Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Galuega 10:1-48

10  E isi se tagata e nofo i Kaisaleia e igoa ki a Konelio, se ofisa o te kautau, telā e taku ko te kautau a Italia.  A ia se tagata lotu kae mataku ki te Atua e pelā foki mo tena kāiga kātoa. Ne avatu ne ia ki tino a meaalofa e uke kae ‵talo faeloa ki te Atua.  Kāti ko te iva* o itula o te aso, ne lavea atu ei ne ia i se fakaasiga, se agelu a te Atua e fanatu ki a ia kae fai atu: “Konelio!”  Ne kilo ‵tonu atu a Konelio ki a ia mo te mataku, kae fesili atu: “Te Aliki, se a te mea e manako koe ki ei?” Ana muna ki a ia: “Ko oti ne oko aka au ‵talo mo au meaalofa ki mua o te Atua e pelā me se fakamasauaga.  Tela la, uga atu nei ne tino ki Iopa o aumai a Simona telā e fakaigoa foki ki a Petelu.  A te tagata tenei se mālō a Simona, se tagata faite mea ki pakili o manu, a ko tena fale e pili ki te tai.  I te taimi eiloa ne fano keatea ei te agelu telā ne faipati atu ki a ia, ne kalaga atu a ia ki ana tavini e tokolua mo se sotia e tokotasi, se tagata lotu, mai i ana sotia kolā e ga‵lue faeloa mō ia,  kae ne fakaasi atu ne ia a mea katoa ki a latou kae uga atu ke olo ki Iopa.  I te suā aso, a koi ma‵laga atu latou kae ko pili atu ki te fa‵kai, ne fanaka a Petelu ki te tuafale, kāti i te ono* o itula, o ‵talo i ei. 10  Kae ne fia kai malosi a ia. A koi fakatoka ne latou a meakai kae oko atu ki a ia se fakaasiga. 11  Ne lavea ne ia te lagi e matala mo se mea e fanaifo mai te lagi e pelā me se laugatu lino lasi e tukutuku ifo i ana feitu e fa ki te lalolagi. 12  I loto i ei ko vaegā manu kese‵kese, ko manu vaefa mo manu ‵tolo i te laukele mo manu eva o te lagi. 13  Ne oko atu se leo ki a ia: “Petelu, tu ki luga, ‵ta kae kai!” 14  Kae ne fai atu a Petelu: “Ikai, e te Aliki, me i a au e seki kai aka eiloa ki se mea lailai kae se ‵ma penā.” 15  Ne toe faipati atu a te leo ki a ia, i te lua o taimi: “Sa toe taku ne koe me e lai‵lai a mea kolā ko oti ne faka‵ma ne te Atua.” 16  Ne toe lagona ne ia a te leo tenā i te tolu o taimi, ko te mea eiloa ko avaka a te mea e pelā me se laugatu ki te lagi. 17  A koi ‵numi te mafaufau o Petelu me se a te uiga o te fakaasiga ne lavea ne ia kae ko ‵tu atu i te mataloa o te ‵pui a tāgata kolā ne uga atu ne Konelio ke ‵sala ki te fale o Simona. 18  Ne ka‵laga atu latou kae fesili atu me ko Simona telā e fakaigoa foki ki a Petelu e nofo i konā. 19  A koi mafaufau a Petelu e uiga ki te fakaasiga kae fai atu te agaga tapu ki a ia: “Kiloke! E tokotolu a tāgata kolā e ‵sala mai ki a koe. 20  Tela la, tu ki luga, fano ki lalo kae olo mo latou, ke mo a eiloa koe e fakalotolotolua, me ne uga mai ne au a latou.” 21  Ne fanaifo a Petelu ki tāgata konei kae fai atu: “Kiloke! Ko au tenei e ‵sala koutou ki ei. Kaia ne o‵mai ei koutou ki konei?” 22  Olotou muna: “A Konelio, se ofisa o te kautau, se tagata amiotonu kae mataku ki te Atua kae e taku ‵lei foki ne tino Iutaia katoa, ne tuku atu ki a ia te fakatonuga a te Atua e auala i se agelu, ke uga mai se fekau ke fanatu koe ki tena fale ko te mea ke fakalogologo a ia ki au pati kolā ka fai atu.” 23  Ne ‵kami ne ia a latou ki loto kae talimalo atu ki a latou. I te suā aso ne tu a ia ki luga, olo ei mo latou, kae ne tau‵tali atu i a ia a nisi taina kolā ne ‵nofo i Iopa. 24  I te aso mai tua ifo, ne oko atu a ia ki Kaisaleia. Ne fakatalitali eiloa a Konelio ki a latou kae ko oti ne fakamaopoopo mai ne ia ana kāiga mo ana taugasoa ‵pili. 25  I te uluatuga a Petelu ne fakafetaui atu a Konelio ki a ia, kae fakasiga ifo ki ana vae o ifo atu ki a ia. 26  Kae ne fakatu aka ne Petelu a ia, kae fai atu: “Tu ki luga, au foki se tagata fua.” 27  A koi sau‵tala lāua ne ulu a ia ki loto kae ne maua atu ne ia a tino e tokouke e maopoopo mai i ei, 28  kae ne fai atu a ia ki a latou: “E iloa ‵lei ne koutou me e tapu i te tulafono ke kau io me faipati atu se tino Iutaia ki se tino mai se isi fenua; kae ko oti ne fakaasi mai ne te Atua ke se toe taku ne au se tino me e lailai io me e se ‵ma. 29  Tenā te pogai ne loto fiafia ei au o vau i te taimi ne uga atu ei te fekau ki a au. Tela la, e fia iloa ne au te pogai ne uga atu ei koutou ke vau au.” 30  Ne fai atu a Konelio: “I te fa o aso ko ‵teka i te itula eiloa tenei, ko te iva* o itula, ne ‵talo au i toku fale kae ne tu mai i oku mua se tagata e malapu‵lapu ana gatu, 31  kae ne fai mai, ‘Konelio, ko oti ne lagona kae talia tau ‵talo kae e masaua ne te Atua au meaalofa. 32  Tela la, uga atu se fekau ki Iopa kae ‵sala atu ki a Simona telā e fakaigoa foki ki a Petelu. A te tagata tenei se mālō i te fale o Simona, te tino faite mea ki pakili o manu, kae e nofo pili ki te tai. 33  Ne uga fakavave atu taku fekau ki a koe, kae e ‵lei i a koe ne vau eiloa. Tela la, i te taimi tenei ko maopoopo atu matou katoa i mua o te Atua ke fakalogo‵logo ki mea katoa kolā ne fakatonu atu ne Ieova ke fai mai ne koe.” 34  Ne kamata a Petelu o faipati atu: “Nei la, ko malamalama faka‵lei au me i te Atua e se fakailoga tino, 35  kae ko te tino mai so se fenua telā e mataku ki a ia kae fai mea tonu e talia eiloa ne ia. 36  Ne fai atu tena muna ki tino Isalaelu kae folafola atu ki a latou te tala ‵lei o te filemu e auala i a Iesu Keliso: “A Ia tenei ko te Aliki o tino katoa. 37  E iloa ne koutou a te mataupu ne sau‵tala faeloa ki ei i Iuta kātoa, telā ne kamata i Kalilaia mai tua o te papatisoga ne talai atu ne Ioane, 38  e uiga ki a Iesu mai Nasaleta. Ne fakaeke a ia ne te Atua ki te agaga tapu mo te ‵mana, kae ne fano a ia i loto i te fenua kātoa o fai a mea ‵lei kae faka‵lei atu a tino katoa kolā ne fakapuapuaga ne te Tiapolo, ona ko te Atua ne fakatasi atu ki a ia. 39  Nei la, ko molimau matou ki mea katoa kolā ne fai ne ia i te fenua o tino Iutaia mo Ielusalema; kae ne tamate foki ne latou a ia i luga i te lakau fakasaua. 40  Ne toe fakatu aka a Ia ne te Atua i te tolu o aso kae talia ne ia ke fakaasi atu a ia, 41  e se ki tino katoa, kae ki molimau kolā ko leva ne filifili ne te Atua, e pelā foki mo matou, kolā ne ‵kai kae inu fakatasi mo ia mai tua o tena toe fakatuakaga mai te mate. 42  Ne fakatonu mai foki a ia ki a matou ke talai atu ki tino kae ke tuku atu se molimau maea me i a Ia ko te tino ne ‵tofi ne te Atua ke fai mo fai te famasino o tino ola mo tino ‵mate. 43  Ne molimau mai a pelofeta katoa ki a ia, me ko so se tino e fakatuanaki ki a ia ka fakamagalo ana agasala e auala i tena igoa.” 44  A koi faipati atu a Petelu e uiga ki mea konei kae ne ‵ligi ifo te agaga tapu ki a latou katoa kolā ne fakalogo‵logo ki te muna. 45  Kae ne ofo a tino tali‵tonu kolā ne olo atu mo Petelu kae ne pilitome, me ko ‵ligi atu foki a te meaalofa faivasaga ko te agaga tapu ki luga i tino o fenua fakaa‵tea. 46  Me ne lagona ne latou me ko fai‵pati latou ki ‵gana kese‵kese kae tavae atu ki te Atua. Ne fai atu ei a Petelu: 47  “E a, e isi se tino e mafai o taofi ne ia a latou kolā ko oti ne maua ne latou te agaga tapu e penei eiloa mo tatou, mai te papatisoga o latou ki te vai? 48  Ne fakatonu atu a ia ke papatiso latou i te igoa o Iesu Keliso. Fakamolemole atu ei latou ke nofo mai a ia i nai aso.

Fakamatalaga mai lalo

 E ‵pau mo te itula e 3 i te fakaafiafi māfai e lau mai i te saeakaga o te la.
 E ‵pau mo te itula e 12 i te tutonu māfai e lau mai i te saeakaga o te la.
 Ke onoono ki te fakamatalaga mai lalo o te fuaiupu e 3.