Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Filipi 1:1-30

1  Ko Paulo mo Timoteo, ko pologa a Keliso Iesu, ki tino tapu katoa i te ‵kau fakatasi mo Keliso Iesu kolā e ‵nofo i Filipi, fakatasi mo ovasia mo tavini fesoasoani:  Ke i luga i a koutou a te alofa tauanoa mo te filemu o te Atua te ‵tou Tamana mo te Aliki ko Iesu Keliso.  E fakafetai faeloa au ki te Atua māfai e masaua ne au a koutou  i aku talosaga katoa e fai mō koutou. E ofo atu ne au a ‵talo takitasi mo te fiafia,  ona ko te otou tusaga ko oti ne fai mō te tala ‵lei mai te aso muamua ke oko mai eiloa ki te taimi nei.  E talitonu eiloa au ki te mea tenei, me i te Atua telā ne kamata ne ia te galuega ‵lei i a koutou ka fakaoti eiloa ne ia te galuega tenā ke oko ki te aso o Iesu Keliso.  Se mea ‵tau ke mafaufau au ki te mea tenei e uiga ki a koutou katoa, ona ko te mea e pele koutou i toku loto. Ko koutou kolā ne ‵kau fakatasi mo au i taimi ne falepuipui ei au mō te ‵puluga mo te fakamau‵tuga o te tala ‵lei mai lalo i te tulafono, ona ko te alofa tauanoa.  Me i te Atua ko taku molimau e uiga ki toku loto naunau ke fetaui tatou katoa i te alofa e pelā eiloa mo te alofa atafai o Keliso Iesu.  Kae tenei te mea e ‵talo faeloa au e uiga ki ei, ko te mea ke gasolo aka faeloa o lasi i a koutou a te alofa fakatasi mo te iloa tonu mo te malamalama katoatoa; 10  ko te mea ke fakamautinoa aka ei ne koutou a mea kolā e sili atu i te tāua, ke seai se pona i a koutou kae ke mo a ma fai koutou mo fakalavelave* ki te fakatuanaki o nisi tino ke oko ki te aso o Keliso. 11  Kae ke faka‵fonu koutou ki fuataga o te amiotonu, kolā e maua e auala i a Iesu Keliso, mō te ‵malu mo te vikiga o te Atua. 12  E manako au ke iloa ne koutou, e oku taina, me i mea kolā ne ‵tupu ki a au ne fai ei ke gasolo atu ki mua a te tala ‵lei, 13  ko te mea ke iloa ne tino katoa mo Sotia Leoleo a te Tupu me i a au ne falepuipui ona ko Keliso. 14  Nei la, ko oti ne maua ne te tokoukega o taina i te Aliki a te loto malosi ona ko taku ‵peiga ki te falepuipui, kae ko gasolo aka o loto ‵toa latou o faipati atu te muna a te Atua e aunoa mo te ma‵taku. 15  E tonu, e talai atu ne nisi tino a te Keliso ona ko te loto masei mo te fai fili, kae e talai atu ne nisi tino a te Keliso ona ko te loto ‵lei. 16  E folafola atu ne tino loto ‵lei a Keliso ona ko te alofa, me e iloa ne latou i a au ne ‵tofi aka ke ‵pulu ne au a te tala ‵lei. 17  A ko tino kolā e talai atu ne latou ona ko te loto masei mo te fai fili, e se fai ne latou mō te pogai tonu, me e taumafai latou o faka‵tupu a fakalavelave ki a au i te falepuipui. 18  Se a la tena ikuga? Faitalia me se a te auala ne talai atu i ei, se auala sē tonu io me i se auala tonu, e folafola atu eiloa i ei a Keliso kae e fiafia au ona ko te mea tenei. E tonu, ka fiafia faeloa au 19  me e iloa ne au me ka iku atu a te mea tenei ki toku fakaolataga, ona ko otou ‵talo fakatasi mo te ‵lago mai o te agaga o Iesu Keliso. 20  E fetaui eiloa te mea tenei mo te mea telā ne fakatalitali au ki ei mo te loto naunau kae fakamoemoe au ko te mea ke se mā au i so se feitu, kae ke fakaaoga toku saolotoga kātoa o faipati atu ke fakamaluga aka ei a Keliso e auala i toku foitino, i te taimi nei e pelā eiloa mo aso mua, faitalia me ko au e ola io me mate. 21  Me e pelā mo au, e ola au mō Keliso, kae kafai au e mate, ko toku manuia eiloa tenā. 22  Kafai e tumau au i te ola i te foitino, tenei eiloa te fuataga o taku galuega—kae e se fakaasi atu ne au me tefea te mea ne filifili ne au. 23  E se iloa ne au me se a taku filifiliga ka fai ki mea e lua konei; me e manako au ke na fakasaoloto au ko te mea ke na ‵nofo fakatasi māua mo Keliso, kae e ‵lei fakafia atu a te mea tenā. 24  Kae e sili atu i te ‵lei ke tumau au i te ola i te foitino ona ko koutou. 25  Ona ko toku talitonu ki te mea tenei, e iloa ne au me ka tumau kae fakatasi au mo koutou katoa ko te mea ke ga‵solo koutou ki mua kae ke fia‵fia ona ko te otou fakatuanaki, 26  ko te mea ke ‵fonu maligiligi te otou fia‵fia i a Keliso Iesu ona ko au māfai e toe fakatasi atu au ki a koutou. 27  Ko otou amioga fua ke fetaui mo te tala ‵lei e uiga ki a Keliso, ko te mea kafai e fanatu au ki a koutou io me e galo au, ke lagona fua ne au a tala e uiga ki a koutou me i a koutou e tumau i te agaga e tasi, i te foitino e tasi kae e ga‵lue fakatasi mō te fakatuanaki telā e maua mai te tala ‵lei. 28  Kae ke mo a eiloa e ma‵taku koutou ki tino kolā e ‵teke atu ki a koutou. A te mea tenei se fakamaoniga o te lotou fakaseaiga, kae ko te fakaolataga mō koutou; kae ko te fakaasiga tenei e maua eiloa mai i te Atua. 29  Me ko oti ne tuku atu ki a koutou a te tauliaga ke sui ne koutou a Keliso, e se gata fua i te fakatuanaki ki a ia, kae ke logo‵mae foki koutou mō ia. 30  Me e fe‵paki eiloa koutou mo fakalavelave kolā ne lavea ne koutou e fe‵paki mo au, kae e lagona nei ne koutou me koi fe‵paki eiloa mo au.

Fakamatalaga mai lalo

 I te ‵gana Eleni, “ke mo a ma faka‵siga ne koutou a nisi tino.”