Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 12:1-25

12  Kāti ko te vaitaimi eiloa tenā ne fakasaua atu ei te tupu ko Helota ki nisi tino i te fakapotopotoga.  Ne tamate ne ia a Iakopo te taina o Ioane ki te pelu.  I te iloaga ne ia me ne fakafiafia atu a te mea tenā ki tino Iutaia, ne puke fakapagota foki ei ne ia a Petelu. (Ne ‵tupu a mea konei i aso o te fakamanatuga o falaoa sē faka‵fete.)  Ne puke ne ia tou tagata kae ‵pei atu ki te falepuipui, ke leoleo a ia ne sotia e taki tokofa i ‵tuga e fa, me ne manako a ia o tuku atu a Petelu ki tino Iutaia māfai ko oti te Paseka.  Ne tausi a Petelu i te falepuipui; kae ne ‵talo malosi a te fakapotopotoga ki te Atua e uiga mō ia.  I te taimi ko pili ei o tuku atu ne Helota a ia ki tino, ne moe a Petelu i te po tenā i te va o sotia e tokolua, kae saisai ki seni e lua. E isi foki ne leoleo e ‵tu mai tua o te mataloa o tausi te falepuipui.  Kae kiloke! ne tu atu te agelu a Ieova i ana tafa, kae ne maina atu se mainaga i te potu tenā. Ne fakapatele atu a ia ki te kaokao o Petelu, kae ‵fagu atu a ia, ana muna: “Tu ke vave ki luga!” Ne ‵to ifo ei a seni i ana lima.  Ne fai atu te agelu ki a ia: “Fakatoka kae faka‵mau ou taka.” Ne fai eiloa ne ia a mea konā. Ne toe fai atu te agelu ki a ia: “Pei tou gatu ‵loa kae tautali mai faeloa i a au.”  Ne fano a ia ki tua kae tautali atu faeloa i a ia, kae ne seki iloa ne ia me i mea kolā e ‵tupu e auala i te agelu ne mea ‵tonu eiloa. Ne leake a ia me ne lavea ne ia se fakaasiga. 10  Ne olo atu lāua i tafa o te potukau leoleo muamua penā foki loa mo te lua o potukau kae oko atu ki te mataloa fiti telā e fakafesagai atu ki te fa‵kai. Ne matala mai ki a lāua a te mataloa i a ia eiloa. I te lā ‵toga ki tua, ne olo atu lāua i se auala e tasi, kae ne fakagalo fakavave ei te agelu. 11  Ne kamata o maina a Petelu, kae fai aka penei: “Ko iloa nei ne au me ne uga mai ne Ieova a tena agelu ke fakasao ne ia au mai i lima o Helota mo mea katoa kolā ne fakamoe‵moe ki ei a tino Iutaia ke ‵tupu.” 12  I te otiga ne mafaufau tou tagata ki te mea tenei, fano ei a ia ki te fale o Malia te mātua o Ioane telā e fakaigoa foki ki a Maleko, telā e isi ne nai tino e maopoopo kae ‵talo i ei. 13  Ne tukituki atu a ia i te mataloa, kae vau se tavini tamafine e igoa ki a Lotē ki te mataloa. 14  I te lagonaga ne ia me ko te leo o Petelu, ne fiafia malosi tou fafine telā ne seki ‵tala ei ne ia te mataloa, kae ne toe tele ki loto o fakailoa atu i a Petelu telā ko tu i te mataloa. 15  Olotou muna ki a ia: “A koe ko fakavalevale.” Kae ne fakamaoni atu ne ia i a ia e tonu eiloa. Ne fai atu latou: “Ko tena agelu eiloa tenā.” 16  Kae ne tukituki mai faeloa a Petelu i tua. I te ‵talaatuga ne latou te mataloa, lavea ei ne latou a ia kae ko oko eiloa i te lotou ofo. 17  Ne fakatu atu tena lima ke se logoa latou kae fakamatala likiliki atu ne ia a te auala ne ave ei a ia ne Ieova ki tua mai te falepuipui, kae fai atu: “Fakailoa atu a mea konei ki a Iakopo mo te kau taina.” Ne fano ei a ia ki tua kae faimalaga atu ki se isi koga. 18  I te taeaoakaga, ne kinau malosi a sotia e uiga ki te mea ne tupu ki a Petelu. 19  Ne salasala malosi a Helota ki a ia. Ne seki maua ne ia, sukesuke ei ne ia a leoleo kae fakatonu atu ke ave latou o fakasala. Ne fanatu ei a ia mai Iuta ki Kaisaleia o nofo i konā i se vaitaimi. 20  Ne kaitaua a ia ki tino o Tulo mo Saitonu. Ne olo fakatasi atu a tino konā ki a ia, kae i te otiga ne fakatalitonu atu latou ki a Palasitone, te tagata telā e tausi ne ia a mea a te tupu, ne fakamolemole atu ei latou ke maua se filemu, me ne maua a meakai a te lotou fenua mai te fenua o te tupu. 21  I te aso e tasi, ne pei ei a Helota ki teuga o te tupu kae sagasaga i luga i te nofoga fakamasino kae kamata o lāuga atu i mua o tino katoa. 22  Ne kamata ei o paka‵laga mai a tino katoa kolā ne maopoopo i konā: “A te leo tenā se leo o se atua, kae e sē se tagata!” 23  I konā eiloa ne ta fakavave ei a ia ne te agelu a Ieova, me ne seki faka‵malu atu a ia ki te Atua; kae ne kai a ia ne anufe. Ne mate atu eiloa tou tagata. 24  Ne gasolo atu faeloa ki mua a te muna a Ieova kae salalau atu foki. 25  Kae e pelā mo Panapa mo Saulo, i te taimi ne maea faka‵lei ei a galuega fesoasoani kolā ne fai ne lāua i Ielusalema, ne ‵foki atu kae puke ne lāua a Ioane, telā e fakaigoa foki ki a Maleko.

Fakamatalaga mai lalo