Galuega 2:1-47

2  A koi fai te ‵kaiga o te Penitekoso ne ‵nofo atu a latou katoa i se koga e tasi.  I te taimi eiloa tenā ne lagona ei ne latou te ‵gulu mai te lagi e pelā eiloa me se afā, kae ne ‵fonu ei a te fale kātoa telā ne saga‵saga i ei latou.  Kae ne lavea atu ne latou a mea e pelā me ne ulaga afi kae foliga pelā me ne alelo i luga i a latou taki tokotasi.  Ne ‵fonu latou katoa i te agaga tapu kamata ei o fai‵pati latou ki ‵gana kese‵kese, e pelā eiloa mo te mea ne tuku atu ne te agaga tapu ke fai‵pati latou ki ei.  I te taimi tenā, ne ‵nofo atu i Ielusalema a tāgata Iutaia tali‵tonu mai fenua katoa i lalo o te lagi.  Tela la, i te lagonaga ne latou a te mea tenei, ne maopoopo mai a te vaitino kae ne ofo me ne lagona ne latou a te kau soko ko fai‵pati ki olotou ‵gana eiloa.  E tonu, ne ofo malosi latou kae fai aka penei olotou pati: “Kiloke, e se ne tino Kalilaia katoa konei e fai‵pati?  Kae e pefea o lagona ne tatou taki tokotasi a ‵tou ‵gana kolā ne fa‵nau mai mo tatou?  A tatou ne tino Patia, Metai, Elama, Mesopotamia, Iuta, Kapatokia, Pono, kogā fenua o Asia, 10  Felukia, Pafulia, Aikupito, vaega o Lipua i te feitu ki Kulene, tino ne o‵mai mai Loma, kolā ko tino Iutaia mo tino ko ‵fuli ki te lotu Iutaia, 11  Keleta, mo Alapi, kae ko lagona ne tatou a latou e fai‵pati i ‵tou ‵gana e uiga ki galuega fakaofoofogia a te Atua.” 12  E tonu, ne ofo katoa latou kae ‵numi foki, kae fai aka olotou pati i a latou eiloa: “Se a te uiga o te mea tenei?” 13  Kae ne fakatauemu atu a nisi tino ki a latou kae fai atu: “Ko ko‵na latou i te uaina fou.” 14  Ne tu aka a Petelu fakatasi mo te toko sefulutasi kae faipati atu i se leo maluga ki a latou penei: “Tāgata o Iuta mo koutou katoa tino o Ielusalema, fai ke iloa ne koutou a te mea tenei kae faka‵logo faka‵lei mai ki aku pati. 15  A tino konei e se ko‵na e pelā mo otou pati, me tenei fua te tolu* o itula o te aso. 16  E ‵kese mai i ei, konei eiloa a pati kolā ne fai mai e auala i te pelofeta ko Ioelu, 17  “Kae i aso fakaoti,” ko pati a te Atua, “ka ‵ligi atu ne au a nisi vaega o toku agaga ki luga i vaegā tino valevale, a otou tama ta‵gata mo otou tama fa‵fine ka ‵valo fakapelofeta. Ka lavea ne otou tamataene a fakaasiga kae ka fai a moemiti a otou toeaina; 18  ka ‵ligi atu foki ne au ki aku pologa ta‵gata mo aku pologa fa‵fine i aso konā a nisi vaega o toku agaga, kae ka ‵valo fakapelofeta foki latou. 19  Kae ka tuku atu ne au a fakailoga i luga i te lagi mo fakailoga i lalo i te lalolagi, te toto, te afi mo te ausaga matolu; 20  a te la ka pouli kae ka liu toto te masina a koi tuai o oko mai a te aso lasi kae fakapito o Ieova. 21  Kae ko tino katoa kolā e ka‵laga ki te igoa o Ieova ka ‵sao atu i ei.’” 22  “Tāgata o Isalaelu, faka‵logo mai ki pati konei: A Iesu te Nasaleta, ko te tagata telā ne fakaasi faka‵sau atu ne te Atua ki a koutou e auala i galuega ‵mana, mea fakaofoofogina, mo fakailoga kolā ne fai ne te Atua ki a koutou e auala i a ia, e pelā eiloa mo te mea e iloa ne koutou. 23  A te tagata tenei, telā ne tuku atu ki a koutou e ‵tusa mo te loto mo te iloa ‵mao o te Atua i mea ka ‵tupu, ne ‵tuki ne koutou ki te lakau fakasaua* e auala i tāgata solitulafono kae tamate ne koutou. 24  Ne toe fakatu kae fakasaoloto a ia ne te Atua mai te malosi o te mate, me ne seki mafai ne te mate o taofi aka a ia. 25  Ne fai mai a Tavita e uiga ki a ia, ‘Ne lavea faeloa ne au a Ieova i oku mua; me i a ia e nofo i toku feitu fakaatamai kae ka se polepole eiloa au. 26  Ona ko te mea tenei ne fiafia malosi ei toku loto kae ne faipati atu au mo te fiafia. E se gata i ei, ka maua foki ne kita nei a te fakamoemoega. 27  Me ka se tuku tiaki ne koe a toku foitino i te Tanuga.* Ka se talia foki ne koe a te tino telā e fakamaoni ki a koe ke oko te pala ki tena foitino. 28  Ko oti ne fakailoa mai ne koe ki a au a te auala o te ola, ka faka‵fonu ne koe au ki te fiafia me e talia ne koe au.’ 29  “Taina, e fai‵pati atu matou e aunoa mo te ma‵taku ki a koutou e uiga ki te ulu o te kāiga ko Tavita, me ne mate a ia kae ne tanu foki. Kae ko tena tanuga tenei eiloa e ‵nofo mo tatou ke oko ki te aso tenei. 30  Ona ko ia se pelofeta kae ne iloa foki ne ia me ne tauto atu a te Atua ki a ia ke fai ne ia se tino e tokotasi mai tena gafa ke sagasaga i luga i tena nofogaaliki, 31  ko leva ne iloa ne ia kae ne faipati mai e uiga ki te toetu o te Keliso, me ka se tuku tiaki a ia i te Tanuga io me e oko te pala ki tena foitino. 32  Ko Iesu eiloa tenei ne toe fakatu aka ne te Atua, kae e molimau matou katoa e uiga ki ei. 33  Ona ko te mea ko oti ne fakamaluga aka a ia ki te feitu fakaatamai o te Atua kae ko maua ne ia te agaga tapu telā ne folafola mai ne te Tamana, ko oti ne ‵ligi mai ne ia a te mea tenei e pelā eiloa mo te mea ko lavea kae lagona ne koutou. 34  Se mea tonu i a Tavita ne seki fano ki te lagi, kae ne fai mai a ia, ‘Ne fai atu a Ieova ki toku Aliki: “Nofo i toku feitu fakaatamai, 35  ke oko ki te taimi e tuku ei ne au ou fili mo fai te mea e tuku ei ou vae.”’ 36  Tela la, ke na iloa mo te mautinoa ne kāiga Isalaelu katoa me ko oti ne fai ne te Atua a ia mo fai te Aliki mo te Keliso, ko Iesu telā ne ‵tuki ne koutou ki te lakau fakasaua.” 37  I te lagonaga ne latou te mea tenei ne mafatia olotou loto i te fanoa‵noa, kae fai atu ki a Petelu mo nisi apositolo penei: “Taina, ne a omotou mea e ‵tau o fai?” 38  Ne fai atu a Petelu ki a latou: “Ke sala‵mo kae ke papatiso katoa koutou i te igoa o Iesu Keliso ke fakamagalo ei otou agasala, kae ka maua ne koutou a te meaalofa ko te agaga tapu e aunoa mo se ‵togi. 39  Me i te folafolaga tenei se mea ne fai ki a koutou, otou fanau, e penā foki loa mo latou kolā e ‵nofo ‵mao, ko tino katoa kolā e kalagagina ne Ieova te ‵tou Atua ke o‵mai ki a ia.” 40  Kae ne molimau kae fakamalosi atu faeloa a ia ki a latou i nisi pati aka, ana muna: “Fai ke ‵sao koutou mai te kautama fai mea piko‵piko tenei.” 41  Tela la, ne papatiso ei a latou kolā ne puke ‵mau mo te loto fia‵fia ki ana pati, kae kāti e toko 3,000 a tino ne fakaopoopo ki a latou i te aso tenā. 42  Kae ne tumau eiloa latou i te ‵saga tonu atu ki akoakoga a te kau apositolo. Ne fakatau fesoasoani, ne ‵kai, kae ‵talo fakatasi latou. 43  E tonu, ne kamata o ma‵taku a tino katoa, kae e uke a mea fakaofoofogia mo galuega ‵mana ne kamata o ‵tupu e auala i apositolo. 44  Ne tuku fakatasi ne latou kolā ne tali‵tonu a olotou mea katoa, 45  kae ne fakatau atu ne latou olotou mea mo olotou kope kae tufa atu a ‵togi o olotou mea i a latou katoa, e ‵tusa loa mo manakoga o tino taki tokotasi. 46  Kae i aso takitasi ne maopoopo fakatasi faeloa latou i te faletapu, ne fai olotou ‵kaiga i olotou fale, kae ‵kai i ei mo te fia‵fia lasi mo te loto fakamaoni, 47  o tavae atu ki te Atua kae ne fia‵fia a tino katoa ki a latou. Kae i te taimi eiloa tenā, ne tumau faeloa a Ieova i te fakaopoopo atu ki a latou i aso takitasi a tino kolā ko fakaolagina.

Fakamatalaga mai lalo

Ga 2:15  E ‵pau mo te itula e 9 i te taeao māfai e lau mai i te saeakaga o te la.
Ga 2:23  Ke onoono ki te Mataupu Fakaopoopo e 7.
Ga 2:27  I te ‵gana Eleni, “ko Heitisi.” Ke onoono ki te Mataupu Fakaopoopo e 9.