Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Filipi 4:1-23

4  Tela la, e oku taina kolā e alofa au ki ei kae e fia lavea ne au, ko toku fiafia mo toku failoga,* ke ‵tu ‵mautakitaki koutou i te auala tenei i te Aliki, e oku taina fagasele.  E fakamalosi atu au ki a Evotia mo Sunetui ke tasi lā mafaufau i te Aliki.  Ao, e fakatagi atu foki au ki a koe, te tino tonu telā e ga‵lue fakatasi māua, ke tumau i te fesoasoani atu ki fāfine konei, ko fāfine kolā ne ga‵lue fakatasi matou i te tala ‵lei fakatasi mo Kelemene e pelā foki mo nisi o oku taina mo tuagane ga‵lue, kolā ko ‵mau olotou igoa i te tusi o te ola.  Ke fia‵fia faeloa koutou i te Aliki. E toe fai atu au, Ke fia‵fia koutou!  Fai ke iloa ne tino katoa i a koutou ne tino loto malamalama. Ko pili mai te Aliki.  Ke mo a ma manava‵se koutou ki so se mea, kae ke tuku atu a mea katoa kolā e ma‵nako koutou ki ei ki te Atua fakatasi mo otou fakafetai e auala i otou talosaga;  a ko te filemu o te Atua telā e sili fakafia atu i mea katoa kolā e malamalama i ei a tino ka puipui ne ia otou loto mo otou mafaufau e auala i a Keliso Iesu.  A ko te ‵toe mea, e oku taina, so se mea telā e tonu, so se mea telā e manavase malosi ki ei, so se mea telā e amiotonu, so se mea telā e ‵ma, so se mea telā e alofagina, so se mea telā e uke ana tavaega, so se mea telā e ‵lei mo so se mea telā e ‵tau o tavaegina, ke mafau‵fau faeloa ki mea konei.  Ko mea kolā ne iloa kae talia kae lagona kae lavea ne koutou mai i a au, ke fai faeloa ne koutou, kae ka i luga i a koutou a te Atua o te filemu. 10  E lasi ‵ki toku fiafia i te Aliki me ko toe amanaia koutou ki a au. E tiga eiloa ne mafau‵fau koutou ki a au, ne seki ai se avanoaga ke fakaasi mai ne koutou te mea tenā. 11  E se fai atu ne au a te mea tenei ona ko au e manako ki ne mea, me ko oti ne iloa ne au o fai ke lotomalie au ki so se mea mai lalo i so se fakanofonofoga. 12  E iloa ne au o ola māfai ko se uke aku meakai, e pelā foki māfai ko uke aku meakai. Ko oti ne iloa ne au aku mea e ‵tau fai māfai ko makona au e pelā foki māfai ko fiakai au mai lalo i fakanofonofoga katoa, māfai ko uke aku mea io me māfai ko seai ne aku mea. 13  Me e maua ne au a te malosi i mea katoa e auala i a ia telā ne tuku mai ne ia te ‵mana ki a au. 14  E tiga te feitu tenā, ne fai eiloa ne koutou a te mea ‵lei i te ‵kau mai ki oku puapuaga. 15  E tonu, e iloa foki ne koutou, e tino Filipi, me mai tua o te iloaga ne koutou o te tala ‵lei, i te taimi ne tiaki ei ne au a Maketonia, e seai eiloa se fakapotopotoga ne ‵kau fakatasi matou i te tukumaiga mo te avatuga o meaalofa, kae na ko koutou fua. 16  Me e lua taimi ne aumai ei ne koutou ki a au i Tesalonia a mea mō oku tausi. 17  E se ‵sala atu au ki te meaalofa, kae e ‵sala atu fua au ki fuataga kolā e fakauke aka ei otou koloa.* 18  E tiga te feitu tenā, ko maua ne au a mea katoa e manako au ki ei kae ko silia atu foki. Ko malie toku loto me ko oti ne maua ne au mai i a Epafeloti a te mea telā ne aumai ne koutou, se mea manogi gali, se taulaga telā e talia kae fakafiafia malosi atu ki te Atua. 19  Kae ka toe tuku atu ne toku Atua a mea katoa e ma‵nako koutou ki ei e ‵tusa mo te maumea o tena ‵malu e auala i a Keliso Iesu. 20  Ke i luga i te ‵tou Atua mo te ‵tou Tamana a te ‵malu ki te se-gata-mai, ki te se-gata-mai eiloa. Amene. 21  ‵Moli atu oku alofaga ki tino tapu katoa kolā e ‵kau fakatasi mo Keliso Iesu. Ko a‵lofa atu foki a taina konei e ‵nofo mo au i konei. 22  Ko ‵moli atu a alofaga o tino tapu katoa, kae maise eiloa a latou kolā i te kaufale o Kaisala. 23  Ke ga‵lue tasi te alofa tauanoa o te Aliki ko Iesu Keliso mo te agaga telā e fakaasi mai ne koutou.

Fakamatalaga mai lalo

 I te ‵gana Eleni, “foualiki.”
 “E fakasino atu ki koloa faka-te-agaga.”