Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 7:1-60

7  Kae ne fai atu te faitaulaga sili: “E a, e ‵tonu a mea konei?”  Muna a Setefano: “Taina mo tamana, faka‵logo mai. Ne fakasae atu a te Atua ‵malu ki te ‵tou tupuga ko Apelaamo i te taimi ne nofo ei a ia i Mesopotamia a koi tuai o fano tou tagata o nofo i Halana,  kae fai atu ki a ia, ‘Tiaki tou fenua mo ou kāiga kae fano ki te fenua telā ka fakaasi atu ne au ki a koe.’  Ne tiaki ne ia a te fenua o tino Kaletaia kae fano o nofo i Halana. I te otiga ne mate tena tamana, ne fakatonu atu te Atua ki a ia ke fano o nofo i te fenua tenei ko ‵nofo koutou i ei.  E tiga te feitu tenā, ne seki togi ne ia te fenua tenā mō ia, ke oko eiloa ki se manafa e ‵pau tena lasi mo se alofivae. Ne tauto atu a ia ke tuku atu te fenua mō ia, mo tena fanau, faitalia me seki ai sena tama.  E se gata i ei, ne fai atu te Atua ki a ia me i tena fanau ka ‵nofo e pelā me ne fakaa‵lofa i se fenua fakaa‵tea kae ka fakapologa kae fakapuapuaga latou ne tino i tausaga e 400.  Ne fai mai te Atua, ‘Kae ka fakamasino ne au a te fenua telā e fakapologa ne ia latou, kae kafai e oti a mea konei ka o‵mai latou keatea kae ka tuku mai ne latou ki a au te taviniga tapu i te fenua tenei.’  “Ne tuku atu foki ne ia ki ei a te feagaiga o te pilitome. Fai ei a ia mo fai te tamana o Isaako kae pilitome atu a ia i te valu o aso, a ko Isaako ko te tamana o Iakopo, a ko Iakopo ko te tamana o ulu o kāiga e toko sefululua.  Ne loto ma‵sei a ulu o kāiga konā ki a Iosefa kae fakatau atu ne latou a ia ki Aikupito. Kae ko te Atua ne fakatasi atu eiloa ki a ia, 10  ne fakasao a ia ne te Atua mai i ana puapuaga katoa kae tuku atu ki a ia a uiga ‵gali mo te poto i mua o Falao, te tupu o Aikupito. Kae ne fakasopo a ia ne Falao ke pule atu ki Aikupito mo tena kaukāiga kātoa. 11  Ne oko atu te oge ki Aikupito kātoa mo Kanana, se fakalavelave lasi ‵ki; kae ne seki maua ne ‵tou tupuga ne meakai ma latou. 12  Ne logo a Iakopo me e isi ne meakai i Aikupito, uga atu ei ne ia a ‵tou tupuga ki konā i te taimi muamua. 13  Kae i te lua o taimi ne fakailoa atu ei ne Iosefa a ia ki ana taina; ne iloa foki ei ne Falao a te kāiga o Iosefa. 14  Ne uga atu te fekau a Iosefa ke puke mai a Iakopo tena tamana mo ana kāiga katoa mai te koga tenā, e toko fitusefulu lima te aofaki o latou katoa. 15  Ne fano a Iakopo ki Aikupito. Ne mate atu a ia i ei; e penā foki ‵tou tupuga. 16  Ne ave katoa latou o tanu i Sekema i loto i te tanuga telā ne ‵togi ne Apelaamo ki tupe siliva mai i tama tāgata a Hamola i Sekema. 17  “Ko pilipili eiloa ki te taimi e ‵tau ei o fakataunu te folafolaga a te Atua telā ne fai ki a Apelaamo, ne gasolo aka eiloa o tokouke olotou tino i Aikupito, 18  ke oko ki te taimi ne sopo aka ei se isi tupu i luga i Aikupito, telā ne seki iloa ne ia a Iosefa. 19  Ne fakaaoga ne te tupu tenei a togafiti ma‵sei ki luga i ‵tou tino kae faimalo ne ia a tamana ke tuku tiaki olotou pepe, ko te mea ke ‵mate. 20  I te taimi eiloa tenā ne fanau mai ei a Mose, se tamaliki tinogali kae gali foki i te kilokiloga a te Atua. Ne puti aka a ia i te fale o tena tamana i masina e tolu. 21  Kae i te taimi ne tuku tiaki ei a ia, ne puke a ia ne te tama fafine a Falao kae puti aka e pelā me se tama tonu a ia. 22  Tela la, ne akoako ei a Mose ki poto katoa o tino Aikupito. E tonu, ne ma‵losi ‵ki ana pati mo ana faiga. 23  “I te katoaga o tena fasefulu tausaga, ne mafaufau a ia ke fanatu o āsi ki ana taina, ko tino Isalaelu. 24  I te laveaga ne ia se tagata Aikupito e fakasaua ne ia se tokotasi o latou, ne ‵pulu ne ia te tagata tenā kae tamate ne ia te tagata Aikupito, ke taui ei tena mea ne fai. 25  Ne mafaufau tou tagata me ka malamalama ana taina me ko fakaola latou ne te Atua e auala i a ia, kae ne seki malamalama latou i te mea tenā. 26  I te suā aso, ne maua atu ne ia a tāgata e tokolua e taua, kae ne taumafai a ia o fakafilemu te lā taua, ana muna, ‘Oku tāgata, a koulua e taina. Kaia e taua ei koulua?’ 27  Ne ita atu ki a ia a te tino telā ne fakasaua ne ia tena tuakoi, kae fai atu, ‘Ko oi ne ‵tofi aka ne ia koe mo fai te pule mo te famasino ki luga i a māua? 28  E a, ka tamate foki ne koe au e pelā mo te tamatega ne koe o te tino Aikupito i te aso anafi?’ 29  Ona ko pati konei, ne sola ei a Mose keatea kae nofo e pelā me se tino fakaalofa i te fenua ko Mitiana, telā ne fai ei ana tama tāgata e tokolua. 30  “Kae i te katoaga o tausaga e fasefulu, ne fakasae atu ki a ia se agelu i te koga lavaki i te Mauga o Sinai mai se lakau talatala e ‵ka pelā me se afi. 31  Ne ofo a Mose i te mea ne lavea ne ia. Kae i tena fakapilipiliatuga o onoono faka‵lei ki ei ne lagona atu i ei ne ia a te leo o Ieova, 32  ‘Au ko te Atua o tou tupuga, ko te Atua o Apelaamo, Isaako mo Iakopo.’ Ne polepole a Mose i te mataku kae ne seki toe fia onoono atu ki ei. 33  Ne fai atu a Ieova ki a ia, ‘Tapale ou taka mai ou vae, me i te koga tenā e tu ei koe se laukele tapu. 34  Ko oti ne lavea faka‵lei ne au a faifaiga ma‵sei kae se ‵tonu kolā e fai ki oku tino i Aikupito, ko oti ne lagona ne au olotou ‵tagi fi‵ta kae ka fanaifo au o faka‵sao latou. Kae nei la, vau ke uga ne au koe ki Aikupito.’ 35  A Mose tenei, ko ia telā ne seki talia ne latou i olotou muna penei, ‘Ko oi ne ‵tofi aka ne ia koe ke fai mo pule mo famasino?’ ko te tino eiloa telā ne uga atu ne te Atua ke fai mo pule mo fakaola e auala i te agelu telā ne fakasae atu ki a ia mai te lakau talatala. 36  Ne ‵taki ne te tagata tenei a latou keatea i te otiga ne fai ne ia a mea fakaofoofogina mo fakailoga i Aikupito mo te Tai Kula mo te koga lavaki i tausaga e fasefulu. 37  “A Mose tenei ko ia telā ne fai atu ki tino Isalaelu, ‘Ka fakatu aka ne te Atua se pelofeta mō koutou mai i otou taina e penei mo au.’ 38  Ko ia eiloa tenei ne kau atu ki te fakapotopotoga i te koga lavaki kae ne faipati atu te agelu ki a ia i te Mauga o Sinai, fakatasi mo ‵tou tupuga, kae ne maua ne ia a folafolaga tapu mai te Atua ke tuku atu ki a koutou. 39  Ne seki faka‵logo a ‵tou tupuga ki a ia tenei, kae ne ‵teke atu ki a ia mo olotou loto fia ‵foki ki Aikupito, 40  kae fai atu ki a Alona, ‘Faite aka ne atua mō tatou ke takitaki ne latou a tatou. Me ko se iloa ne tatou te mea ko tupu ki a Mose telā ne ‵taki mai ne ia tatou mai i Aikupito.’ 41  Ne faite ei ne latou se tamā pulumakau i aso konā kae ofo atu a taulaga ki te tupua tenā, kae ne kamata o fia‵fia latou ona ko olotou galuega ne fai. 42  Ne fulitua atu te Atua ki a latou kae tiaki latou ke tapuaki atu ki mea o te lagi, e pelā eiloa mo mea e tusi i tusi a pelofeta, ‘Te kāiga o Isalaelu, e a, e se ko au telā ne ofo mai ne koutou a manu mo taulaga i tausaga e fasefulu i te koga lavaki? 43  Kae ne ave ne koutou a te faleie o Moloka mo te fetu o te atua ko Lefana, kae ne faite ne koutou a fakatusa o mea konā ke tapuaki koutou ki ei. Tela la, ka ave keatea ne au koutou ke ‵mao atu i Papelonia.’ 44  “Ne ‵nofo eiloa mo ‵tou tupuga i te koga lavaki, a te faleie telā e fai pelā me se molimau, e pelā eiloa mo ana fakatonuga ne tuku atu ki a Mose ke faite e ‵tusa mo te ata telā ne lavea ne ia. 45  Ne aumai foki ne Iosua mo ‵tou tupuga fakamuli ifo, a te faleie tenā ki te fenua e ‵nofo i ei a tino o fenua fakaa‵tea, kolā ne afuli keatea ne te Atua mai ‵tou tupuga. Kae ne tuku eiloa i konā ke oko ki aso o Tavita. 46  Ne talia a ia ne te Atua kae fakamolemole atu tou tagata ke maua ne ia te tauliaga ke fakatu ne ia se fale mō te Atua o Iakopo. 47  Kae ne fakatu ne Solomona te fale mō ia. 48  E tiga te feitu tenā, a te Tino Tafasili i te Maluga e se nofo i fale e faite ki lima, e pelā eiloa mo muna a te pelofeta, 49  ‘A te lagi ko toku nofogaaliki, a ko te lalolagi ko te koga e tuku ei oku vae. Se a la te vaegā fale ka faite ne koutou mō oku? ko muna a Ieova. Io me tefea te koga mo oku malōlō? 50  E a, e seki faite ne au a mea katoa konei ki oku lima?’ 51  “A koutou ne tino loto ma‵keke kae e faka‵tuli otou taliga,* e ‵teke faeloa ne koutou te agaga tapu, e pelā mo te mea ne fai ne otou tupuga, kae ko fai foki koutou penā. 52  Ko oi te pelofeta ne seki fakasaua ne otou tupuga? E tonu, ne tamate ne latou a tino kolā ko leva ne folafola mai ne latou a te oko mai o te Tino amiotonu, telā ne fakatogafiti kae tamate foki ne koutou, 53  ko koutou kolā ne maua ne koutou a te Tulafono e auala i agelu kae ne seki tausi ne koutou.” 54  I te lagonaga ne latou a mea konei ne u olotou nifo i te kaitaua ki a ia. 55  Ne ‵fonu a Setefano i te agaga tapu. Ne kilo aka tou tagata ki te lagi kae lavea ne ia a te ‵malu o te Atua, mo Iesu e tu i te feitu fakaatamai o te Atua, 56  kae fai atu: “Kiloke! ko lavea ne au te lagi e matala mo te Tama a te tagata e tu i te feitu fakaatamai o te Atua.” 57  Ona ko te mea tenei, ne paka‵laga latou ki luga, ne ‵pono olotou taliga ki olotou lima kae ‵tele fakatasi atu ki a ia. 58  Kae i te otiga ne ‵tuli ne latou a ia ki tua mo te fa‵kai, peipei ei ne latou a ia ki fatu. Kae ne tuku atu ne molimau konā a olotou gatu ki vae o te tamataene ko Saulo. 59  Kae koi peipei a Setefano ki fatu ne fakamolemole atu a ia, ana muna: “Te Aliki ko Iesu, ke talia ne koe toku agaga.” 60  Ne totuli ifo a ia kae pakalaga atu i se leo lasi: “Ieova, sa taui atu ne koe te agasala tenei ki a latou.” I te otiga o ana pati konei, mate* ei a ia.

Fakamatalaga mai lalo

 Io me “e seki pilitome i otou loto mo taliga.”
 I te ‵gana Eleni, “ko moe atu a ia (i te mate).”