Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 20:1-38

20  I te ‵nogaifoga o te fakalavelave tenā, ne uga atu ei te fekau a Paulo ke o‵mai te kau soko, kae i te otiga ne fakamalosi kae fakatofa atu ki a latou, ne faimalaga atu ei a ia ki Maketonia.  Ne fanatu a ia ki nisi fenua i konā kae fakamalosi atu a taina i ei, fano ei a ia ki Eleni.  Ne nofo a ia i konā i se tolu masina, kae ona ko te togafiti masei a te kau Iutaia ka fai ki a ia i te taimi ne fakatoka ei a ia o folau ki Sulia, ne fakaiku aka ei ne ia ke ui atu a ia i Maketonia i tena auala o foki.  Ne olo fakatasi atu latou mo Sopata te tama tagata a Pilasi mai Pelea, Alitako, Sekuno mai Tesalonia, Kaio mai Teipe, Timoteo, mo Tukasi mo Tofimo mai te atufenua o Asia.  Ne ‵mua atu a latou konei kae faka‵tali mai ki a matou i Teloa.  I te otiga o aso fakamanatu o falaoa sē faka‵fete, ne fo‵lau atu matou i te vasa mai Filipi, kae oko atu ki a latou i Teloa mai tua o aso e lima. Ne ‵nofo ei matou i konā i aso e fitu.  I te aso muamua o te vaiaso, i te taimi ka ‵kai ei matou, ne lāuga atu a Paulo ki a latou, me i a ia ka fano i te suā aso; kae ne fai tena lāuga ke oko eiloa ki te valuapo.  E uke a moli i te potu i luga telā ne maopoopo ei matou.  E isi se tamataene e igoa ki a Eutikasi ne sagasaga i te famalama kae ne to tena moe i te taimi koi faipati ei a Paulo, ko te mea eiloa ko tō ifo ki lalo mai te tolu o fogafale, kae puke aka ne latou me ko mate. 10  Ne fanaifo a Paulo ki lalo, takato mai luga i tou tagata, ‵sai atu ki a ia kae fai atu, penei: “Sa fakalogoa me ko toe ola a ia.” 11  Ne toe foki aka a ia ki luga, ne tofitofi ne ia te falaoa kae kai. Ne sau‵tala a ia mo nisi tino i se taimi tai mata leva ke oko eiloa ki te vaveao, fano ei a ia. 12  Ne puke ne latou te tamataene telā ko toe ola mai kae ne maua ne latou mai i ei a fakamafanafanaga e uke. 13  Ne olo ‵tonu atu matou ki te vaka kae fo‵lau atu ki Aso, ko te koga telā ka puke i ei ne matou a Paulo, me ne fakatonu mai ke fetaui matou i konā, i a ia ne manako o sasale ki ei. 14  I tena okomaiga ki Aso, ne puke ne matou a ia kae fo‵lau atu ki Metulene. 15  Ne fo‵lau atu matou i te suā aso kae oko atu ki te fenua i te suā feitu o Kiosa, i te aso mai tua ifo ne afe matou i Samosi, kae i te suā aso ne oko atu matou ki Mileto. 16  Ko oti ne fakaiku aka ne Paulo ke se afe atu matou ki Efeso ko te mea ke se fakamāumāu ne ia se taimi i te atufenua o Asia; me ne fakava‵vave ke oko atu a ia ki Ielusalema i te aso o te fakamanatuga o te Penitekoso māfai e mafai. 17  Kae ne uga atu tena fekau mai Mileto ke olo atu ki a ia a toeaina mai te fakapotopotoga i Efeso. 18  I te lotou okoatuga ki a ia, fai atu ei a ia ki a latou: “E iloa ‵lei ne koutou me talu mai te taimi ne ‵laka atu ei oku vae ki te atufenua o Asia, ne fakatasi faeloa au mo koutou i taimi katoa, 19  o galue e pelā me se pologa ki te Aliki mo te loto maulalo mo loimata mo tofotofoga kolā ne oko mai ki a au ona ko togafiti a tino Iutaia. 20  Ne seki taofi ne au mai i a koutou so se mea telā e aoga ki a koutou, kae ne akoako ne au koutou i mua o tino e tokouke kae mai fale ki fale. 21  Ne tuku atu ne au se molimau katoatoa ki tino Iutaia mo tino Eleni e uiga ki te salamō ki te Atua mo te fakatuanaki ki te ‵tou Aliki ko Iesu. 22  Kae nei la, ko fakamalosi mai te agaga o te Atua ke fano au ki Ielusalema, e tiga e se iloa ne au a mea ka ‵tupu ki a au i konā, 23  kae mai fa‵kai ki fa‵kai e molimau mai faeloa a te agaga tapu ki a au me e faka‵tali mai eiloa ki a au a te falepuipui mo puapuaga. 24  E tiga te feitu tenā, e se fakatāua ne au a toku ola, kae e ‵tau o fakaoti ne au a te fakatau‵telega mo te galuega telā ne maua ne au mai te Aliki ko Iesu, ke tuku atu se molimau katoatoa e uiga ki te tala ‵lei o te alofa tauanoa o te Atua. 25  “Kae nei la, ko iloa ne au me i a koutou katoa kolā ne talai ne au ki ei a te Malo ka se toe lavea ne koutou oku mata. 26  Tenā te pogai ne kalaga atu ei au ki a koutou ke molimau koutou i te aso nei me i a au e ‵ma i toto o tino katoa, 27  me e seai se mea ne taofi ne au mai i a koutou e uiga ki fuafuaga a te Atua. 28  Ke ‵saga tonu koutou ki a koutou eiloa e pelā foki mo te lafu mamoe, me ko oti ne filifili koutou ne te agaga tapu ke fai mo ovasia, ko tausi mamoe o te fakapotopotoga a te Atua, telā ne ‵togi ne ia ki te toto o tena Tama tonu. 29  E iloa ne au me kafai ko fano au keatea, ka ulu mai ei a luko fe‵kai ki loto i a koutou kae ka se fai faka‵lei ne latou te lafu mamoe, 30  kae ka ‵sae mai foki mai loto eiloa i a koutou a tāgata kolā ka ‵fuli faka‵kotua ne latou a mea ke ‵futi atu ei a soko ki a latou. 31  “Tela la, ke tumau i te matapula‵pula, kae ke masaua ne koutou me i tausaga e tolu, ne seki ‵fiu eiloa au i te fakamalosi atu mo loimata ki a koutou taki tokotasi, i te ao mo te po. 32  Kae nei la, ko tuku atu ne au koutou ki te Atua mo te muna o tena alofa tauanoa, telā e ati aka ne ia koutou kae ka ‵tala atu ki a koutou a te auala ke maua ei a te mea telā e tuku atu ne te Atua ki a latou kolā ne filifili ne ia e pelā me ne tino tapu. 33  Ne seki manako eiloa au ki siliva, aulo io me ko gatu o se tino. 34  E iloa foki ne koutou me ko lima eiloa konei ne ga‵lue ke maua ei a mea kolā e manako au ki ei e pelā foki mo latou kolā e fakatasi mo au. 35  Ko oti ne fakaasi atu ne au ki a koutou a mea katoa me kafai e ga‵lue malosi koutou, e ‵tau o fesoasoani atu koutou ki a latou kolā e vāi‵vai, kae e ‵tau o masaua ne koutou a pati a te Aliki ko Iesu, kolā ne fai mai, penei ‘E sili atu te fiafia o te tino telā e tuku atu ana mea i lō te maua ne ia.’” 36  I te otiga o ana pati konei, ne to‵tuli ifo a ia fakatasi mo latou katoa kae fai te lotou ‵talo. 37  E tonu, ne ‵tagi mautuutu a latou katoa kae ‵sai kae sogi atu mo te a‵lofa ki a Paulo, 38  me ne fanoa‵noa malosi latou i ana pati me ka se toe lavea ne latou ana mata. Tela la, ‵taki atu ei ne latou a ia ki te vaka.

Fakamatalaga mai lalo