Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Iakopo 2:1-26

2  E a, e oku taina, e tausi ne koutou te fakatuanaki o te ‵tou Aliki ‵malu ko Iesu Keliso kae e fakaasi mai foki ne koutou te fakailoga tino?  Me kafai e ulu mai se tino ki te otou fakatasiga mo mama aulo i ana matikao lima kae e pei ki gatu ‵gali, kae e ulu mai foki se tino mativa mo ana gatu lai‵lai,  e a, ka fapito koe ki te tino telā e pei ki gatu ‵gali kae fai atu ki a ia: “Nofo i te nofoga gali tenei,” kae fai atu koe ki te tino mativa: “Tu koe i luga,” io me: “Sagasaga i tafa o te koga telā e tuku ei oku vae”?  Kafai e penā loa, e mata, ko se fakailoga tino koutou kae ko fai foki koutou mo fai a famasino kolā e fai ne latou a fakaikuga ma‵sei?  Faka‵logo mai, e oku taina pele. E a, e seki filifili ne te Atua a tino kolā e ma‵tiva i te kilokiloga a te lalolagi ke mau‵mea i te fakatuanaki kae ke fai foki latou mo fai a sui o te Malo, telā ne folafola atu ne ia ki a latou kolā e a‵lofa ki a ia?  Kae ko oti ne fakamasiasi ne koutou a tino ma‵tiva. E a, e se ko tino mau‵mea konā e sonafai ne latou a koutou, kae toso atu ne latou a koutou ki fono fakamasino?  E a, e se muna ma‵sei latou ki te igoa gali telā ne kalagagina ei koutou?  Kae kafai ko fakaaoga ne koutou a te tulafono fakatupu telā e fakaasi mai i te fuaiupu tenei: “E ‵tau mo koe o alofa ki tou tuakoi e pelā mo koe ki a koe eiloa,” ko oko eiloa i te ‵lei o koutou.  Kae kafai e tumau koutou i te fakailoga tino, ko agasala ei koutou, kae e fakaasi ‵tonu mai ne te tulafono i a koutou ne tino solitulafono. 10  Me kafai e fakalogo se tino ki te Tulafono kātoa kae soli ne ia se vaega e tasi i ei, ko soli eiloa ne ia a tulafono katoa. 11  Me i te tino telā ne fai mai, penei: “Sa mulilua,” ko ia foki telā ne fai mai: “Sa tatino.” Tela la, kafai e se mulilua koe a ko koe e tatino, ko fai ei koe mo fai se tino solitulafono. 12  Ke tumau koutou i te fai‵pati atu kae amio e pelā mo tino kolā ka fakamasinogina e auala i te tulafono o tino saoloto. 13  Me i te tino telā e se alofa fakamagalo ka fakamasino foki a ia e aunoa mo te alofa fakamagalo. E tāua fakafia atu te alofa fakamagalo i lō te faiga o fakasalaga. 14  Se a la te aoga, e oku taina, māfai e fai mai se tino i a ia e fakatuanaki kae e seai ne ana galuega? E a, e mafai o fakasao a ia ne te fakatuanaki tenā? 15  Kafai e seai ne gatu o se taina io me se tuagane kae e se lava ana meakai mō te aso tenā, 16  kae fai atu se tino i a koutou ki a ia penei: “Fano mo te filemu, ke mafanafana kae ke kai makona foki koe,” kae e se tuku atu ne koutou a mea kolā e manakogina ne ia mō tena foitino, se a la tena aoga? 17  E penā foki te fakatuanaki e aunoa mo galuega, e mate fua. 18  Kāti ka fai mai se tino penei: “E maua ne koe te fakatuanaki, kae fai ne au a galuega. Fakaasi mai ki a au tou fakatuanaki e aunoa mo galuega, kae ka fakaasi atu ne au ki a koe toku fakatuanaki e auala i aku galuega.” 19  E a, e talitonu koe me e tokotasi te Atua? E tonu loa koe. Kae e tali‵tonu foki a temoni ki ei kae pole‵pole i te ma‵taku. 20  E mata, e fia iloa ne koe, e te tino valea, me i te fakatuanaki e aunoa mo galuega e seai sena aoga? 21  E a, e se ko Apelaamo te ‵tou tupuga telā ne taku amiotonugina i te otiga ne ofo atu ne ia a Isaako, tena tama, i luga i te fatafaitaulaga? 22  E lavea ne koe me ne ga‵lue fakatasi tena fakatuanaki mo ana galuega kae ne fai ei ke katoatoa tena fakatuanaki e auala i ana galuega. 23  Kae ne fakataunu i ei a pati konei i tusitusiga tapu: “Ne fakatuanaki Apelaamo ki a Ieova, kae ne taku a ia se tino amiotonu,” kae ne fakaigoa foki ko te “taugasoa o Ieova.” 24  Ko lavea ne koutou me e taku amiotonugina te tino i ana galuega, kae e se ko te fakatuanaki fua. 25  E se penā foki a Lahapa te fafine talitagata telā ne taku amiotonugina i ana galuega, i te otiga ne talimalo ne ia a avefekau kae uga atu ke olo i se isi auala? 26  E tonu, e pelā eiloa mo te foitino e mate māfai e seai se manava ola,* e penā foki te fakatuanaki e mate māfai e seai ne ana galuega.

Fakamatalaga mai lalo

Ia 2:26
 I te ‵gana Eleni, ko te pneuʹma. Ke onoono ki te Mataupu Fakaopoopo e 8.