Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Iakopo 1:1-27

1  Au ko Iakopo, se pologa a te Atua e penā foki loa mo te Aliki ko Iesu Keliso ki matakāiga e sefululua kolā e salalau i koga kese‵kese: Talofa koutou!  Ke fia‵fia koutou, e oku taina, māfai e fe‵paki koutou mo tofotofoga kese‵kese,  me e iloa ne koutou i tofotofoga konei o te otou fakatuanaki e tupu mai i ei te lotomau.  Kae ke fakaoti faka‵lei ne te lotomau tena galuega, ko te mea ke ‵lei katoatoa koutou i feitu katoa, e aunoa mo te manako ki se mea.  Tela la, kafai se tino i a koutou e se maua ne ia te poto, ke na fakamolemole atu faeloa a ia ki te Atua, me e tuku atu eiloa ne ia te mea tenā mo te kaimalie ki tino katoa e aunoa mo te mafaufau ki olotou mea ‵se ne fai.  Kae ke fakamolemole atu faeloa i te fakatuanaki e aunoa mo te fakalotolotolua, me i te tino telā e fakalotolotolua e fai pelā mo galu o te tai kolā e peipei valevale ne te matagi.  E tonu, ke mo a eiloa ma fakamoemoe se tino penā me ka maua ne ia se mea mai i a Ieova.  A ia se tino fakalotolotolua, e se ‵mau ana aka i ana mea katoa e fai.  Kae ke fiafia te taina fatauva i tena fakamalugaga, 10  a ko te tino maumea i tena fakamalaloga, me ka fakaseai atu a ia e pelā me se pulalakau i te vao. 11  Me ka fanaka te la mo tena ‵vela kae ka fai ei ke magemage a te lakau, ko tō ei tena pula kae galo atu te ‵gali o ana foliga i tua. E penā foki te galo atu o te tino maumea i te kausaki atu ki ana galuega masani. 12  E fiafia te tino telā e tumau i te kufaki i tofotofoga, me kafai ko talia a ia ne te Atua ko maua ei ne ia te foualiki o te ola, telā ne folafola mai ne Ieova ki tino kolā e tumau i te a‵lofa ki a ia. 13  Kafai e tofotofogina se tino, ke mo a ma fai mai a ia penei: “Au ko tofotofo ne te Atua.” Me e se mafai o tofotofogina te Atua ki mea ma‵sei io me e tofotofo ne ia se tino, 14  kae e tofotofogina a tino taki tokotasi mai te saga atu ki takolekolega o ana manakoga totino. 15  Tela la, kafai ko faitama te manakoga, ko fanau mai i ei te agasala, kae kafai ko oti ne fakataunu te agasala, ko oko mai ei te mate. 16  Ke mo a ma faka‵segina koutou, e oku taina fagasele. 17  A meaalofa ‵lei katoatoa e maua katoa mai luga, e aumai katoa mai te Tamana o mainaga i te lagi, telā e se mafulifuli e pelā mo te ata o se mea e gasuesue. 18  Ko tena loto eiloa ke filifili ne ia tatou e auala i te muna o te munatonu, ko te mea ke fai tatou mo fai a fuataga muamua o ana mea ola ne faite. 19  Ke iloa ne koutou te mea tenei, e oku taina pele. E ‵tau mo tino katoa o vave o fakalogo‵logo, kae fakatuai o fai‵pati, ke se ita vave foki; 20  me e se mafai o aumai ne te ita o te tagata a te amiotonu o te Atua. 21  Tela la, ke tiakina a mea lai‵lai mo mea ma‵sei katoa, kolā ko salalau valevale, kae ke talia mo te agamalu a te ‵tokiga o te muna i otou loto telā e mafai o faka‵sao ne ia otou ola. 22  Kae ke fai koutou mo tino kolā e fakagalue ne latou a te muna, kae e se ko te fakalogo‵logo fua ki ei, kae fakaloiloi i ei ne koutou a koutou eiloa ki manatu sē ‵tonu. 23  Me i so se tino telā fakalogologo fua ki te muna kae e se fakagalue ne ia, a te tino tenā ka fai fua pelā me se tino telā e onoono ki ana foliga* i te kilo. 24  Me e onoono atu ki ana foliga, fano ei keatea, ko puli ei i a ia ana foliga ‵tonu. 25  Kae ko te tino telā e sukesuke faka‵lei ki te tulafono ‵lei katoatoa o te saolotoga kae tumau i ei, ka se puli eiloa i te tino tenei a mea kolā ne lagona ne ia, kae ka fakagalue ne ia kae ka fiafia eiloa a ia i ei. 26  Kafai e fai mai se tino i a ia se tino e tapuaki ki te Atua kae e se pule faka‵lei atu ki tena alelo, e fakaloiloi ne ia a ia eiloa, kae e seai eiloa se aoga o tena tapuakiga. 27  A te vaegā tapuakiga telā e ‵ma kae e se lailai i te kilokiloga a te Atua te ‵tou Tamana e fai penei: ke tausi atu ki tama‵liki ko ‵mate olotou mātua mo fāfine ko ‵mate olotou avaga i olotou puapuaga, kae ke tumau i te ‵ma e aunoa mo se pona mai te lalolagi.

Fakamatalaga mai lalo

Ia 1:23
 Io me ko “foliga ne fanau mai mo ia.”