Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 17:1-34

17  Ne faima‵laga atu latou i loto i Amefipoli mo Apolonia kae oko atu ki Tesalonia, telā e isi se sunako o tino Iutaia i ei.  Ne ulu atu a Paulo ki loto i a latou e pelā eiloa mo tena masani, kae i sapati e tolu ne fakasako‵sako a ia mo latou ki mea mai Tusitusiga Tapu,  o fakamatala kae fakatalitonu atu e auala i mea kolā ne tusi ki lalo me ne ‵tau eiloa o puapuaga a te Keliso kae toe fakatu aka mai te mate, kae fai atu, penei: “Tenei te Keliso, ko Iesu telā e folafola atu ne au ki a koutou.”  Ona ko te mea tenā, ne tali‵tonu a nisi tino i a latou kae ‵kau atu ki a Paulo mo Sila, e pelā foki mo tino Eleni e tokouke kolā ne tapuaki ki te Atua fakatasi mo nai fāfine lauiloa.  Kae ona ko te loto ma‵sei o tino Iutaia, ne fakamaopoopo mai ne latou a tāgata amio ma‵sei kolā e oloolo sale fua i te maketi kae ‵taki atu e pelā me se potukau kae ne fakamakosu ne latou a te fa‵kai kātoa. Ne ulu atu latou ki te fale o Iasona o ‵sala a Paulo mo Sila ke aumai ki te vaitino.  Ne seki maua ne latou a lāua, toso atu ei ne latou a Iasona mo nisi taina ki takitaki o te fa‵kai, kae paka‵laga atu, penei: “Konei foki a tāgata kolā ne fakamakosu ne latou a te lalolagi nofoaki kātoa,  kae ne talimalo faka‵lei ne Iasona a latou. E ‵teke atu a tāgata katoa konei ki tulafono a Kaisala, i olotou muna me e isi aka foki se isi tupu, telā ko Iesu.”  Ne kaitaua malosi a te vaitino mo takitaki o te fa‵kai i te lotou ‵logoga i mea konei;  kae i te mauaga ne latou mai i a Iasona mo nisi tino a tupe e lava ke fakasaoloto ei latou, uga atu ei ne latou ke olo. 10  Ne uga fakavave atu ne taina a Paulo mo Sila ki Pelea i te po tenā. I te lā okoatuga, olo atu ei ki loto i te sunako o tino Iutaia. 11  E sili atu a te ala o mafaufau o tino i konā i lō tino i Tesalonia, me ne talia ne latou a te muna mo te fia‵fia lasi, kae suke‵suke malosi ki Tusitusiga Tapu i aso katoa o fakatalitonu aka me e mata, e ‵tonu a mea konei. 12  Tela la, ne tali‵tonu a tino e tokouke mai i a latou, e pelā foki mo nai fāfine mo tāgata Eleni lauiloa e tokouke. 13  Kae i te ‵logoga a tino Iutaia i Tesalonia me ko folafola atu foki ne Paulo te muna a te Atua i Pelea, ne olo atu foki latou ki ei o fakaoso ke kaitaua a tino i ei. 14  Ne uga fakavave atu ne taina a Paulo ke fano ki se koga e pili ki te tai; kae ne ‵nofo atu a Sila mo Timoteo i konā. 15  A ko latou kolā ne ave ne latou a Paulo ne olo atu eiloa mo ia ke oko ki Atenai, kae i te mauaga ne latou se fakatonuga ke o‵mai fakavave a Sila mo Timoteo ki a ia, ne toe ‵foki ei latou. 16  A koi faka‵tali a Paulo ki a lāua i Atenai, ne ‵mae tena loto* i te kilo atu me ko ‵fonu a te fa‵kai i tupua. 17  Ne kamata o fakasakosako atu a ia i loto i te sunako mo tino Iutaia mo nisi tino kolā e tapuaki ki te Atua, e pelā foki mo tino kolā e fetaui mo ia i te maketi i aso katoa. 18  Kae ne kinau atu a nisi tino mai te kau Epikulo mo te kau Setoiko ki a ia, kae ne fai mai a nisi tino i a latou, penei: “Se a te mea e fia fai mai ne te tino gutu fai‵tala tenei?” Ne tali mai a nisi tino: “E pelā me e folafola mai ne ia a atua fakaa‵tea.” Ne fai penā olotou pati me ne folafola atu ne ia a te tala ‵lei e uiga ki a Iesu mo tena toetu. 19  Ne puke ne latou a ia kae ‵taki atu ki te Aleopako,* kae fai atu penei: “E a, e mafai o iloa ne matou a te akoakoga fou tenā e faipati mai koe ki ei? 20  Me e ‵fou ki te motou faka‵logo a mea kolā e fai mai ne koe. Tela la, e fia iloa ne matou a uiga o mea konei.” 21  E tonu, a tino Atenai mo tino fakaa‵tea kolā e ‵nofo i konā ne fakamaumau fua olotou taimi sao‵sao, i te sau‵tala ki se mea fou io me fakalogo‵logo ki se tala fou. 22  Ne tu atu a Paulo i te kogaloto o te Aleopako kae fai atu penei: “Tāgata Atenai, e lavea ne au me e sili atu te otou ma‵taku ki atua i lō nisi tino. 23  E pelā mo te mea tenei, i taku vauga i loto i te otou fa‵kai kae kilokilo atu ki mea e tapuaki koutou ki ei, ne lavea foki ne au se fatafaitaulaga mo pati konei e tusi i ei ‘Mō te Atua e se Iloa ne Matou.’ Tela la, a te mea telā e tapuaki koutou ki ei mo te sē iloa, ko ia tenei e folafola atu ne au ki a koutou. 24  A te Atua telā ne faite ne ia a te lalolagi mo mea katoa i luga i ei, ko Ia tenā ko te Aliki o te lagi mo te lalolagi, e se nofo i loto i faletapu ne faite ne tino ki olotou lima. 25  E se manako foki ki se fesoasoani mai tino e pelā me e manako a ia ki se mea, me ko ia fua telā e tuku atu ne ia ki tino katoa a te ola mo te mānava e pelā foki mo mea katoa. 26  Kae ne faite ne ia mai i te tagata e tokotasi a itukāiga o tino i fenua katoa ke ‵nofo i luga i te lalolagi kātoa, kae ko oti ne fakatapulā ne ia a taimi ‵tonu mo koga ke ‵nofo ei a tino, 27  ko te mea ke ‵sala atu latou ki te Atua, me kafai e ‵sala malosi latou ki a ia kae ka maua eiloa ne latou a ia, me i a ia e se ‵mao mai i a tatou taki tokotasi. 28  E auala i a ia ko maua ei ne tatou a te ola, e gasue‵sue, kae e iai foki tatou, e pelā eiloa mo pati a nisi tino ‵fatu kupu mai i a koutou kolā ne fai mai, ‘Me i a tatou foki ko ana fanau.’ 29  “Tela la, ona ko tatou ko fanau a te Atua, e se ‵tau mo tatou o mafau‵fau me i te Atua e ‵pau mo aulo, siliva io me se fatu, e pelā me se mea ne faite ki poto mo mafaufauga o tāgata. 30  E tonu, e seki saga atu te Atua ki te taimi koi va‵lea ei a tino, kae nei la ko fai atu a ia ki tino katoa ke sala‵mo. 31  Me ko oti ne fakamoe ne ia te aso telā ne fuafua ne ia ke fakamasino ei a te lalolagi nofoaki kātoa i te amiotonu, ne se tagata telā ko oti ne fakasopo aka ne ia, kae ko oti ne fakamautinoa mai ne ia a te mea tenā ki tino katoa mai te ‵toe fakatumaiga o te tino tenā mai te mate.” 32  I te lagonaga ne latou a mea e uiga ki te toetu mai te mate, ne fakatauemu atu a nisi tino, a ko nisi tino ne fai atu penei: “E fia fakalogo‵logo matou ki a koe e uiga ki te mea tenei i te suā taimi.” 33  Ne fano ei a Paulo keatea mai i a latou, 34  ne ‵kau fakatasi atu a nisi tāgata ki a ia kae ne tali‵tonu foki. E aofia i a latou konā ko Taionusio, se famasino i te fono fakamasino i te Aleopako, mo te fafine e igoa ki a Tamali, mo nisi tino aka foki.

Fakamatalaga mai lalo

 I te ‵gana Eleni, “e se fiafia tena agaga.”
 Se tamā mauga i Atenai i aso mua telā e maopoopo sāle i ei a te kau o te fono maluga.