Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Galuega 1:1-26

1  Teofilo, a te tusi muamua telā ne tusi ne au e aofia i ei a mea katoa kolā ne kamata o fai kae akoako atu ne Iesu,  ke oko ki te aso telā ne avaka ei a ia ki te lagi, kae ko oti ne tuku atu ne ia a fakatonuga e auala i te agaga tapu ki apositolo kolā ne filifili aka ne ia.  Mai tua o ana logo‵maega ne fakaasi atu ne ia a ia eiloa ki a latou konei, e auala i fakamaoniga mautinoa e uke i a ia ko toe ola mai. Ne lavea ne latou a ia i aso e fasefulu kae ne fakamatala atu ne ia a mea e uiga ki te Malo o te Atua.  A koi maopoopo a ia mo latou ne fakatonu atu a ia penei: Sa tiaki ne koutou a Ielusalema, kae ‵nofo fakatali‵tali faeloa ki te mea telā ne folafola mai ne te Tamana, kae ne lagona ne koutou mai i a au;  me ne papatiso eiloa a Ioane ki te vai, kae sē leva nei ka papatiso eiloa koutou ki te agaga tapu.  I te taimi ne maopoopo ei latou, ne fesili atu latou ki a ia: Te Aliki, e a, ka toe fakatu aka ne koe a te Malo o Isalaelu i te taimi tenei?”  Ana muna ki a latou: E se ‵tau o iloa ne koutou a taimi mo tau o aso kolā ko oti ne fakatoka ne te Tamana i tena pule eiloa.  Ka maua ne koutou a te ‵mana māfai e oko atu te agaga tapu ki luga i a koutou, kae ka fai koutou mo molimau ki a au i Ielusalema, i Iuta kātoa mo Samalia, ke oko eiloa ki toe koga ‵mao i te lalolagi.”  I te otiga o ana pati konei, ne masagi aka a ia ki luga kae kilo‵kilo atu eiloa latou, kae ne ‵pono a ia ne se kaumana. 10  A koi kilo‵kilo atu latou ki tena fanakaga ki te lagi, ne ‵tu atu i olotou tafa a tāgata e tokolua e ‵pei ki gatu ‵kena, 11  kae fai atu lāua: Tāgata Kalilaia, kaia e ‵tu ei koutou kae kilo‵kilo ki te lagi? A Iesu telā ne avaka mai i a koutou ki luga i te lagi ka toe foki mai i te auala eiloa telā ne lavea ne koutou e fanaka ei a ia ki te lagi. 12  Ne toe ‵foki atu latou ki Ielusalema mai te mauga telā e taku ko te Mauga o Olive, telā e nofo ki se kilomita* e tasi te ‵mao mai i Ielusalema. 13  I te lotou okoatuga, ne olo aka latou ki te potu i luga, telā e ‵nofo i ei latou; ko Petelu, Ioane, Iakopo, Anitelea, Filipo, Toma, Patolomaio, Mataio, Iakopo te tama a Alefaio, Simona te tino loto finafinau, mo Iuta te tama a Iakopo. 14  Ne ‵talo atu faeloa a latou katoa i konā, fakatasi mo nisi fāfine penā foki loa mo Malia te mātua o Iesu mo taina o Iesu. 15  I aso konā ne tu aka ei a Petelu i mua o te kau taina kae fai atu (kāti e ‵tusa mo te toko 120 te aofaki o latou katoa): 16  Taina, e ‵tau o fakataunu a pati i tusitusiga tapu, kolā ne faipati ki ei te agaga tapu i aso mua e auala i a Tavita, e uiga ki a Iuta, telā ne takitaki ne ia a latou kolā ne puke fakapagota ne latou a Iesu, 17  me ne aofia a ia i a tatou kae ne fai foki tena tusaga i te galuega tenei. 18  (Tela la, ko te tagata eiloa tenei, ne ‵togi ne ia se manafa ki tupe kolā ne maua i ana faifaiga sē ‵tonu, ne tō kae sulu tena ulu ki lalo, mapā tena tinae, kae ta‵tela ana gakau ki tua. 19  Ne iloa ne tino katoa i Ielusalema te mea tenei, fakaigoa ei te manafa tenā i te lotou ‵gana ki a Akeletama, ko tena uiga ko te Manafa o Toto.) 20  Me e tusi i te tusi ko Salamo, ‘Ke lepe tena fale, kae ke se toe ai se tino e nofo i ei, kae, ‘Ke puke ne se isi tino tena tofi e pelā me se ovasia.’ 21  Tela la, e ‵tau o sui a ia ne se tokotasi mai tāgata kolā ne ‵kau fakatasi sāle tatou i te taimi ne galue ei te Aliki ko Iesu i a tatou. 22  E kamata mai i tena papatisoga ne Ioane ke oko ki te aso ne avaka ei a ia ki luga mai i a tatou, e ‵tau o molimau se tokotasi o tāgata konei fakatasi mo tatou e uiga ki tena toetu.” 23  Tela la, ne ‵tofi aka ne latou se tokolua tino, ko Iosefa, telā e taku ko Pasapa, kae fakaigoa foki ki a Tiasitasi, mo Matatia i ei. 24  Ne ‵talo atu latou penei: Ieova, e iloa ne koe a loto o tino katoa, fakaasi mai a te tino telā ko oti ne filifili ne koe mai i tāgata e tokolua konei, 25  ke puke ne ia te galuega tenei mo te tulaga fakaapositolo, telā ne tiaki ne Iuta ko ia ke fano i tena auala eiloa. 26  Ne fai ne latou a te vili i a lāua konei, kae ne fakasino atu a te vili ki a Matatia; telā ne kau atu ei a ia ki te toko sefulutasi apositolo.

Fakamatalaga mai lalo

Ga 1:12  I te ‵gana Eleni, ko “sabbatou . . . odon,” ko te ‵mao telā e mafai o faimalaga i ei se tino Iutaia i te Sapati.