Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 19:1-41

19  A koi nofo atu a Apolo i Kolinito, a ko Paulo ne fanatu i te feitu ki loto o te fenua, fanaifo ei ki Efeso, kae ne maua ne ia i ei a nisi soko.  Ne fai atu a ia ki a latou: “E mata, ne maua ne koutou te agaga tapu i te taimi ne tali‵tonu ei koutou?” Ne tali atu latou ki a ia: “E seki lagona aka eiloa ne matou me e isi se agaga tapu.”  Ne fai atu a ia: “Se a te vaegā papatisoga telā ne papatiso ei koutou?” Ne fai atu latou: “Ko te papatisoga a Ioane.”  Ne fai atu a Paulo: “Ne papatiso a Ioane i te papatisoga telā e fai pelā me se fakailoga o te salamō, kae fai atu ki tino ke tali‵tonu ki te tino telā ka vau i ana tua, telā ko Iesu.”  I te lagonaga ne latou a te mea tenei, ne papatiso ei latou i te igoa o te Aliki ko Iesu.  Kae i te taimi ne fakaeke atu ei a lima o Paulo ki luga i a latou, ne oko atu te agaga tapu ki a latou. Ne kamata ei o fai‵pati latou ki ‵gana kese‵kese kae ‵valo atu foki.  Kae ko te aofaki o latou e ‵tusa mo te toko sefululua tāgata.  Ne ulu atu a ia ki loto i te sunako, kae ne faipati atu mo te loto toa i masina e tolu, mai te faiga o lāuga kae fakatalitonu atu foki e uiga ki te Malo o te Atua.  Kae i te taimi ne loto ma‵keke kae se tali‵tonu ei a nisi tino, kae fakamasei ne latou te Ala o te Aliki i mua o tino e tokouke, ne tiakina ne ia latou, ne ave keatea foki ne ia a soko mai i a latou, kae fai sale ana lauga i te faleakoga o Tulano i aso takitasi. 10  Ne fai faeloa penā i tausaga e lua, kae ne lagona ei ne tino katoa kolā e ‵nofo i te atufenua o Asia, a te muna a te Aliki, ko tino Iutaia mo tino Eleni. 11  Ne fai faeloa ne te Atua a galuega fakaofoofogia e uke e auala i a Paulo, 12  ke oko ki te tuku atu o ana tamā solo mo ana gatu tali ‵pefu ki tino ma‵saki, kae ne ‵lei olotou masaki, kae o‵mai ei ki tua a agaga ma‵sei. 13  Kae e isi ne tino Iutaia faima‵laga e masani o afuli ne latou ki tua a temoni mai te fakaaogaga o te igoa o te Aliki ko Iesu, ki tino kolā e pukea ne agaga ma‵sei, kae fai atu, penei: “Au e fakatonu atu ki a koutou e auala i a Iesu telā e talai atu ne Paulo.” 14  E isi ne tama tāgata e tokofitu a Sikeva, se faitaulaga pule i Iutaia, e fai ne latou a te mea tenei. 15  Kae ne tali mai te agaga masei, kae fai atu ki a latou: “E iloa ne au a Iesu kae e masani foki au mo Paulo; kae ko oi la koutou?” 16  Ne oso atu ki a latou a te tagata telā e nofo i ei te agaga masei, ne ‵ta ne ia a latou taki tokotasi, ‵tele fuafua ei latou mo olotou pa‵kiaga ki tua mo te fale tenā. 17  Ne iloa ne tino katoa a te mea tenei, tino Iutaia mo tino Eleni kolā e ‵nofo i Efeso; kae ne ma‵taku a latou katoa i ei. Ne fakamaluga aka faeloa i ei a te igoa o te Aliki, ko Iesu. 18  E tokouke a tino kolā ne tali‵tonu ne o‵mai o fakaasi ‵tonu mai olotou amioga kae fakailoa atu foki olotou mea ‵se ne fai. 19  E tonu, e tokouke a tino faivailakau ne ‵luku fakatasi olotou tusi kae ‵sunu ne latou i mua o tino katoa. Ne galue aka ne latou te ‵togi o mea katoa konā kae maua aka me e ‵tusa mo te 50,000 tupe siliva. 20  Tela la, ne gasolo aka faeloa a te muna a Ieova kae manumalo foki. 21  I te otiga o mea konei, ne fakaiku aka ne Paulo i tena loto, me kafai ko oti ne fanatu a ia i loto i Maketonia mo Akaia, ka faimalaga atu a ia ki Ielusalema, ana muna: “Kafai e oko atu au ki konā, e ‵tau foki o fano au ki Loma.” 22  Tela la, ne uga atu ne ia ki Maketonia se tokolua mai i a latou kolā ne fesoasoani atu ki a ia, ko Timoteo mo Elata, kae ne tai fakatalave a ia i te atufenua o Asia. 23  Ko te taimi eiloa tenā ne sae aka ei se fakalavelave lasi ‵ki e uiga ki te Ala o te Aliki. 24  E isi se tagata e igoa ki a Temetiu, se tino faite mea ki siliva, ne faite ne ia a fakatusa siliva o te faletapu o Atemisi kae uke a tupe ne maua ne ana tino faigaluega mai i ei. 25  Ne fakamaopoopo ne ia a latou fakatasi mo tino katoa kolā e ga‵lue i mea konā kae fai atu, penei: “Oku tāgata, e iloa ‵lei ne koutou me e maua ‵tou maumea mai te pisinisi tenei. 26  Ko oti foki ne lavea kae lagona ne koutou a te auala ne fakatalitonu atu ei a Paulo ki tino e tokouke i Efeso, kae toeitiiti ko te atufenua kātoa o Asia, ke ‵fuli latou ki se isi talitonuga, kae e fai mai me i atua kolā e faite ki lima e se ne atua ‵tonu. 27  A te mea fakamataku i ei, me ka taku fakamasei ei te ‵tou pisinisi kae ka fakaseaoga i ei te faletapu o te atua fafine ko Atemisi te sili. Ka seai foki se aoga o tena tulaga ‵malu telā e tapuaki ki ei a te atufenua kātoa o Asia e pelā foki mo te lalolagi nofoaki kātoa.” 28  I te lagonaga ne latou a te mea tenei, ne paka‵laga atu a tāgata konei, penei: “E sili eiloa a Atemisi o Efeso!” 29  Ne ua‵te valevale te fa‵kai, kae ne ‵tele fakatasi atu a tino ki te fale fai tafaoga kae toso keatea ne latou a Kaio mo Alitako, ko tino Maketonia kolā ne faima‵laga fakatasi mo Paulo. 30  Ne fia fanatu a Paulo ki tino konā, kae ne seki talia ne te kau soko ke fano a ia ki ei. 31  Ke oko eiloa ki nisi tāgata fakatonutonu o fakafiafiaga mo tafaoga, kolā ne fia‵fia ki a ia, ne uga atu olotou fekau kae fakamolemole atu ki a ia ke se fano eiloa ki te fale fai tafaoga me e fakamataku ki a ia. 32  E tonu, ne fakatau paka‵laga valevale fua a nisi tino i ei me ko ua‵te valevale te maopoopoga tenā, kae ne seki iloa ne te tokoukega o latou a te pogai ne maopoopo atu ei latou ki konā. 33  Ne aumai ne latou Alesana mai loto i te vaitino, kae ‵tule atu a ia ne tino Iutaia ki mua. Ne fakatu aka te lima o Alesana me ne manako a ia o faipati atu ki tino konā. 34  Kae i te iloaga ne latou i a ia se tino Iutaia, ne paka‵laga fakatasi mai ei latou e ‵tusa mo te lua itula: “E sili eiloa a Atemisi o Efeso!” 35  I te taimi ne fakafilemu ei ne te pule o te fa‵kai a te vaitino, ne fai atu a ia: “Tāgata o Efeso, ko oi te tino i te lalolagi kātoa e se iloa ne ia me i te fa‵kai o Efeso ko te koga e tausi ei te faletapu o Atemisi te sili mo te fakatusa telā ne to ifo mai te lagi? 36  Tela la, ona ko te mea e se mafai o faka‵segina a mea konei, se mea ‵lei ke ‵nofo filemu koutou kae ke mo a ma sona fai otou mea. 37  Me ko oti ne aumai ne koutou ki konei a tāgata kolā e se ne tino ‵faomea i loto i faletapu io me ne tino fakatauemu ki te ‵tou atua fafine. 38  Tela la, kafai e isi se tagi a Temetiu mo ana tino ga‵lue ki se tino, e isi ne aso e fai ei a fono fakamasino, kae e isi foki ne sui kovana; ko mafai ei o ‵moli ne te suā tino a te suā tino ki te fono. 39  Kae kafai koi isi se mea e ‵sala koutou ki ei, avaka la te mea tenā i fono masani ke fai se fakaikuga ki ei. 40  A te mea ne tupu i te aso nei ko fai ei ke ‵tu tatou i se tulaga fakamataku ona ko te ‵teke atu ki te malo, me e seai eiloa se pogai e tasi e mafai o tuku atu ne tatou e uiga ki te ua‵te valevale o te vaitino.” 41  I te otiga o ana pati konei, uga atu ei ne ia a te vaitino ke olo.

Fakamatalaga mai lalo