Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 9:1-43

9  A Saulo, telā koi tumau eiloa i te fakamatakutaku kae fia tamate ne ia a soko o te Aliki, ne fanatu ki te faitaulaga sili  kae fakamolemole atu ki ne tusi ke avatu ki sunako i Tamaseko, ko te mea ke saisai kae puke mai ne ia ki Ielusalema so se tagata io me se fafine telā e maua atu ne ia e kau ki Te Ala.*  Ko pilipili atu a ia ki Tamaseko i tena malaga, kae ne sulu fakavave atu se mainaga mai te lagi ki a ia.  Ne siga a ia ki lalo, kae lagona ne ia se leo e fai atu ki a ia penei: “Saulo, Saulo, kaia e fakasaua ei ne koe au?”  Ne fai atu a ia: “Ko oi koe, e te Aliki?” Ana muna: “Ko au ko Iesu telā e fakasaua ne koe.  Kae ui i ei, tu ki luga, fano ki loto i te fa‵kai, kae ka fai atu ki a koe a mea kolā e ‵tau o fai ne koe.”  Ne ‵tu a tāgata kolā ne faima‵laga fakatasi mo ia kae e seai ne olotou pati e fai, me ne lagona ne latou te leo kae e se lavea ne latou se tagata.  Ne tu aka a Saulo ki luga, kae e tiga eiloa e ‵pula mai ana mata kae e se lavea ne ia se mea. Ne puke ne latou tena lima kae ‵taki atu ki Tamaseko.  E ‵tusa mo aso e tolu ne seki lavea ei ne ia se mea, kae ne seki kai io me inu foki a ia. 10  E isi se soko i Tamaseko e igoa ki a Anania, kae ne fai atu te Aliki ki a ia i se fakaasiga: “Anania!” Ana muna: “Tenei au, e te Aliki.” 11  Ne fai atu te Aliki ki a ia: “Tu ki luga kae fano ki te auala ko Tonu, ki te fale o Iuta kae ‵sala atu ki te tagata e igoa ki a Saulo, mai i Taso, me tenā e ‵talo i ei. 12  Ko oti ne lavea ne ia i se fakaasiga se tagata e igoa ki a Anania e fanatu ki loto kae fakaeke atu ana lima ki luga i a ia ko te mea ke ‵kite ana mata.” 13  Ne tali atu a Anania: “Te Aliki, ko oti ne logo au i tala e uiga ki te tagata tenei mai i tino e tokouke, ki mea ma‵sei e uke ne fai ne ia ki ou tino tapu i Ielusalema. 14  Kae ko maua nei ne ia te taliaga mai faitaulaga pule ke puke fakapagota ne ia a tino katoa kolā e ka‵laga atu ki tou igoa.” 15  Ne fai atu te Aliki ki a ia: “Fano koe, me i te tagata tenei ko oti ne filifili ne au ke fakailoa atu a toku igoa ki fenua fakaa‵tea e pelā foki mo tupu mo te fanauga a Isalaelu. 16  Me ka fakaasi manino atu ne au ki a ia a te uke o puapuaga ka oko ki a ia ona ko toku igoa.” 17  Ne fano a Anania, ulu atu ki loto i te fale kae fakaeke atu ana lima ki luga i a ia kae fai atu: “Saulo, toku taina, a te Aliki, ko Iesu, telā ne fakasae atu ki a koe i te auala ne vau ei koe, ne uga mai ne ia au, ko te mea ke toe ‵kite ou mata kae ke faka‵fonu foki koe ki te agaga tapu. 18  I konā eiloa ne ‵to mai i ana mata a mea e pelā me ne unafi o ika, kae ne toe ‵kite ei a ia. Ne tu aka a ia ki luga ko te mea eiloa ko papatiso a ia, 19  ne kai a ia kae toe maua ne ia te malosi. Ne ‵nofo fakatasi a ia mo te kau soko i nai aso i Tamaseko, 20  kae i konā eiloa ne talai atu a ia e uiga ki a Iesu i loto i sunako, me i a Ia tenei ko te Tama a te Atua. 21  Ne ofo malosi a tino katoa kolā ne fakalogo‵logo ki a ia kae fai aka penei: “E se ko te tagata tenei ne fakasaua valevale ne ia a tino i Ielusalema kolā e ka‵laga ki te igoa tenei, kae ne vau ki konei mō te pogai foki eiloa tenei, ko te mea ke puke fakapagota kae ave ne ia latou ki faitaulaga pule?” 22  Kae ne gasolo aka eiloa o malosi a Saulo kae ne ofo a tino Iutaia kolā e ‵nofo atu i Tamaseko i tena poto o fakatalitonu atu me tenei eiloa te Keliso. 23  I aso e uke mai tua ifo i ei, ne fai‵pati a tino Iutaia ke tamate ne latou a ia. 24  Kae ne iloa ne Saulo te lotou togafiti. Ne alamati faeloa ne latou a ia i ao mo po i mataloa o te fa‵kai ko te mea ke tamate ne latou a ia. 25  Ne puke a ia ne ana soko i te po kae tukutuku ifo ne latou i loto i se kete mai se famalama i te ‵pui o te fa‵kai. 26  I tena okoatuga ki Ielusalema ne taumafai a ia ke kau atu ki te kau soko; kae ne ma‵taku katoa latou i a ia, me ne seki tali‵tonu latou i a ia se soko. 27  Ne fesoasoani atu a Panapa ki a ia kae ‵taki atu ki te kau apositolo. Ne fakamatala likiliki atu ne ia ki a latou a te laveaga ne Saulo a te Aliki i te auala kae ko oti foki ne faipati atu ki a ia, e pelā foki mo te auala ne faipati atu ei a ia mo te loto toa i Tamaseko i te igoa o Iesu. 28  Ne fakatasi atu faeloa a ia ki a latou, kae olo sale i loto mo tua o Ielusalema o fai‵pati atu mo te loto ‵toa i te igoa o te Aliki. 29  Ne fai‵pati kae kinau a ia mo tino Iutaia kolā e fai‵pati faka-Eleni. Kae ne taumafai a latou konei o tamate a ia. 30  I te iloaga ne taina a te mea tenei, ave ei ne latou a ia ki Kaisaleia kae uga atu ke fano ki Taso. 31  Ne maua te filemu i te fakapotopotoga i Iuta kātoa, Kalilaia mo Samalia. Ne fakamalosi aka latou, kae ne gasolo aka faeloa latou o tokouke ona ko te lotou sa‵sale mo te ma‵taku ki a Ieova e pelā foki mo te fakamafanafanaga e maua mai i te agaga tapu. 32  I te asiatuga a Petelu ki koga katoa, ne oko atu foki a ia ki tino o te Atua kolā e ‵nofo i Lita. 33  Ne maua atu ne ia i konā se tagata e igoa ki a Ainea, telā ne takato faeloa i luga i tena moega i tausaga e valu me e ‵pili. 34  Ne fai atu a Petelu ki a ia: “Ainea, ko faka‵lei koe ne Iesu Keliso. Tu ki luga kae fakatoka tou moega.” I konā eiloa, tu aka ei tou tagata. 35  Ne lavea a ia ne tino katoa kolā e ‵nofo i Lita mo te fenua laugatasi o Salona, kae ne ‵fuli atu ei a latou ki te Aliki. 36  E isi foki se soko i Iopa e igoa ki a Tapita, telā kafai e ‵fuli tena igoa e fakauiga ki a Tokasi. Ne fai ne ia a galuega ‵lei e uke kae tufa atu foki a meaalofa e uke kolā ne faite ne ia. 37  Ne masaki a ia i aso konā, mate atu ei. Ne fakakoukou ne latou a ia kae tuku atu i te potu i luga. 38  Ona ko te pili o Lita ki Iopa, i te logoga a soko i a Petelu ko nofo i te fa‵kai tenā, uga atu ei ne latou a tāgata e tokolua ke fakamolemole atu ki a ia penei: “Fakamolemole, vau aka fakavave ki konei i a matou.” 39  Ne tu a Petelu ki luga, olo ei mo lāua. I tena okoatuga, ne ‵taki atu ne latou a ia ki te potu i luga. Ne fakafetaui atu ki a ia a fāfine katoa ko ‵mate olotou avaga, e ‵tagi mautuutu kae fakaasi atu a gatu i loto mo gatu i tua e uke kolā ne ‵sui ne Tokasi a koi ‵nofo fakatasi a ia mo latou. 40  Ne uga atu ne Petelu a tino katoa ki tua, totuli ifo, kae fai tena ‵talo. Ne ‵fuli atu a ia ki te tino mate, ana muna: “Tapita, tu ki luga!” Ne ‵pula mai ana mata, kae i te laveaga ne ia a Petelu, nofotu aka ei a ia ki luga. 41  Ne ‵fola atu tena lima ki tou fafine, ‵futi aka ne ia ki luga, kae kalaga atu a ia ki tino o te Atua mo fāfine ko ‵mate olotou avaga kae tuku atu ne ia ki a latou me ko ola. 42  Ne salalau atu a te mea tenā i Iopa kātoa, kae e tokouke a tino i ei ne tali‵tonu ki te Aliki. 43  Ne nofo atu a ia i Iopa i nai aso, i a Simona, se tino faite mea ki pakili o manu.

Fakamatalaga mai lalo

 E fakasino atu ki te olaga mo akoakoga faka-Kelisiano.