Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 27:1-44

27  Ona ko te mea ko oti ne fakaiku aka ke fo‵lau atu matou ki Italia, ne tuku atu ei ne latou a Paulo mo nisi pagota ki te ofisa o te kautau e igoa ki a Iulio mai te potukau o te kautau a Aokuso.  Ne ‵sopo matou ki se vaka mai Atamutiu telā ko pili o ‵tala ki kogā koga e tu ki te tafatai o te atufenua o Asia, fo‵lau atu ei matou; kae ne olo fakatasi matou mo Alitako, se tino Maketonia mai i Tesalonia.  Ne oko atu matou ki Saitonu i te suā aso, kae ne atafai eiloa a Iulio ki a Paulo kae talia ne ia ke fano ki ana taugasoa ko te mea ke fia‵fia fakatasi latou.  Ne tiakina ne matou te koga tenā kae fakatafatafa atu i te feitu ki lalo o Kupelu me i te matagi ko ‵pono tonu mai i omotou mua.  Ne tele atu te motou vaka i te tai o Kilikia mo Pafulia kae ne tau matou i te taulaga i Mula i Lukia.  Kae ne maua ne te ofisa o te kautau i konā me e isi se vaka mai i Alesania telā ka ‵tala atu ki Italia, kae fai mai ke ‵sopo matou i ei.  Ne teletele malie fua te motou vaka i aso e tai uke kae ne faigata ke oko atu matou ki Nitoi me i te matagi ko tu ‵tonu mai eiloa i omotou mua. Fakatafatafa atu ei matou i te feitu ki lalo o Keleta i Salamone.  Ne tele fakapilipili atu matou ki uta i te fenua mo te faigata kae oko atu ki te koga e igoa ki te Taulaga Malu, i tafa o te fa‵kai ko Lasea.  Ne ‵teka atu a aso e uke kae ko faigata foki te folau ona ko te mea ko ‵seke foki te taimi e fakaliki‵liki ei i te aso o te faka‵maga, ne fai atu ei te manatu o Paulo, 10  ana muna ki a latou: “Oku tāgata, e iloa ne au me ka lasi ‵ki te fakamaseiga i te malaga tenei, e se gata fua ki kako mo te vaka kae e pelā foki mo ‵tou ola.” 11  E ui i ei, ne fakalogo eiloa te ofisa o te kautau ki te kapeni mo te tino i o ia te vaka i lō pati a Paulo. 12  Ona ko te sē ‵lei o te taulaga tenā i te taimi o te ‵tau ‵moko ne fai ei te tokoukega o latou ke ‵tala te vaka ko te mea ke oko atu latou ki Foinia i te taimi o te ‵tau ‵moko, se taulaga i Keleta telā e fakasaga atu tena feitu e tasi ki mātū saegala kae tasi ki saute saegala. 13  E se gata i ei, i te taimi ne agi malielie ei te matagi mai saute, ne mafau‵fau latou me ka fakataunu eiloa te lotou fakamoemoega. Ne ‵futi aka te lotou taula kae tele fakatafatafa atu latou i gatai o Keleta. 14  Ne seki leva kae poko mo te kaumatagi e igoa ki a Eulokuto* ki te lotou vaka. 15  Ne peipei valevale te vaka ne te matagi kae ko se mafai o saga tena taumua ki te matagi, telā fakatapea ei te vaka kae tuku ke ave ne te matagi. 16  Ne tele atu matou i gatai o te tamā fenua e igoa ki a Kauta o fakamalu i ei, kae ne faigata o īvi aka ne matou a te tamā poti i te taumuli o te vaka. 17  Kae i te otiga ne īvi aka ki luga ne saisai ei ne latou ke ‵mau ki lalo a te poti; kae ona ko te lotou ma‵taku i te mea ma kasa te vaka i te afua ko Silitusi, ne tuku ifo ne latou a lopu mo nisi mea faigaluega, tuku ei ke tapea te vaka. 18  E tiga te feitu tenā, ona ko te peipei valevale o te vaka ne te kaumatagi, ne laku ei ne latou a mea ki te tai ke tai māmā aka te vaka. 19  Kae i te tolu o aso, ne ‵pei ne latou a nisi lopu o te vaka ki te tai. 20  Ne seki ‵kasa te la kae seki ‵pula mai a fetu i aso e uke. Ne agi malosi foki te matagi, kae ko seai eiloa se motou fakamoemoega ke ‵sao matou. 21  Ko leva foki aso ne seki toe ‵kai matou, kae ne tu aka a Paulo i mua o latou kae fai atu, penei: “Oku tāgata, ne ‵tau o talia ne koutou toku manatu ke se tiakina ne tatou a Keleta, penei e seai se mea e fakamasei io me māumāu. 22  E tiga te feitu tenā, au e fai atu ke fia‵fia koutou, me e seai se tino i a koutou ka mate, ko te vaka fua ka fakamaseigina. 23  Me ne tu mai i oku tafa i te po a te agelu a te Atua telā e tapuaki au ki ei kae e tavini foki au ki ei, 24  kae fai mai, ‘Sa mataku e Paulo. E ‵tau o tu atu koe i mua o Kaisala, kae kiloke! ko tuku atu foki ne te Atua ki a koe a tino katoa kolā e fo‵lau fakatasi mo koe.’ 25  Tela la, ke fia‵fia e oku tāgata; me i a au e talitonu ki te Atua, me ka fakataunu eiloa ne ia a te mea telā ko oti ne fai mai ki a au. 26  Kae e ‵tau eiloa o ake aka tatou ki se fenua.” 27  Ko te sefulufa o po, kae ne peipei valevale te motou vaka i te tai o Atelia, kae i te valuapo ne kamata o iloa ne kauvaka me ko pili latou ki se fenua. 28  Ne fua ne latou te ‵poko kae maua aka ne latou e luasefulu gafa;* ne tai momea atu latou kae toe fua foki ne latou te ‵poko kae maua aka me ko sefululima gafa. 29  Kae ona ko te motou ma‵taku i te vaka ma peipei ki luga i kaupapa, ne ‵pei ifo ei ne latou a taula e fa i te taumuli o te vaka, kae olioli ke na ao. 30  Kae i te taimi ne taumafai ei a kauvaka ke ‵tele latou keatea mai te vaka, ne tuku ifo ne latou te poti o te vaka ke fai aka pelā i a latou e olo o ‵pei ifo a taula i te taumua, 31  ne fai atu ei a Paulo ki te ofisa o te kautau mo sotia: “E se mafai koutou o ‵sao seiloga ke ‵nofo a tāgata konei i luga i te vaka.” 32  Ne ‵kati ne sotia a lopu o te tamā poti kae tiaki atu ke tapea. 33  Ko pili o ao kae ne kamata o fakamalosi atu a Paulo ki tino katoa ke ‵kai, ana muna: “A te aso tenei ko te sefulufa o aso ne ‵nofo fakatali‵tali ei koutou kae seki ‵kai eiloa. 34  Tela la, e fakamalosi atu au ke ‵kai koutou, me e tāua te mea tenei mō te otou ‵lei; me ka seai eiloa se laulu e tasi i otou ulu ka tō keatea.” 35  I te otiga o ana pati konā, ne puke foki a ia ki se falaoa, fai te fakafetai ki te Atua i mua o latou katoa, tofitofi kae kamata o ‵kai. 36  Ne fia‵fia katoa latou kae kamata o ‵kai. 37  E ‵tusa mo te toko 276 a matou katoa i luga i te vaka. 38  I te taimi ne ma‵kona ei latou, ne laku ne latou a saito ki te tai ke tai māmā aka te vaka. 39  I te aoakega, ne seki iloa ne latou te igoa o te fenua tenā kae ne lavea ne latou a te maofega o te fenua mo tena kauone, kae ne taumafai malosi latou ke fakakasa aka te vaka ki uta. 40  Tela la, ne ‵kati ne latou a taula ke ‵to ki te tai, ne ‵tala ne latou a lopu ne ‵sai ei a foe, kae i te otiga ne sisi ne latou a te la ko te mea ke agi ne te matagi, ne tele atu ei latou ki te kauone. 41  Ne tele ‵tonu atu te vaka ki te kauone, kasa ei tena taumua ko te mea eiloa ko se gasue, kae ne kamata o malepelepe tena taumuli. 42  Ne taumafai a sotia o tamate a pagota ko te mea ke seai se tino i a latou e ‵kau keatea ke sao a ia. 43  Kae ne manako te ofisa o te kautau ke fakasao ne ia a Paulo, taofi ei ne ia ke mo a e fai ne latou a te mea nei. Ne fakatonu atu a ia ki tino kolā e mafai ne latou o ‵kau ke eva ki lalo i te tai kae ke ‵kau muamua atu ki uta i te fenua, 44  a ko te ‵toega o tino ne ‵piki ki laupapa mo nisi mea o te vaka kae ‵kau atu ki uta. Tela la, ne ‵sao eiloa a latou katoa ki uta i te fenua.

Fakamatalaga mai lalo

 Se matagi e agi mai i te feitu ki mātū saegala.
 A te gafa e tasi e ‵pau tena loa mo te 1.8 mita; 6 futu.