Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 14:1-28

14  Ne ulu atu lāua ki loto i te sunako o tino Iutaia i Ikonio kae fai‵pati atu i se auala telā ne tali‵tonu ei se vaitino e tokouke mai tino Iutaia mo tino Eleni.  Kae ko tino Iutaia kolā ne seki tali‵tonu, ne fakamakosu kae faka‵se ne latou a tino o fenua fakaa‵tea ke ‵teke atu ki taina konei.  Tela la, ne fakamāumāu ne lāua a taimi e uke o fai‵pati atu mo te loto ‵toa e auala i te pule a Ieova, telā ne molimau atu ki te muna o tena alofa tauanoa mai te fai ne lāua a galuega ‵mana mo mea fakaofoofogia.  E ui i ei, ne vaelua te fa‵kai kātoa. Ne ‵kau atu a nisi tino ki te kau Iutaia a ko nisi tino ki te kau apositolo.  I te taimi ne taumafai malosi ei a tino o fenua fakaa‵tea mo tino Iutaia fakatasi mo olotou takitaki o fakasaua lāua mai te fakamasiasi atu kae peipei ki fatu,  ne fakailoa atu ki a lāua a te mea tenā, ‵sola ei lāua ki fa‵kai ko Lukaonia, Lusa mo Teipe e penā foki loa mo fenua i olotou tafa.  Tena ne folafola atu ei ne lāua i koga konā a te tala ‵lei.  Ne nofo atu i Lusa se tagata e ma‵sei ana vae. Ne ‵pili tou tagata talu mai tena fanaumaiga kae ne seki sasale aka eiloa.  Ne fakalogologo te tagata tenei ki pati a Paulo, ne kilo ‵tonu atu a Paulo ki a ia, kae ne lavea ne ia me e mafai o faka‵lei a te tagata tenei ona ko tena fakatuanaki, 10  fai atu ei a ia i se leo lasi, penei: “Tu ki luga.” Kae ne tafuke aka a ia ki luga kamata ei o sasale. 11  I te laveaga ne te vaitino a te mea ne fai ne Paulo, ne paka‵laga atu latou i te ‵gana Lukaonia: “Ko liu tino a atua kae ko oti ne olo ifo ki a tatou!” 12  Ne fakaigoa ne latou a Panapa ki a Seu, a ko Paulo ki a Heleme, me ko ia eiloa telā e faipati muamua. 13  Ne tu pili a te faletapu o Seu ki te fa‵kai, kae ne aumai ne tena faitaulaga a pulumakau mo fou ki mataloa o te ‵pui kae ne manako o ofo atu a taulaga konā fakatasi mo te vaitino. 14  Kae i te ‵logoga a te avā apositolo ko Panapa mo Paulo i te mea tenā, ne saesae a lā gatu ‵loa, ne ‵tele atu ki te vaitino, kae ka‵laga atu, 15  a lā muna, penei: “Oku tāgata, kaia e fai ei ne koutou a mea konei? A māua nei ne tino fua e pelā mo koutou. E folafola atu ne māua a te tala ‵lei ki a koutou, ko te mea ke fulitua koutou ki mea sē aoga konei kae ke ‵fuli atu ki te Atua ola, telā ne faite ne ia te lagi, te lalolagi, te tai, mo mea katoa i ei. 16  Ne talia ne ia i kautama ko ‵teka ke fai ne fenua katoa a mea e ma‵nako latou ki ei, 17  kae ne tuku mai ne ia se molimau e auala i mea ‵lei ne fai ne ia, mai te tuku atu ki a koutou a vaiua mai te lagi mo tau o aso aoga, e faka‵fonu ei otou loto ki meakai mo te fiafia.” 18  Kae faitalia eiloa a lā pati konei, ne faigata o taofi aka ne lāua a te vaitino mai te ofoatuga o taulaga ki a lāua. 19  Ne oko atu a tino Iutaia mai Anitioka mo Ikonio kae fakaoso ne latou a te vaitino, peipei ei ne latou a Paulo ki fatu kae toso atu ki tua o te fa‵kai, mo te mafaufau me ko mate a ia. 20  Kae i te taimi ne mumu atu ei a soko ki a ia, ne tu aka tou tagata ki luga kae fanatu ki te fa‵kai. I te suā aso ne olo ei lāua mo Panapa ki Teipe. 21  I te otiga ne folafola atu ne lāua a te tala ‵lei i te fa‵kai tenā kae maua ne lāua a soko e tokouke i ei, ne ‵foki atu lāua ki Lusa, Ikonio mo Anitioka. 22  Ne fakamalosi atu ne lāua a soko i konā, kae fesoasoani atu ki a latou ke tumau i te fakatuanaki kae fai atu: “E ‵tau mo tatou o ulu atu ki loto i te Malo o te Atua e auala i puapuaga e uke.” 23  E se gata i ei, ne faka‵sopo aka ne lāua a toeaina mō latou i fakapotopotoga takitasi, kae mai te faiga o ‵talo kae fakaliki‵liki, ne tuku atu ei ne lāua a tino konā ki te tausiga a Ieova telā ko tali‵tonu latou ki ei. 24  Ne olo atu lāua i loto i Pisitia kae oko atu ki Pafulia, 25  I te otiga ne folafola atu ne lāua a te muna i Peleka, olo ifo ei ki Atalia. 26  Kae mai i konā, fo‵lau atu ei lāua ki Anitioka, ko te koga telā ne maua ei ne lāua a te alofa tauanoa o te Atua, ko te galuega telā ko oti ne fakataunu faka‵lei ne lāua. 27  I te taimi ne oko atu ei lāua ki konā kae fakamaopoopo mai te fakapotopotoga kātoa, ne fakaasi atu ei ne lāua a mea e uke ko oti ne fai ne te Atua e auala i a lāua, kae ko oti ne ‵tala atu ne ia te mataloa o te fakatuanaki ki fenua fakaa‵tea. 28  ‵Nofo ei lāua mo soko i konā i se taimi tai mata leva.

Fakamatalaga mai lalo