Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 18:1-28

18  I te otiga o mea konei ne tiakina ne Paulo a Atenai kae fanatu ki Kolinito.  I konā loa, ne fetaui ei a ia mo se tino Iutaia e igoa ki a Akuila, se tino mai Pono telā ne fatoa vau mai Italia, fakatasi mo tena avaga ko Pisila, me ne fakatonu atu a te tupu ko Kalaotia ke olo keatea a tino Iutaia mai Loma. Ne fanatu a ia ki a lāua  kae ne nofo i te lā fale, ne ga‵lue fakatasi latou me e ‵pau olotou galuega, ne tino faite faleie.  E tiga te feitu tenā, ne lāuga sale atu a ia i loto i te sunako i sapati katoa kae fakamalosi atu ki tino Iutaia mo tino Eleni ke tali‵tonu.  I te okomaiga a Sila mo Timoteo mai Maketonia, ne saga malosi atu a Paulo o folafola atu a te muna, kae molimau atu foki ki tino Iutaia o fakatalitonu atu i a Iesu ko te Keliso.  Kae ona ko te lotou ‵teke kae muna ma‵sei atu faeloa ki a ia, ne tuetue ne ia ana gatu kae fai atu ki a latou: “Ke i luga i otou ulu otou toto. Au e ‵ma i ei. Mai te taimi tenei o fano ki mua ka fanatu eiloa au ki tino o fenua fakaa‵tea.”  Ne fano a ia mai konā ki te fale o te tagata e igoa ki a Taitusi Tiasitasi, se tino e tapuaki ki te Atua, a ko tena fale e pili ki te sunako.  Kae ko Kilipo, te ofisa tausi o te sunako, ne talitonu ki te Aliki e pelā foki mo tena kaufale kātoa. Ne tali‵tonu foki a tino Kolinito e tokouke kolā ne lagona ne latou a te muna kae ne papatiso ei latou.  E se gata i ei, ne fai atu te Aliki ki a Paulo i te po e auala i se fakaasiga: “Sa mataku, kae faipati atu faeloa kae ke se ‵fiu eiloa koe i te talai atu, 10  me i a au e fakatasi atu ki a koe kae e seai se tino ka fakapakia ne ia koe, me e tokouke oku tino i te fa‵kai tenei.” 11  Ne nofo a ia i konā i te tausaga e tasi mo te ono masina, o akoako atu ki a latou a te muna a te Atua. 12  A koi fai a Kaliona mo sui kovana o Akaia, ne taumafai malosi a tino Iutaia o ‵teke atu ki a Paulo kae ‵taki atu ne latou ki te fono fakamasino, 13  olotou muna: “A te tagata tenei e fakamalosi atu ki tino ke tapuaki ki te Atua i se auala telā e ‵teke ki te tulafono.” 14  Kae i te taimi ka faipati atu ei a Paulo, ne faipati atu a Kaliona ki tino Iutaia: “Tino Iutaia, kafai e tonu me e isi se mea ‵se io me se mea masei ‵ki ne fai ne ia, e toka eiloa au o fakalogologo ki otou fakamatalaga. 15  Kae kafai ne kinauga fua e uiga ki lāuga, igoa mo te otou tulafono, e ‵tau eiloa o fai ne koutou. E se manako au o fakamasino a mea konei.” 16  Ona ko te mea tenā, ne afuli ei ne ia a latou ke olo keatea mai te fono. 17  Ne puke ne latou a Sosene, te ofisa tausi o te sunako kae ‵kini ne latou a ia i mua o te fono. Kae ne seki fia saga atu eiloa a Kaliona ki mea konei. 18  Mai tua o nai aso ne nofo ei a Paulo i konā, ne fakatofa atu a ia ki te kau taina, kae folau atu ki Sulia. Ne olo fakatasi latou mo Pisila mo Akuila, kae ne ‵kati ‵mutu ana laulu i Kenikelea ona ko tena tautoga. 19  Ne oko atu latou ki Efeso, tiaki atu ei ne ia a lāua i konā. Ne fanatu a ia ki loto i te sunako kae fakasako‵sako mo tino Iutaia i ei. 20  E tiga eiloa ne fakamolemole atu faeloa latou ke nofo mai a ia i se taimi tai leva, ne seki talia ne ia. 21  Ne fakatofa atu a ia kae fai atu ki a latou: “Au e toe foki mai ki a koutou, māfai e loto ki ei a Ieova.” Ne malaga atu a ia mai i Efeso 22  kae oko atu ki Kaisaleia. Ne fanatu a ia o fakafetaui ki tino i te fakapotopotoga, fanaifo ei ki Anitioka. 23  Ne nofo a ia i konā i se vaitaimi, fanatu ei ki kogā koga kese‵kese i loto i Kalatia mo Felukia o fakamalosi atu ki soko katoa i ei. 24  Ne oko atu ki Efeso a te tino Iutaia e igoa ki a Apolo, se tino mai i Alesania, se tagata poto i te faipati; kae e poto foki i muna mai Tusitusiga Tapu. 25  Ne akoakogina a te tagata tenei i auala o Ieova kae ona ko ia ne ‘‵fonu i te agaga tapu’ ne loto finafinau ei a ia o faipati kae akoako ‵tonu atu a mea e uiga ki a Iesu, kae ne masani fua a ia mo te papatisoga a Ioane. 26  Ne kamata o faipati atu a te tagata tenei mo te loto toa i te sunako kae i te lagonaga ne Pisila mo Akuila a ia, ne ave ei ne lāua kae fakamatala faka‵lei atu ki a ia a auala o te Atua. 27  Ona ko tena manakoga ke fanatu ki Akaia, ne tusi atu a taina ki te kau soko i konā kae fakatonu atu ke talimalo ne latou a ia. Tela la, i tena okoatuga ki ei, ne fesoasoani malosi a ia ki a latou kolā ko oti ne tali‵tonu ona ko te alofa tauanoa o te Atua; 28  me ne finau malosi a ia o fakamaoni katoatoa atu i mua o tino katoa a te ‵se o tino Iutaia, kae ne fakatalitonu atu foki ne ia mai i Tusitusiga Tapu me i a Iesu ko te Keliso.

Fakamatalaga mai lalo