Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Filipi 2:1-30

2  Tela la, kafai e maua ne koutou se fakamalosiga i a Keliso, se fakamafanafanaga ona ko te alofa, e amanaia a te suā tino ki te suā tino, e a‵lofa atafai kae e aga‵lei,  e fakakatoatoa ei ne koutou toku fiafia me i a koutou e tasi i otou mafaufau kae e maua foki ne koutou a te alofa e tasi, e fealofani katoatoa koutou, kae e tasi foki koutou i otou manatu.  Ke se fai ne koutou se mea e tasi i te loto fakatautau io me ko te fia takutakua, kae mafau‵fau mo te loto maulalo me e tāua atu a nisi tino i a koutou.  Ke se onoono fua koutou ki mea e ‵lei ei koutou kae ki mea foki e ‵lei ei a nisi tino.  Ke fakatumau te kilokiloga tenei i otou mafaufauga e pelā eiloa mo Keliso Iesu,  me e tiga eiloa ne foliga a ia ki foliga o te Atua, ne seki mafaufau aka eiloa a ia o kinau atu ke ‵pau lāua mo te Atua.  Ikai, kae ne tiaki ne ia tena tulaga mua kae fai mo fai se pologa i tena faiga e pelā me se tagata.  Kae e sili atu i te mea tenā, i tena faiga mo fai se tagata, ne fakamalalo ne ia a ia eiloa kae ne fakalogo foki ke oko eiloa ki te mate, ao, ko te mate i luga i te lakau fakasaua.  Ko te pogai eiloa tenei ne fakamaluga aka ei ne te Atua a ia ki se tulaga telā e maluga atu kae tuku atu ki a ia mo te kaimalie a te igoa telā e sili atu i igoa katoa, 10  ko te mea ke ifo atu ki a ia a tino katoa i te lagi mo tino i te lalolagi mo tino i lalo i te laukele i te igoa o Iesu, 11  kae ka fakaasi ‵tonu atu ei i gutu o tino katoa i a Iesu Keliso ko te Aliki mō te vikiga o te Atua te Tamana. 12  Tela la, e oku taina pele, e pelā eiloa mo te otou tumau i te faka‵logo i aso mua, e se gata fua i taimi e fakatasi ei tatou, kae e silia atu māfai au e galo, ke tumau i te ga‵lue mō te otou fakaolataga mo te ma‵taku mo te pole‵pole. 13  Me ko te Atua eiloa telā e fai ne ia koutou ke ma‵losi, i te tukuatuga o te fiafia mo te ‵mana ke ga‵lue koutou e ‵tusa mo te mea e fiafia a ia ki ei. 14  Ke fai faeloa ne koutou a mea katoa e aunoa mo te mui‵mui mo te kinau, 15  ko te mea ke seai se mea e ‵losi atu ki a koutou, kae ke fai koutou mo tama a te Atua e aunoa mo se pona i loto i te kautama fai mea piko‵piko kae ‵numi valevale tenei, telā e maina atu koutou ki ei e pelā me ne moli i te lalolagi. 16  Ke puke ‵mau ki te muna o te ola, ko te mea ke isi se pogai e fiafia ei au i te aso o Keliso, i te iloa atu me ne aoga eiloa taku tele mo toku galue ‵mafa. 17  Kae e tiga eiloa e ‵ligi atu au e pelā me se taulaga uaina ki luga i otou taulaga mo otou galuega kolā ne iku mai i te otou fakatuanaki, e fiafia eiloa au fakatasi mo koutou katoa. 18  E penā foki te auala e ‵tau ei o fia‵fia fakatasi koutou mo au. 19  Kae e fakamoemoe au ki te Aliki ko Iesu ke uga atu ne au a Timoteo ki a koutou i se taimi pili mai mua nei, ko te mea ke malosi toku loto māfai e lagona ne au a tala e uiga ki a koutou. 20  Me e seai aka foki se isi tino i konei e ‵pau mo ia, telā ka saga faka‵lei atu ki mea e uiga ki a koutou. 21  Me e ‵sala atu eiloa a nisi tino ki mea e ma‵nako latou ki ei, kae e se ki mea e manako ki ei a Keliso Iesu. 22  E iloa ne koutou a te fakamaoniga telā ne fakaasi atu eiloa ne ia, me ne ga‵lue fakapologa eiloa māua i te fakatelega ki mua o te tala ‵lei e pelā eiloa me se tama mo tena tamana. 23  Tela la, tenei eiloa te tino e fakamoemoe au ke uga atu i te taimi e iloa ei ne au a te mea ka tupu ki a au. 24  Me e talitonu eiloa au ki te Aliki me ka fanatu foki au i se taimi pili mai nei. 25  Kae i te taimi tenei e mafaufau au me e ‵tau o uga atu a Epafeloti, ko toku taina telā e ga‵lue fakatasi māua e pelā me ne sotia, kae ko te otou sui foki mo toku fesoasoani i mea e manako au ki ei, 26  me ko oko eiloa i tena fia fetaui mo koutou katoa kae e māfatia foki tena loto me i a koutou ne ‵logo i a ia ne masaki. 27  E tonu, ne masaki a ia kae toeitiiti ko mate; kae ne maua ne ia te alofa fakamagalo o te Atua, e se gata fua ki a ia, kae e pelā foki ki a au, ko te mea ke mo a ma taotaomaki mai ki a au a te fanoanoa. 28  Tenā te pogai ka uga fakavave atu ei ne au a ia, ko te mea ke fia‵fia koutou māfai e toe fetaui koutou kae ke tai feoloolo aka foki toku fanoanoa. 29  Tela la, fakafeiloai atu ki a ia i te fakatalofa masani i te Aliki mo te fiafia lasi, kae āva malosi faeloa ki vaegā tino penā mo te loto fiafia, 30  me toeitiiti ko mate a ia ona ko te galuega a te Aliki, i te talia ne ia o mea fakama‵taku, ko te mea ke sui ne ia koutou me i a koutou e se ‵nofo i konei o fesoasoani mai ki a au.

Fakamatalaga mai lalo