Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 28:1-31

28  I te motou okoatuga mo te manuia ki uta i te fenua, ne iloa aka ei ne matou i te fenua tenā ko Melita.  Ne atafai malosi mai ki a matou a tino o te fenua kolā e fai‵pati ki se ‵gana fakaatea. Ne faka‵ka ne latou se afi kae tali faka‵lei ne latou a matou katoa ona ko te vaiua kae ko ‵moko foki.  I te taimi ne fakaputuputu ei ne Paulo ne fafie kae tuku atu ki te afi, ne vau ki tua se gata ona ko te ‵vela o te afi kae ‵piki ‵mau ki tena lima.  I te laveaga ne tino e fai‵pati ki se ‵gana fakaatea a te gata ‵poisini e tautau ifo mai tena lima, ne fai aka ei olotou pati i a latou eiloa: “A te tagata tenei se tino tatino, me e tiga eiloa ne sao mai a ia mai te tai, ka se ola eiloa a ia me tenei eiloa tena fakasalaga.”  Kae ne lu keatea ne Paulo a te gata ‵poisini ki loto i te afi kae e seki logo‵mae a ia i ei.  Ne faka‵tali latou ke fula‵fula tena foitino io me e mate fakavave tou tagata. Ko tai mata leva eiloa te lotou faka‵taliga kae lavea ne latou me e seai eiloa se mea ne tupu ki a ia, ‵fuli ei olotou manatu kae fai atu i a ia se atua.  E pili atu ki te koga tenā ko manafa o te pule o te fenua e igoa ki a Popilio, kae ne talimalo ‵lei ne ia matou i aso e tolu.  Kae ko te tamana o Popilio e poko ne te fiva kae sanatoto. Ne fanatu a Paulo ki loto i ei o ‵talo, fakaeke atu ana lima ki luga i ei kae ne ‵lei ei a ia.  I te otiga o te mea tenei, ne olo atu foki a tino katoa o te fenua kolā e ma‵saki ki a ia kae ne faka‵lei katoa latou. 10  Kae ne tuku mai foki ne latou a meaalofa e uke, kae i te taimi ka fo‵lau ei matou, ne fakauta ne latou te vaka ki mea e uke mō matou. 11  I te tolu o masina mai tua ifo i ei, ne fo‵lau atu matou i se vaka telā e isi se fakamailoga i ei penei “Fanau a Seu.” Ne vau te vaka tenā mai Alesania, kae ne fakalafi i te fenua tenā i te taimi o te ‵tau ‵moko. 12  Ne oko atu matou ki te taulaga i Silakusa kae ‵nofo i konā i aso e tolu, 13  kae mai konā ne oko atu matou ki Lekiuma. I te aso mai tua ifo i ei, ne agi mai te matagi mai saute, oko atu ei matou ki Puteoli i te suā aso. 14  E isi ne taina ne fetaui matou i konā kae fakamolemole mai ke ‵nofo matou i aso e fitu; i te motou auala o olo atu ki Loma. 15  Ne ‵logo a taina i a matou ko ‵nofo i konā, ne o‵mai ei latou o fakafetaui ki a matou i te Maketi o Apiasi mo Fale Talimalo e Tolu. I te laveaga ne Paulo a latou, ne siki tena fakafetai ki te Atua, malosi ei tena loto. 16  I te motou okoatuga ki Loma, ne talia ei ke nofo a Paulo i a ia eiloa kae leoleo ne se sotia. 17  I te tolu o aso mai tua ifo i ei, ne ‵kami mai ne ia a takitaki o tino Iutaia. I te lotou maopoopomaiga, ne fai atu a ia ki a latou: “Oku taina, e tiga eiloa e seai saku mea ‵se ne fai ki tino, io me soli ne au a tuu mo aganuu a ‵tou tupuga, ko oti ne fai au e pelā me se pagota mai i Ielusalema ke tuku atu ki lima o te kau Loma. 18  I te otiga ne iloilo ne latou au, ne ma‵nako ei latou o fakasaoloto au me e seai se pogai e ‵tau ei au o mate. 19  Kae ona ko te ‵teke atu faeloa o tino Iutaia ki te mea tenei, ne faimalogina ei au ke toe tagi ki a Kaisala, e se ona ko te mea e isi se mea e fia ‵losi atu ne au ki toku fenua. 20  Tela la, ona ko te mea tenei ne fakatagi atu ei au ke fetaui kae ke faipati atu au ki a koutou, me ko saisai au ki filifili ona ko te mea telā e fakamoemoe ki ei a Isalaelu.” 21  Ne fai atu latou ki a ia: “E seai ne tusi ne maua ne matou mai i Iuta e uiga ki a koe, e seai foki se taina ne vau mai i konā kae fai mai ne ia se tala masei e uiga ki a koe. 22  Kae e mafau‵fau matou me se mea ‵lei ke fakalogo‵logo matou ki ou manatu, me e iloa ne matou i te potukau fakalotu tenei e fakamaseigina faeloa i koga katoa. 23  Ne fakatoka ne latou se aso mō ia, kae ne olo atu a tino e tokouke ki a ia i te koga e nofo i ei. Ne fakamatala atu ne ia te mea tenā ki a latou mai te molimau katoatoa atu e uiga ki te Malo o te Atua. Mai te taeao ke oko ki te po ne fai ana fakamatalaga ke fakatalitonu atu ki a latou e uiga ki a Iesu, mai te tulafono a Mose mo tusi a te kau Pelofeta. 24  Ne kamata o tali‵tonu a nisi tino ki ana pati kae ko nisi tino ne seki tali‵tonu. 25  Ona ko te kese‵kese o olotou manatu, ne kamata ei o olo latou, kae ne fai atu ne Paulo a te manatu e tasi tenei: “Ne faipati ‵tonu atu te agaga tapu ki otou tupuga e auala i te pelofeta ko Isaia, 26  ana muna, ‘Fano ki tino konei kae fai atu: “Ka lagona ne koutou kae ka se malama‵lama koutou; kae ka ‵kilo atu koutou kae ka se lavea ne koutou. 27  Me i tino konei e loto ma‵keke, ko oti ne lagona ne latou ki olotou taliga kae se fia ‵saga atu ki ei, ko ‵moe foki olotou mata ko te mea ke se lavea eiloa ne latou ki olotou mata, ke lagona ki olotou taliga kae ke malamalama olotou loto ko ‵fuli mai ei, ke faka‵lei ne au latou.”’ 28  Tela la, fai ke na iloa ne koutou me ko oti ne folafola atu ki fenua fakaa‵tea a te auala e faka‵sao ei ne te Atua a tino; kae ka faka‵logo eiloa latou ki ei.” 29*  —— 30  Ne nofo a ia i tena fale ‵togi i tausaga e lua, kae talimalo faka‵lei atu a ia ki tino katoa kolā ne āsi atu ki a ia, 31  kae talai atu te Malo o te Atua ki a latou kae akoako atu a mea e uiga ki te Aliki ko Iesu Keliso mo te saolotoga lasi ‵ki, kae seai foki se mea e fakalavelave atu ki a ia.

Fakamatalaga mai lalo

 Ke onoono ki te fakamatalaga mai lalo i te Mat 17:21.