Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 8:1-40

8  Ne lotomalie a Saulo ke tamate a Setefano. I te aso tenā, ne oko atu ei a fakasauaga e uke ki te fakapotopotoga i Ielusalema. Ne salalau atu a soko katoa ki kogā koga katoa i Iuta mo Samalia kae ‵toe mai fua i ei ko te kau apositolo.  Ne ave ne tāgata kolā e ma‵taku ki te Atua a Setefano o tanu, kae ne ‵tagi fanoa‵noa latou.  A ko Saulo ne kamata o fakasaua malosi atu ki te fakapotopotoga. Ne ulu mālō atu a ia ki fale takitasi, ‵futi mai ki tua a tāgata mo fāfine, kae avatu ne ia o ‵pei ki te falepuipui.  E tiga te feitu tenā, ne olo atu a latou kolā ne salalau valevale i loto i te fenua kātoa o folafola atu te tala ‵lei e uiga ki te muna a te Atua.  Ne fanatu a Filipo, se tokotasi mai i a latou, ki te fa‵kai ko Samalia o talai atu i ei e uiga ki te Keliso.  Ne loto tasi a te vaitino kae ne ‵saga tonu atu ki pati a Filipo i te taimi ne fakalogo‵logo kae onoono atu ei latou ki galuega ‵mana ne fai ne ia.  Me ne tokouke a tino kolā ne ‵nofo i a latou a agaga ma‵sei, a ko agaga ma‵sei konā ne paka‵laga mai i se leo lasi, olo ei ki tua. E se gata i ei, e tokouke foki a tino ‵pili mo tino vae ma‵sei ne faka‵lei aka.  Tela la, ne fia‵fia malosi eiloa a tino o te fa‵kai tenā.  E isi se tagata i te fa‵kai tenā e igoa ki a Simona, telā ne fai sale ana faifaiga faivailakau kae ne ofo i ei a tino Samalia, kae ne fai mai i a ia se tagata sili. 10  A ko tino katoa, e aofia i ei a te ‵toe tino fatauva ke oko ki te ‵toe tino sili, ne ‵saga atu katoa ki a ia kae fai atu, penei: “A te tagata tenei ko te Malosi o te Atua, telā e taku ko te Sili.” 11  Ne ‵saga atu latou ki a ia me ne ofo latou i se taimi tai mata leva i ana poto faivailakau. 12  Kae i te taimi ne tali‵tonu ei latou ki a Filipo, telā ne folafola atu ne ia te tala ‵lei o te Malo o te Atua mo te igoa o Iesu Keliso, ne papatiso ei latou, tāgata mo fāfine. 13  Ne fai foki a Simona mo fai se tino talitonu, kae i tena otiga ne papatiso ne kau atu faeloa a ia ki a Filipo; ne ofo tou tagata i galuega ‵mana kae fakaofoofogia kolā ne lavea ne ia e fai ne Filipo. 14  I te taimi ne ‵logo ei a te kau apositolo i Ielusalema me ko oti ne talia ne tino Samalia te muna a te Atua, uga atu ei ne latou a Petelu mo Ioane ki konā. 15  Ne olo atu a lāua konā o ‵talo ko te mea ke maua ne latou te agaga tapu. 16  Me ne seki ‵ligi ifo a te agaga tapu ki se tino e tokotasi i a latou, kae ne papatiso fua latou i te igoa o te Aliki ko Iesu. 17  Ne olo atu lāua, fakaeke atu lā lima ki luga i a latou, maua ei ne latou te agaga tapu. 18  I te laveaga ne Simona me ne maua te agaga tapu e auala i te fakaekeatuga o lima o apositolo, ne ofo atu ei ne ia a tupe ki a lāua, 19  ana muna: “Tuku mai foki ki a au te ‵mana tenei, ko te mea ke maua ne so se tino telā e fakaeke atu oku lima ki luga i ei a te agaga tapu.” 20  Kae ne fai atu a Petelu ki a ia: “Ke malaia koe fakatasi mo au siliva, me e mafaufau koe i te meaalofa faivasaga a te Atua e maua e auala i tupe. 21  E seai sou vaega io me se tusaga i te mea tenei, me i tou loto e se tonu i te kilokiloga a te Atua. 22  Tela la, ke salamō koe i tau mea masei tenei, kae fakatagi atu ki a Ieova, me kafai e mafai, ko fakamagalo ei a mafaufauga ma‵sei i tou loto, 23  me e lavea ne au i a koe se mea poisini kae se pologa foki ki te amio sē tonu.” 24  Ne tali atu a Simona, penei: “‵Talo atu koulua ki a Ieova mō au ko te mea ke seai se mea i mea kolā ne fai mai ne koulua e tupu ki a au.” 25  I te otiga ne tuku atu ne lāua se molimau maea kae fai‵pati atu te muna a Ieova, ne ‵foki atu lāua ki Ielusalema kae folafola atu te tala ‵lei i fa‵kai e uke o Samalia. 26  Ne faipati atu te agelu a Ieova ki a Filipo, ana muna: “Tu ki luga kae fano ki saute ki te auala telā e fanatu mai i Ielusalema ki Kasa.” (Te auala tenei e tele i loto i te toafa.) 27  Ne tu a ia ki luga kae fano, lavea ei ne ia se eunuka* mai Aitiope, se tagata maluga a te Kanake,* ko te tupu fafine o tino Aitiope, telā e pule i koloa katoa a te tupu. Ne fano a ia ki Ielusalema o tapuaki i ei, 28  kae ko toe foki a ia. Ne sagasaga a ia i luga i tena kaliota kae faitau ki te tusi a te pelofeta ko Isaia. 29  Ne fai atu ei te agaga tapu ki a Filipo: “Fakapilipili atu ki te kaliota tenā.” 30  Ne tele atu a Filipo i tafa o te kaliota kae lagona ne ia me e faitau a tou tagata ki te tusi a te pelofeta ko Isaia, fai atu ei a ia: “E malamalama koe i au mea e faitau?” 31  Ana muna: “E mafai pefea o malamalama au, māfai e seai se tino e fesoasoani mai ki a au?” Fakamolemole atu ei ke sopo aka a Filipo ke saga‵saga lāua. 32  Tenei a te vaega o Tusitusiga Tapu ne faitau ne ia: “E fai a ia e pelā me se mamoe telā ko ave o tamate, e pelā me se tamā mamoe e seai sena leo i mua o te tino ka ‵vele ne ia ana fulufulu, kae se fakamaga foki tena gutu. 33  I te taimi ne fakamasiasi ei a ia ne seki fai se fakamasinoga tonu ki a ia. Ko oi ka taku atu ne ia a fakamatalaga katoa o tena gafa? Me ko ave keatea tena ola mai te lalolagi.” 34  Ne tali atu te eunuka ki a Filipo: “Fakamolemole, Ko oi te tino e fakauiga ki ei a pati a te pelofeta tenei? E fakauiga ki a ia eiloa io me se isi tagata?” 35  Ne faipati atu a Filipo, kae kamata mai te fuaiupu tenei i Tusitusiga Tapu, ne folafola atu ei ne ia ki a ia a te tala ‵lei e uiga ki a Iesu. 36  I te lā auala, ne oko atu ei lāua ki se vai, kae ne fai atu te eunuka: “Kiloke! Tenei te vai; e isi se pogai e se ‵tau ei au o papatiso? 37  * —— 38  Ne fakatonu atu a ia ke fakatu te kaliota, olo ifo ei a Filipo mo te eunuka ki te vai; papatiso ei a ia ne Filipo. 39  I te lā oloakaga mai te vai, ne takitaki fakavave ne te agaga o Ieova a Filipo keatea, kae ne seki toe lavea a ia ne te eunuka; me ne fano eiloa a ia i tena auala mo te fiafia. 40  Ne fano a Filipo ki Asota, kae ne fanatu a ia i loto i te fenua tenā o folafola atu faeloa te tala ‵lei i fa‵kai katoa ke oko eiloa ki Kaisaleia.

Fakamatalaga mai lalo

 Se tofiga maluga.
 Se tofi telā e tuku atu ki tupu fāfine o Aitiope.
 Ke onoono ki te fakamatalaga mai lalo i te Mat 17:21.