Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 4:1-37

4  A koi fai‵pati atu a Petelu mo Ioane ki tino konā kae oko mai a faitaulaga pule, te takitaki pule o te faletapu, mo Satukaio ki a lāua.  Ko oko eiloa i te lotou ita me ne akoako ne lāua a tino kae fakaasi manino atu ne lāua a te toetu o Iesu mai te mate.  Ne puke ne latou a lāua kae ‵loka atu i te falepuipui ke oko ki te suā aso i te mea ko afiafi po.  Kae ne tali‵tonu a tino e tokouke kolā ne fakalogo‵logo ki te lāuga, kae kāti e ‵tusa mo te toko 5,000 tāgata i konā.  I te suā aso ne maopoopo mai ei olotou takitaki, toeaina, mo failautusi i Ielusalema.  (Ne ‵nofo foki i konā a Anasa te faitaulaga sili, Kaiafa, Ioane, Alesana, mo nisi kāiga e tokouke o te faitaulaga sili.)  Kae ne faka‵tu ne latou a lāua i olotou mua kae fesili atu, penei: “I o oi te ‵mana io me i o oi te igoa ne fai ei ne koulua a te mea tenei?”  Ne fai atu ei a Petelu, telā ko ‵fonu i te agaga tapu, ki a latou: “Takitaki o tino mo toeaina,  kafai ko fakamasino aka a māua i te aso tenei, ona ko te faiga o se mea ‵lei ki se tagata masaki, kae e fia iloa ne koutou me ko oi ne faka‵lei ne ia te tagata tenei, 10  fai ke na iloa aka ne koutou katoa e pelā foki mo tino Isalaelu, me i te igoa o Iesu Keliso te Nasaleta, telā ne ‵tuki ne koutou ki te lakau kae telā ne toe fakatu aka ne te Atua mai te mate, ko ia tenā ne ‵lei ei te tagata tenā e tu atu i otou mua. 11  Tenei a ‘te fatu telā ne fakaseaoga ne koutou e tufuga fai fale kae ko oti ne fai mo fai te fatu tulimanu tafasili i te aoga.’ 12  E se gata i ei, e seai se fakaolataga e maua i se isi tino, me e seai aka foki se igoa mai lalo i te lagi ne tuku mai ki tino ke mafai o ‵sao ei tatou.” 13  I te laveaga ne latou a te loto ‵toa o Petelu mo Ioane i lā pati, kae iloa foki ne latou me i a lāua ne tino e seki a‵koga faka‵lei kae ne tino fatauva foki, ne ofo eiloa latou. Ne kamata foki o iloa ne latou me ne ‵nofo sale a lāua mo Iesu. 14  Ne kilo‵kilo atu latou ki te tagata telā ne faka‵lei e ‵tu mai mo lāua, kae ne seki ai eiloa ne olotou pati ne mafai o fai atu. 15  Ne fakatonu atu latou ki a lāua ke olo ki tua mo te fale fono o te Sanetulini, kae ne fai‵pati ei latou, 16  olotou muna: “Ne a ‵tou mea ka fai ki tāgata konei? Me ko oti ne fai ne lāua se galuega ‵mana mautinoa, se mea telā ko iloa ne tino katoa o Ielusalema, kae e se mafai o fakafiti ne tatou. 17  E tiga te feitu tenā, ko te mea ke se toe salalau atu ki tua i tino a te tala tenei, ka fakamatakutaku ne tatou a lāua ke se toe fai‵pati lele eiloa ki te igoa tenei ki so se tino.” 18  Ne toe ‵kami mai ne latou a lāua kae fakatonu atu ke mo a eiloa e toe fai‵pati io me akoako atu lāua i te igoa o Iesu. 19  Kae ne tali atu a Petelu mo Ioane ki a latou: “Kafai e tonu i te kilokiloga a te Atua ke faka‵logo māua ki a koutou i lō te Atua, fakamasino aka eiloa ne koutou. 20  Kae e pelā mo māua, e se mafai eiloa o fakagata te mā fai‵pati ki mea ko oti ne lavea kae lagona ne māua.” 21  Tela la, i te otiga ne toe fakamatakutaku atu ki a lāua, fakasaoloto atu ei lāua, me e seai se pogai ne maua ne latou ke fakasala ei lāua. Ne fai te mea tenā ona ko tino, me ne tavae atu latou katoa ki te Atua ona ko te mea telā ne tupu. 22  Me i te tagata telā ne faka‵lei fakavavega aka tena masaki ko silia atu i te fasefulu tausaga tena matua. 23  I te otiga ne fakasaoloto a lāua, olo atu ei ki olotou tino kae fakaasi atu ki a latou a pati a faitaulaga pule mo toeaina kolā ne fai atu ki a lāua. 24  I te lagonaga ne latou a te mea tenei, ne ‵talo fakatasi ei latou ki te Atua, olotou muna: “Te Aliki Sili, ko koe telā ne faite ne koe te lagi, te lalolagi, te tai mo mea katoa i ei, 25  kae e auala i te agaga tapu ne faipati mai ei koe ki te motou tupuga ko Tavita, tau tavini, ‘Kaia e manava‵se ei a atufenua kae mafaufau ‵mafa a tino ki mea e seai ne olotou aoga? 26  E ‵tu atu a tupu o te lalolagi i olotou tulaga kae e ‵kau fakatasi a pule o taua atu ki a Ieova mo tena tino fakaekegina.’ 27  E ‵tusa mo te mea tenā, ne ‵kau fakatasi a Helota mo Ponitio Pilato mo tino o fenua fakaa‵tea mo tino Isalaelu i te fa‵kai tenei o taua atu ki tau tavini tapu, ko Iesu, telā ne fakaeke ne koe, 28  ko te mea ke fai a mea kolā ko leva ne fuafua ne koe i tou ‵mana mo tou loto. 29  Kae nei la, e Ieova, saga atu ki olotou pati fakamataku‵taku, kae talia mai au tavini ke fai‵pati atu faeloa ne latou tau muna mo te loto ‵toa, 30  kae ke ‵fola mai faeloa tou lima o faka‵lei aka a masaki kae fai foki a galuega ‵mana mo mea fakaofoofogina e auala i te igoa o tau tavini tapu, ko Iesu.” 31  I te otiga o te lotou ‵talo, ne galulu te koga telā ne maopoopo ei latou; kae ne ‵fonu katoa latou i te agaga tapu kae fai‵pati atu ne latou te muna a te Atua mo te loto ‵toa. 32  E se gata i ei, ne loto tasi a tino e tokouke kolā ne tali‵tonu, kae e seai eiloa se tino ne fai mai pelā me i ana mea totino i a ia eiloa. Ne fakaaoga fakatasi ne latou a olotou mea katoa. 33  Ne tumau foki te kau apositolo i te molimau atu mo te ‵mana lasi, e uiga ki te toetu o te Aliki ko Iesu; kae ne maua ne latou katoa a te lasi o te alofa tauanoa o te Atua. 34  E tonu, e seai eiloa se tino i a latou ne mativa i se mea; me ne fakatau atu ne tino katoa kolā e isi ne olotou manafa mo fale a mea konā kae aumai a ‵togi o mea kolā ne fakatau atu 35  kae ne tuku atu ki mua o te kau apositolo. Ko tufa atu ei a mea konā ki tino taki tokotasi e ‵tusa mo olotou manakoga totino. 36  Tela la, a Iosefa, telā ne fakaigoa ne te kau apositolo ki a Panapa, ko tena uiga ko te Tama o Fakamafanafanaga, se tino Levi mai Kupelu, 37  e isi sena manafa. Ne fakatau atu ne ia te manafa tenā kae tuku atu a tupe ki mua o te kau apositolo.

Fakamatalaga mai lalo