Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 22:1-30

22  “Oku taina mo oku tamana, fakalogo‵logo mai ke fakamatala atu ne au a te mea telā ne tupu.”  (I te lagonaga ne latou i te tagata tenei e faipati atu ki a latou i te ‵gana Epelu, ne se logoa eiloa latou, fai atu ei a ia:)  “Au se tino Iutaia telā ne fanau i Taso i Kilikia, kae ne akoga au i te fa‵kai tenei mai lalo i a Kamalielu. Ne akoakogina au ke tausi faka‵lei ki te Tulafono a ‵tou tupuga, kae e loto finafinau eiloa au ki te Atua e pelā eiloa mo koutou katoa i te aso tenei.  Ne fakasaua ne au a tino kolā e ‵kau ki te Ala o te Aliki ke oko eiloa ki te mate. Ne saisai ne au a tāgata mo fāfine kae ‵pei atu ki falepuipui,  e pelā eiloa mo te mea e molimau ki ei a te faitaulaga sili mo te kau toeaina. Ne maua foki ne au ne tusi fakamaoni mai i a latou ki taina i Tamaseko, kae ne fanatu au o saisai ke aumai a latou konā ki Ielusalema ke fakasala latou i ei.  “I taku fanatuga kae ko pili atu au ki Tamaseko, kāti ko te fakatutonu, ne sulu fakavave mai se mainaga mai te lagi ki a au.  Ne siga au ki lalo kae ne lagona ne au se leo e fai mai ki a au, ‘Saulo, Saulo, kaia e fakasaua ei ne koe au?’  Ne tali atu au, ‘Ko oi koe, e te Aliki?’ Kae ne fai mai a ia ki a au, ‘Ko au ko Iesu te Nasaleta, telā e fakasaua ne koe.’  Ne lavea ne tāgata kolā ne olo fakatasi matou a te mainaga, kae ne seki lagona* ne latou a te leo o te tino telā ne faipati mai ki a au. 10  Fai atu ei au, ‘Se a te mea e ‵tau o fai ne au, e te Aliki?’ Muna a te Aliki ki a au, ‘Tu ki luga, fano ki Tamaseko, kae ka fakailoa atu ki a koe i konā a mea katoa kolā ko oti ne fakatoka ke fai ne koe.’ 11  Kae ona ko te mea e seai se mea ne lavea ne au ona ko te malosi o te mainaga, ne ‵taki atu ei au ki Tamaseko ne latou kolā ne olo matou. 12  “E isi se tagata e igoa ki a Anania, se tagata e mataku ki te Atua kae tausi ki te Tulafono, kae e tavae a ia ne tino Iutaia katoa i konā. 13  Ne vau a ia ki a au, tu i oku tafa kae fai mai, penei, ‘Saulo, toku taina, ke toe ‵pula ou mata!’ I te taimi eiloa tenā ne kilo aka ei au ki luga, lavea ei ne au a ia. 14  Ne fai mai a ia: ‘Ko oti koe ne filifili ne te Atua o ‵tou tupuga ko te mea ke iloa ne koe a tena loto; ke lavea ne koe a Ia telā e amiotonu, kae ke lagona foki ne koe a tena leo, 15  me ka fai koe mo fai se molimau a ia ki tino katoa e uiga ki mea kolā ko oti ne lavea kae lagona ne koe. 16  Tela la, kaia e faka‵tali ei koe? Tu ki luga, papatiso, kae faka‵ma au agasala mai te kalaga atu ki tena igoa.’ 17  “I te taimi ne foki mai ei au ki Ielusalema kae ‵talo i te faletapu, ne oko mai ki a au se fakaasiga 18  kae ne lavea ne au a ia e fai mai penei ki a au, ‘Fakavave kae fano keatea mai i Ielusalema, me ka se talia ne latou tau molimau e uiga ki a au.’ 19  Kae ne fai atu au, ‘Te Aliki, e iloa faka‵lei ne latou me ne ‵pei sāle ne au ki falepuipui kae ‵kini foki ne au a tino kolā e tali‵tonu ki a koe mai te sunako e tasi ki te suā sunako. 20  Kae i te taimi ne ma‵ligi ei a toto o tau molimau ko Setefano, ne tu atu eiloa au i konā kae lotomalie foki au ki te mea tenā. Ne tausi ne au a gatu o latou kolā ne tamate ne latou a ia.’ 21  Kae ne fai mai a ia ki a au, ‘Fano koe, me ka uga atu ne au a koe ki fenua ‵mao ‵ki.’” 22  Ne fakalogo‵logo eiloa a latou ki a ia ke oko ki ana pati konā. Ne ka‵laga atu ei latou kae fai atu, penei: “Tamate atu te tagata tenei, me e se ‵tau o ola a ia!” 23  Ona ko te mea ko paka‵laga a tino kae fakatau peipei valevale olotou gatu kae asu atu a ‵pefu ki te ea, 24  fakatonu atu ei te takitaki kautau ke ave a ia ki loto i te koga e ‵nofo ei a sotia, ke fakamasino aka a ia mai te faiga o fakasauaga, ko te mea ke iloa faka‵lei ne ia a te pogai e paka‵laga ei penei a tino ki a ia. 25  Kae i te taimi ne saisai ei ne latou a ia ko te mea ke ‵kini, ne fai atu a Paulo ki te ofisa o te kautau telā e tu i konā: “E a, e saoloto i te tulafono ke ‵kini ne koutou se tagata Loma kae e seai se mea e ‵tau o sala i ei a ia?” 26  I te lagonaga ne te ofisa o te kautau a te mea tenei, fano ei a ia ki te takitaki kautau o fakailoa atu ki a ia, ana muna: “Se a te mea e taumafai koe o fai? A te tagata tenei se tino Loma.” 27  Ne fanatu te takitaki kautau kae fai atu ki a ia: “Fai mai ki a au, A koe se tino Loma?” Ana muna: “Ao.” 28  Ne tali atu a te takitaki kautau: “Ne ‵togi ne au se aofaki o tupe e uke ko te mea ke fai au mo fai se tino Loma.” Ne fai atu a Paulo: “A ko au ne fanau mai eiloa i ei.” 29  I konā loa ne olo fakavave keatea a tino kolā ka fakamasino ne latou a ia e auala i fakasauaga; kae ne mataku a te takitaki kautau i te iloaga ne ia i a Paulo se tino Loma me ko oti ne saisai ne ia a ia ki seni. 30  I te suā aso, ona ko te fia iloa ne ia te pogai ne ‵losi atu ei a tino Iutaia ki a ia, ne ‵tala ne ia a Paulo kae fakatonu atu ki faitaulaga pule mo sui katoa o te Sanetulini ke maopoopo mai. Ne ave ifo ne ia a Paulo ki lalo kae fakatu atu i olotou mua.

Fakamatalaga mai lalo

 Ne lagona ne latou kae ne seki malamalama i ei.