Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 11:1-30

11  Ne lagona ne te kau apositolo mo taina kolā ne ‵nofo i Iuta me ko talia foki ne tino o fenua fakaa‵tea a te muna a te Atua.  Tela la, i te fanatuga a Petelu ki Ielusalema, ne kinau atu ki a ia a tino kolā e ‵lago ki te pilitome,  olotou muna me ko oti ne fanatu a ia ki te fale o tino kolā e seki pilitome kae ‵kai fakatasi mo latou.  Ona ko te mea tenā ne fakamatala atu ei ne Petelu a mea likiliki ki a latou, ana muna:  “Au ne nofo i te fa‵kai ko Iopa kae ‵talo i ei, kae ne lavea ne au i se fakaasiga se mea pelā me se laugatu lino lasi e tukutuku ifo i ana feitu e fa mai te lagi, kae ne tuku tonu ifo eiloa ki a au.  Ne kilo ‵tonu atu au ki loto, lavea ei ne au a manu vaefa o te laukele, manu fe‵kai, manu ‵tolo mo manu eva o te lagi.  Ne lagona foki ne au se leo e fai mai penei ki a au, ‘Petelu, tu ki luga, ‵ta kae kai!’  Kae ne fai atu au, ‘Ikai, e te Aliki, me ne seki faulu aka eiloa ki toku gutu se mea lailai io me se mea se ‵ma penā.’  Ne tali mai i te lua o taimi a te leo mai te lagi, ‘Sa toe taku ne koe me e lai‵lai a mea kolā ko oti ne faka‵ma ne te Atua.’ 10  Ne tupu foki te mea tenei i te tolu o taimi, kae ne toe avaka ei a mea katoa ki te lagi. 11  Kae, kiloke! i te taimi foki eiloa tenā ne ‵tu mai ei a tāgata e tokotolu ki te fale telā ne ‵nofo ei matou, ne uga mai latou ne se tagata mai Kaisaleia ki a au. 12  Ne fai mai te agaga ke fano au i a latou, kae ke mo a eiloa au e fakalotolotolua. Ne olo foki matou mo taina e tokoono konei, kae ne ulu atu matou ki te fale o te tagata tenei. 13  “Ne fakailoa mai ne ia ki a matou a te laveaga ne ia a te agelu i loto i tena fale kae fai atu, ‘Uga atu ne tāgata ki Iopa ke aumai a Simona telā e fakaigoa foki ki a Petelu, 14  kae ka fai atu ne ia ki a koe a mea kolā ka faka‵sao ei koe mo tou kāiga kātoa.’ 15  Kae i te taimi ne kamata ei au o faipati atu kae oko ifo te agaga tapu ki luga i tino konā e pelā eiloa mo te taimi ne oko mai ei ki a tatou i te kamataga. 16  Ona ko te mea tenei, ne masaua ei ne au a pati a te Aliki kolā e fai sale mai, ‘A Ioane e papatiso ki te vai, kae ka papatisogina koutou ki te agaga tapu.’ 17  Tela la, kafai ne tuku atu ne te Atua a te meaalofa faivasaga ki a latou telā ne tuku mai foki ki a tatou kolā ne tali‵tonu ki te Aliki ko Iesu Keliso, ko oi la au ke ‵teke atu ki te Atua?” 18  I te lagonaga ne latou a mea konei, ne talia ne latou te fakamatalaga tenā kae tavae atu ki te Atua, olotou muna: “Ko tuku atu foki ne te Atua te avanoaga ke sala‵mo a tino o fenua fakaa‵tea ko te mea ke maua ne latou a te ola.” 19  Fakamuli ifo, ne oko atu eiloa a tino kolā ne salalau valevale ona ko puapuaga ne ‵sae aka i te mate o Setefano ki Foinikia, Kupelu mo Anitioka, kae ne seki faipati atu ne latou a te muna ki se isi tino kae ki tino Iutaia fua. 20  Kae e isi ne tino i a latou, ne tāgata mai Kupelu mo Kulene ne olo atu ki Anitioka kae kamata o fai‵pati atu ki tino kolā e fai‵pati ki te ‵gana Eleni, o folafola atu te tala ‵lei e uiga ki te Aliki ko Iesu. 21  E se gata i ei, ne fakatasi atu a Ieova ki a latou kae e tokouke a tino ne tali‵tonu kae ‵fuli mai ki te Aliki. 22  Ne oko atu te tala e uiga ki a latou ki te fakapotopotoga i Ielusalema, kae ne uga atu ne latou a Panapa ki Anitioka. 23  I te taimi ne oko atu ei a ia kae lavea ne ia te alofa tauanoa o te Atua, ne fiafia malosi tou tagata. Ne kamata ei o fakamalosi atu a ia ki a latou katoa ke ‵piki ‵mau ki te Aliki mo olotou loto kātoa; 24  me i a ia se tagata ‵lei kae e ‵fonu i te agaga tapu mo te fakatuanaki. Kae ona ko te mea tenā, ne tali‵tonu ei a tino e tokouke ki te Aliki. 25  Tela la, fano ei a ia ki Taso o salasala ki a Saulo. 26  I te mauaga ne ia a Saulo avatu ei ne ia ki Anitioka. Ne ‵nofo fakatasi lāua mo tino i te fakapotopotoga i te tausaga kātoa kae akoako atu ne lāua se vaitino i ei. Ne kamata i Anitioka o fakaigoa a soko ki Kelisiano, e ‵tusa eiloa mo te loto o te Atua. 27  I aso konā, ne olo sale atu a pelofeta mai Ielusalema ki Anitioka. 28  Ne sae mai se tokotasi i a latou e igoa ki a Akapasi kae fakaasi mai e auala i te agaga tapu me ko pili o oko atu se oge lasi ki te lalolagi nofoaki kātoa; kae ne tupu eiloa te mea tenā i taimi o Kalaotia. 29  Ne fakaiku aka ne soko katoa ke avatu se fesoasoani ki taina kolā e ‵nofo i Iuta, e ‵tusa mo te mea e mafai ne latou taki tokotasi o tuku atu. 30  Ne fai eiloa ne latou a te mea tenā, kae ne avatu ne latou ki toeaina e auala i a Panapa mo Saulo.

Fakamatalaga mai lalo