Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Iakopo 4:1-17

4  Se a te māfuaga o taua mo kinauga i va o koutou? E mata, e se māfua mai i otou manakoga faka-te-foitino kolā e taua faeloa i loto i a koutou?*  E ma‵nako koutou ki mea kae tela la e se maua ne koutou. E tumau koutou i te ‵tatino kae matakano‵kano, kae e se mafai o maua ne koutou. E tumau koutou i te fakatau taua kae kinau. E seai se mea e maua ne koutou me i a koutou e se fakamolemole atu ki ei.  Kafai e fakamolemole atu koutou, e se maua ne koutou, me e se tonu te pogai e fakamolemole atu ei koutou, me e fakaaoga fua ne koutou ki otou manakoga faka-te-foitino.  Tino mulilua,* e a, e se iloa ne koutou i te fai taugasoa mo te lalolagi ko te fai fili tenā ki te Atua? Tela la, so se tino e manako ke fai a ia mo taugasoa o te lalolagi ko fai eiloa a ia mo fai te fili o te Atua.  Io me e mata, e mafau‵fau koutou me e seai se pogai ne fai mai ei a tusitusiga tapu penei: “A te agaga o te loto masei telā e maua i loto i a tatou e manako faeloa ki mea kese‵kese e uke”?  E tiga te feitu tenā, e sili atu a te alofa tauanoa telā e tuku mai ne ia. Tenā te pogai e fai mai ei penei: “E ‵teke ne te Atua a tino fakamata‵mata, kae e tuku atu ne ia te alofa tauanoa ki tino loto mau‵lalo.”  Tela la, ke faka‵logo koutou ki te Atua; kae ‵teke atu te Tiapolo, kae ka tele a ia keatea mai i a koutou.  Fakapilipili atu ki te Atua, kae ka fakapilipili mai a ia ki a koutou. ‵Fulu otou lima, koutou e tino agasala, kae faka‵ma otou loto, koutou e tino fakalotolotolua.  Ke talia ne koutou te loto mafatia mo te fanoanoa mo te tagi mautuutu. Ke ‵fuli te otou ‵kata fia‵fia ki te fanoanoa kae ko te otou fia‵fia ki te loto fanoanoa. 10  Ke loto mau‵lalo koutou i mua o Ieova, kae ka fakamaluga ne ia koutou. 11  Fakagata te fakamasei o te suā tino ki te suā tino, e oku taina. A te tino telā e fakamasei atu ki tena taina io me e fakamasino ne ia tena taina e ‵teke ki te tulafono kae e fakamasino foki ne ia te tulafono. Kafai e fakamasino ne koe te tulafono, ko se tautali koe i te tulafono, kae ko fai koe mo fai te famasino. 12  E tokotasi fua te tino fai tulafono mo te famasino, ko ia telā e mafai o fakasao io me fakaseai ne ia te tino. Kae ko oi la koe ke fakamasino ne koe tou tuakoi? 13  O‵mai, koutou kolā e fai mai penei: “I te aso nei io me ko te aso ma taeao ka faima‵laga atu matou ki te fakai tenei o fai pisinisi i ei i se tausaga e tasi ke uke omotou tupe,” 14  kae e se iloa ne koutou te mea ka tupu ki otou ola ma taeao. Me i a koutou e pelā mo te ‵sau telā e oko mai i se taimi toetoe ko galo atu ei. 15  I lō te fai penā, e ‵tau o fai mai koutou penei: “Kafai e loto a Ieova ki ei, ka ola eiloa matou kae ka fai foki ne matou te mea tenei io me ko te mea telā.” 16  Kae nei la e fakamata‵mata eiloa koutou i otou pati fia ‵sili. A uiga fakamata‵mata katoa penā ne mea matagā. 17  Tela la, kafai e iloa ne se tino a te mea tonu e ‵tau o fai kae se fai ne ia, ko agasala eiloa a ia.

Fakamatalaga mai lalo

Ia 4:1
 I te ‵gana Eleni, “i loto i otou foitino.”
Ia 4:4
 Ko tino kolā e se fakamaoni ki te Atua.