se leo lasi: “Lasalo o, vau ki tua!” 44  Ne vau ei ki tua te tagata telā ko oti ne mate mo ana vae mo ana lima e saisai ki laugatu, e pelā foki mo ana mata. Ne fai atu a Iesu ki a latou: “Talatala aka ana saisaiga kae tuku atu ke fano.” 45  Tela la, ne fakatuanaki ei a tino Iutaia e tokouke kolā ne olo atu ki a Malia kae lavea ne latou a te mea telā ne fai ne Iesu. 46  Ne olo atu a nisi tino o latou ki te kau Falesaio kae fakailoa atu a mea kolā ne fai ne Iesu. 47  Ona ko te mea tenā, ne fakamaopoopo ei ne faitaulaga pule mo Falesaio a te Sanetulini kae fai aka penei olotou pati: “Ne a ‵tou mea ka fai, me ko fai ne te tagata tenei a galuega ‵mana e uke? 48  Kafai e tiakina fua ne tatou penei, ka fakatuanaki eiloa a tino katoa ki a ia, kae ka o‵mai te kau Loma o puke te ‵tou fale* mo te ‵tou fenua. 49  Ne fai atu se tagata e tokotasi i a latou, ko Kaiafa, telā ko te faitaulaga sili i te tausaga tenā: “E se iloa ne koutou se mea e tasi, 50  kae e se lavea foki ne koutou me ka aoga eiloa ki a koutou ke mate se tino e tokotasi mō tino katoa ko te mea ke se fakaseai ei te fenua kātoa.” 51  Ne seki fai atu ne ia a pati konei i a ia eiloa; kae ona ko ia ko te faitaulaga sili i te tausaga tenā, ne ‵valo mai ei ne ia i a Iesu e ‵tau eiloa o mate mō te fenua kātoa, 52  kae e se mō te fenua fua, kae ko te mea ke fakamaopoopo fakatasi mai ne ia a tama‵liki a te Atua kolā e salalau valevale. 53  Mai te aso tenā o fano ki mua, ne fai ei te lotou fono ke tamate a ia. 54  Tela la, ne seki toe mafai ei ne Iesu o fanofano sale i tafa o tino Iutaia, kae ne fanatu a ia mai konā ki te fenua i tafa o te koga lavaki, ki te fa‵kai e igoa ki a Efalaima, kae ne ‵nofo ei i konā fakatasi mo ana soko. 55  Ko pili ki te Paseka a te kau Iutaia, kae e tokouke a tino ne olo atu ki Ielusalema mai mua o te Paseka ko te mea ke faka‵ma latou e ‵tusa mo te tulafono. 56  Tela la, ne salasala atu ei latou ki a Iesu kae fai aka olotou pati i a latou eiloa i tafa o te faletapu: “Se a te otou faka‵tau? E mata, ka se vau eiloa a ia ki te fakamanatuga?” 57  Kae ko oti ne fakatonu atu a faitaulaga pule mo Falesaio ki so se tino e iloa ne ia te koga e nofo ei a Iesu, ke fakailoa atu ki a latou, ko te mea ke puke ne latou a ia.

Fakamatalaga mai lalo

 Ke onoono ki te fakamatalaga mai lalo i te Mat 23:7.
 Kāti e nofo ki se 2.8 kilomita.
 Ko tena uiga “ko te faletapu.”