Ioane 1:1-51

1  Ne ola te Muna i te kamataga, kae ne ‵nofo fakatasi te Muna mo te Atua, kae ko te Muna e fai pelā me se atua.*  Ne ‵nofo fakatasi a ia mo te Atua i te kamataga.  Ne faite a mea katoa e auala i a ia, kae e seai eiloa se mea e tasi ne faite e aunoa mo tena fesoasoani. A te mea ne faite  e auala i a ia ko te ola, a ko te ola ko te mainaga mō tino.  E maina atu te mainaga i loto i te pouliga, kae e se mafai ne te pouliga o fakatakavale a te mainaga.  E isi se tagata telā ne uga mai e pelā me se sui o te Atua: a tena igoa ko Ioane.  Ne vau te tagata tenei ke fai mo molimau, ko te mea ke molimau atu e uiga ki te mainaga, ko te mea ke mafai o tali‵tonu a tino kese‵kese katoa e auala i a ia.  A ia e se ko te mainaga, kae ne uga mai a ia ke molimau atu e uiga ki te mainaga tenā.  Ko pili o vau ki te lalolagi a te mainaga tonu telā ka maina atu ki tino kese‵kese katoa. 10  Ne nofo a ia i te lalolagi, a ko te lalolagi ne faite e auala i a ia, kae ne seki iloa ne te lalolagi a ia. 11  Ne vau a ia ki tena fenua tonu kae seki talia a ia ne ana tino ‵tonu. 12  E ui i ei, ne tuku atu ne ia ki tino katoa kolā ne talia ne latou a ia te avanoaga ke fai latou mo fai ne tama a te Atua, me ne fakatuanaki latou ki tena igoa. 13  Ne seki fa‵nau mai latou i te toto io me ko pogai faka-te-foitino io me ko loto o tāgata, kae mai i te Atua. 14  Tela la, ne liu tino te Muna kae ne ‵nofo fakatasi mo tatou. Ne lavea ne tatou tena ‵malu, ko te vaegā ‵malu telā e maua fua ne se tama fagasele e tokotasi mai tena tamana; kae ne ‵fonu eiloa a ia i te alofa o te Atua* mo te munatonu. 15  (Ne molimau mai a Ioane e uiga ki a ia, e tonu, ne kalaga atu tou tagata, me ko ia eiloa telā ne fai mai penei: “A te tino telā e vau i oku tua ne mua atu i a au, me ne ola mua a ia i a au.”) 16  Ne maua ne tatou katoa mai i a ia te alofa tauanoa, me e ‵fonu a ia i te alofa tauanoa. 17  Ne tuku mai te Tulafono e auala i a Mose, kae ko te alofa tauanoa mo te munatonu ne tuku mai e auala i a Iesu Keliso. 18  E seai se tino kai lavea ne ia te Atua i se taimi e tasi; kae na ko te tama fagasele e tokotasi telā e fai pelā me se atua kae e nofo i te fatafata o te Tamana, e fakamatala mai ne ia a te Tamana. 19  Tenei la te molimau ne fai ne Ioane i te taimi ne uga atu ei ne tino Iutaia a faitaulaga mo tino Levi mai i Ielusalema ke fesili atu ki a ia: “Ko oi a koe?” 20  Ne seki fakafiti a ia kae ne fakaasi ‵tonu atu penei: “Au e se ko te Keliso.” 21  Ne fesili atu latou ki a ia: “Ko oi la koe? A koe ko Elia?” Ana muna: “Au e se ko ia.” “A koe ko te Pelofeta?” “Ikai!” ko tena tali. 22  Ne fai atu ei latou ki a ia: “A ko oi la koe? ko te mea ke tuku atu ne matou se tali ki a latou kolā ne uga mai ne latou matou?” 23  Ana muna: “Au ko te leo o te tino telā e pakalaga i te koga lavaki, ‘Fai ke ‵tonu te auala o Ieova,’ e pelā eiloa mo pati a Isaia te pelofeta.” 24  A tino konā ne uga atu ne te kau Falesaio. 25  Ne fesili atu latou ki a ia: “Kaia la e papatiso ei ne koe a tino māfai a koe e se ko te Keliso io me ko Elia io me ko te Pelofeta?” 26  Ne tali atu a Ioane ki a latou, ana muna: “Au e papatiso ki te vai. E isi se tino tenā e ‵tu fakatasi mai mo koutou kae e se iloa ne koutou. 27  Ko te tino tenā e vau i oku tua, kae e se ‵tau o ‵tala ne au ana taka.” 28  Ne ‵tupu a mea konei i Petania i te feitu e tasi o te Iolitana, ko te koga telā ne fai ei ne Ioane te papatisoga. 29  I te suā aso ne lavea ei ne ia a Iesu e fanatu ki a ia, kae ne fai atu a Ioane: “Kiloke, te Tamā Mamoe a te Atua telā ka ave ne ia keatea a agasala a te lalolagi! 30  Tenei eiloa te tino ne fai atu ei au, E vau mai oku tua te tagata telā ne mua i a au, me ne mua o ola a ia i a au. 31  Ne seki iloa foki ne au a ia, kae ko te pogai ne vau ei au o papatiso ki te vai ko te mea ke mafai o iloa a ia ne tino Isalaelu.” 32  Ne molimau mai foki a Ioane, ana muna: “Ne lavea ne au te agaga e fanaifo e pelā me se lupe mai te lagi, kae ne nofo i luga i a ia. 33  Ne seki iloa foki ne au a ia, kae ko te Tino eiloa telā ne uga mai ne ia au ke papatiso ki te vai ne fai mai penei, ‘Ko te tino telā e lavea ne koe e fanaifo te agaga kae nofo i luga i ei, tenei la te tino ka fai ne ia te papatisoga ki te agaga tapu.’ 34  Kae ko oti ne lavea ne au a ia, kae ko oti foki ne molimau atu au me tenei eiloa te Tama a te Atua.” 35  I te suā aso, ne takatu‵tu a Ioane mo ana soko e tokolua, 36  kae i te laveaga ne ia a Iesu e sasale mai, ana muna: “Kiloke ki te Tamā Mamoe a te Atua!” 37  Ne lagona ne te tokolua soko ana pati, tau‵tali atu ei lāua i a Iesu. 38  Ne mafuli atu a Iesu, kae i te laveaga ne ia a lāua e tau‵tali atu i a ia, fai atu ei: “Se a te mea e ‵sala ne koulua?” A lā muna ki a ia: “Te Lapi (ko tena uiga, te Faiakoga,) tefea te koga e nofo koe i ei?” 39  Ana muna ki a lāua: “O‵mai, ke lavea ne koulua.” Ne olo atu latou kae ne lavea ne lāua te koga e nofo ei a ia, ne ‵nofo fakatasi latou i te aso tenā; kāti ko te sefulu o itula.* 40  A Anitelea te taina o Simona Petelu se tokotasi i a lāua kolā ne lagona ne ia a pati a Ioane kae tautali atu i a Iesu. 41  Ne maua muamua ne ia tena taina, ko Simona, kae fai atu ki a ia: “Ko oti ne maua ne matou te Mesia (ko tena uiga, ko te Keliso). 42  Ne ‵taki atu ne ia tou tagata ki a Iesu. I te kiloatuga a Iesu ki a ia, ana muna: “A koe ko Simona te tama a Ioane; a koe ka fakaigoa ki a Kefa” (telā e ‵fuli ki a Petelu). 43  Ne manako a ia o fano ki Kalilaia i te suā aso. Ne maua ne Iesu a Filipo kae fai atu ki a ia: “Tautali mai i a au.” 44  A Filipo se tino mai Petesaita, te fa‵kai o Anitelea mo Petelu. 45  Ne maua ne Filipo a Natanielu kae fai atu ki a ia: “Ko oti ne maua ne matou a te tino telā ne tusi mai ei a Mose i te Tulafono mo tusi a te kau Pelofeta, ko Iesu te tama a Iosefa mai Nasaleta.” 46  Kae ne fai atu a Natanielu ki a ia: “E a, e mafai o maua se mea ‵lei mai Nasaleta?” Ne fai atu a Filipo ki a ia: “Vau o onoono.” 47  Ne lavea ne Iesu a Natanielu e fanatu ki a ia kae fai atu e uiga ki a ia: “Kiloke, tenei eiloa te tino Isalaelu telā e seai se uiga fakaloiloi i a ia.” 48  Ne fai atu a Natanielu ki a ia: “Ne iloa pefea ne koe au?” Ne tali atu a Iesu ki a ia: “A koi tuai o kalaga atu a Filipo ki a koe i lalo i te lakau ko te mati, a ko leva ne lavea ne au a koe.” 49  Ne tali atu a Natanielu ki a ia: “Te Faiakoga, a koe ko te Tama a te Atua, a koe ko te Tupu o Isalaelu.” 50  Ne tali atu a Iesu ki a ia: “E a, e talitonu koe ona ko au ne fai atu me ne lavea ne au a koe i lalo o te lakau ko te mati? Ka lavea eiloa ne koe a mea e sili fakafia atu i te ‵lasi i lō mea konei.” 51  Ne toe fai atu a Iesu ki a ia: “Au e fai ‵tonu atu ki a koutou, ka lavea ne koutou a te lagi e matala mo agelu a te Atua e olo aka kae olo ifo ki te Tama a te tagata.”

Fakamatalaga mai lalo

Ioa 1:1  Io me “e pelā mo uiga o te Atua.” Ke onoono ki te Mataupu Fakaopoopo e 4.
Ioa 1:14  Io me “alofa tauanoa”
Ioa 1:39  E ‵pau mo te itula e 4 i te fakaafiafi māfai e lau mai i te saeakaga o te la.