Ioane 10:1-42

10  “Au e fai ‵tonu atu ki a koutou, A te tino telā e se ulu atu ki te lulu mamoe i te mataloa kae e kake aka i se isi koga, a te tino tenā se tino kaisoa kae ‵faomea.  A ko te tino telā e ulu atu i te mataloa ko te tausi mamoe o te lafu mamoe.  E ‵tala atu ne te tino tausi mataloa a te mataloa ki te tino tenei, kae e faka‵logo a mamoe ki tena leo. E kalaga atu ki ana mamoe i olotou igoa, takitaki ei ne ia a latou ki tua.  Kafai ko oti ne aumai ne ia ana mamoe katoa ki tua, ko mua ei a ia i a latou, kae e tau‵tali atu a mamoe i a ia, me e iloa ne latou a tena leo.  E se mafai o tau‵tali atu latou i se tino fakaa‵tea kae ka ‵tele latou keatea mai i a ia, me e se iloa ne latou a leo o tino fakaa‵tea.”  Ne fai atu ne Iesu a fakatusatusaga konei ki a latou; kae ne seki iloa ne latou a uiga o mea kolā e faipati atu ne ia.  Ne toe faipati atu a Iesu ki a latou, “Au e fai ‵tonu atu ki a koutou, au ko te mataloa o mamoe.  A tino katoa kolā ne o‵mai kae fakaaoga ‵se ne latou toku igoa, konā eiloa a tino kai‵soa kae ‵faomea; kae ne seki faka‵logo a mamoe ki a latou.  Au ko te mataloa; so se tino e ulu mai e auala i a au ka sao eiloa. Ka fano a ia ki loto kae fano ki tua kae ka maua ne ia a koga e uke a mouku i ei. 10  A te tino kaisoa e vau fua o kaisoa, ke tamate, kae ke fakamasei atu. Au ne vau ko te mea ke maua ne latou a te ola kae ke katoatoa foki. 11  Au ko te tausi mamoe ‵lei. E tuku atu ne te tausi mamoe ‵lei a tena ola mō ana mamoe. 12  Kafai e lavea ne te tagata faigaluega telā e sē se tausi mamoe, kae e se i a ia foki a mamoe, a te kuli vao ko vau, e tiakina ne ia a mamoe kae e tele keatea. E puke ne te kuli vao a mamoe ko mafuta valevale ei latou, 13  i te mea i a ia se tino faigaluega fua kae e se alofa ki mamoe. 14  Au ko te tausi mamoe ‵lei kae e iloa ne au aku mamoe kae e iloa foki ne aku mamoe a au, 15  e pelā eiloa mo au e iloa ne te Tamana kae e iloa foki ne au a te Tamana. E tuku atu ne au toku ola mō aku mamoe. 16  “Kae e isi aka foki ne aku nisi mamoe, kolā e se ‵tu i te lulu tenei. E aumai foki ne au a latou konei, kae ka faka‵logo latou ki toku leo, kae ka fai latou katoa mo lafu mamoe e tasi, mo te tausi mamoe e tokotasi. 17  Tenei te pogai e alofa mai ei te Tamana ki a au, me e tuku atu ne au toku ola, ko te mea ke toe maua ne au. 18  E seai se tino ne ave ne ia keatea te ola mai i a au, kae ko au eiloa ne tuku atu ne au. E isi saku pule ke tuku atu, kae e isi foki saku pule ke toe maua ne au. Ne maua ne au te fakatonuga tenei mai toku Tamana.” 19  Ne toe vaelua foki a tino Iutaia ona ko pati konei. 20  E tokouke a tino ne fai atu penei: “E isi se temoni i a ia kae ko masei foki tena ulu. Kaia e fakalogo‵logo ei koutou ki a ia?” 21  Ne fai atu a nisi tino: “A pati konei e se ne pati a se tino e pukea ne temoni. E a, e mafai ne se temoni o faka‵pula a mata o se tino ‵kivi?” 22  I te taimi tenā o te ‵tau ‵moko ne fai ei te fakamanatuga o te fakatapuga* o te faletapu i Ielusalema, 23  kae ne sasale atu a Iesu i loto i te faletapu i te fakaosoga o Solomona. 24  Ne ualolo atu a tino Iutaia ki a ia i konā kae fai atu ki a ia: “Ka pefea te leva ka faka‵tali ei matou ki a koe? Kafai koe ko te Keliso na fakaasi ‵tonu mai ki a matou.” 25  Ne tali atu a Iesu ki a latou: “Ko oti ne fai atu ne au ki a koutou, kae e se tali‵tonu koutou. A galuega kolā e fai ne au i te igoa o toku Tamana, e molimau atu a mea konei e uiga ki a au. 26  Kae e se tali‵tonu eiloa koutou, me i a koutou e se ko aku mamoe. 27  E faka‵logo aku mamoe ki toku leo, kae e iloa ne au latou, kae e tau‵tali mai latou i a au. 28  E tuku atu ne au ki a latou a te ola se-gata-mai, kae ka se mafai o fakaseai latou, e seai foki se tino e mafai o ‵futi ne ia latou keatea mai toku lima. 29  A mea kolā ko oti ne tuku mai ne toku Tamana ki a au ne mea kolā e sili atu i te tāua i nisi mea katoa, kae e seai se tino e mafai o ‵futi ne ia keatea mai te lima o te Tamana. 30  A māua mo toku Tamana e tasi eiloa.” 31  Ne toe puke aka ne tino Iutaia a fatu ke peipei a ia. 32  Ne fai atu a Iesu ki a latou: “Ne fakaasi atu ne au ki a koutou a galuega ‵lei e uke mai te Tamana. Tefea la te galuega i mea konā ko peipei ei au ne koutou ki fatu?” 33  Ne tali atu a tino Iutaia ki a ia: “E se peipei ne matou a koe ki fatu ona ko galuega ‵lei, kae ona ko koe e pati masei ki te Atua, me e tiga eiloa a koe se tagata, kae e fai mai koe i a koe se atua.” 34  Ne tali atu a Iesu ki a latou: “E a, e se tusi i te otou Tulafono, ‘Au ne fai atu, “A koutou ne atua”’? 35  Kafai ne fakaigoa ne ia ki ‘atua’ a tino kolā ne taku fakamasei ne te muna a te Atua, kae e se mafai eiloa o fakaseaoga a Tusitusiga Tapu, 36  e a, e fai mai koutou ki a au, te tino telā ne fakatapu ne te Tamana kae uga mai ki te lalolagi, ‘A koe ne pati masei ki te Atua,’ ona ko au ne fai atu, i a au ko te Tama a te Atua? 37  Kafai e se fai ne au a galuega a toku Tamana, sa tali‵tonu mai ki a au. 38  Kae kafai e fai ne au, e tiga eiloa e se tali‵tonu koutou ki a au, ke tali‵tonu la ki aku galuega, ko te mea ke iloa ne koutou kae ke iloa faeloa me e kau mai te Tamana ki a au a ko au e kau ki te Tamana.” 39  Ne toe taumafai ei latou o puke a ia; kae ne sao a ia keatea mai i a latou. 40  Ne toe foki atu a ia ki te suā feitu o te Iolitana ki te koga telā ne fai muamua i ei ne Ioane te papatisoga, kae ne nofo atu a ia i konā. 41  E tokouke a tino ne olo atu ki a ia, kae fai atu penei: “E seai eiloa se galuega ‵mana e tasi ne fai ne Ioane, kae ko mea katoa kolā ne fai mai ne Ioane e uiga ki te tagata tenei e ‵tonu katoa.” 42  Kae e tokouke a tino ne fakatuanaki ki a ia i konā.

Fakamatalaga mai lalo

Ioa 10:22  A te ‵kaiga tenei e fakamanatu i ei a te tutokotasi o tino Iutaia mai te pulega a te kau Eleni mo Sulia, kae toe fakatapu i ei a te faletapu i Ielusalema ki a Ieova i te 165 T.L.M.