Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Filemoni 1:1-25

 Au ko Paulo, se pagota mō Keliso Iesu, mo Timoteo, te ‵tou taina, ki a koe, e Filemoni, te ‵tou taina pele telā e ga‵lue fakatasi tatou,  mo Afia, te mā tuagane, mo Akepasi, te mā taina sotia mo te fakapotopotoga tenā i tou fale.  Ke i luga i a koutou te alofa tauanoa mo te filemu mai te Atua te ‵tou Tamana penā foki loa mo te ‵tou Aliki ko Iesu Keliso.  E fakafetai faeloa au ki toku Atua i taimi e faipati ei au e uiga ki a koe i aku ‵talo,  me e lagona faeloa ne au a tala e uiga ki tou alofa mo tou fakatuanaki mō te Aliki ko Iesu e pelā foki mo tino tapu katoa.  Au e ‵talo ko te mea ke fakamalosi aka koe ne tou fakatuanaki, telā e fakagalue eiloa ne koe, ke matea ne koe a mea ‵lei katoa kolā e maua ne tatou e auala i a Keliso.  Me ne maua ne au te fiafia lasi mo fakamafanafanaga e uke i taku logoga i tala e uiga ki tou alofa, me ko oti ne toe fakamalosi aka ne koe a loto o tino tapu, e toku taina.  Tela la, e tiga eiloa e lasi toku saolotoga ke fakatonu ne au koe i te igoa o Keliso ki te mea e ‵tau o fai ne koe,  i lō te fai penā, ona ko te alofa e fakamolemole atu au ki a koe, me i a au, Paulo, ko matua eiloa, kae ko fai foki nei pelā me se pagota mō Keliso Iesu. 10  E fakamolemole atu au ki a koe e uiga ki taku tama ko Onosemu, telā ko oti ne fai au mo fai tena tamana i taku ‵peiga i te falepuipui. 11  Ne seki ai sena aoga ki a koe i aso mua kae nei ko aoga a ia ki a koe e pelā foki ki a au. 12  Ko uga atu ne au a ia ke toe foki atu ki a koe, ko ia telā e pele i a au. 13  E manako au o taofi a ia i konei ke fesoasoani mai ki a au ke sui ei koe i te taimi e ‵pei ei au i te falepuipui mō te tala ‵lei. 14  Kae e se manako au o fai so se mea e aunoa mo se taliaga mai i a koe, ko te mea ke fai ne koe te mea ‵lei tenā mo te lotomalie kae e se ko te faimalo. 15  Kāti tenā eiloa te pogai ne tiaki ei ne ia koe i se taimi toetoe,* ko te mea ke toe maua ne koe a ia ke oko eiloa ki te se-gata-mai, 16  e se pelā me se pologa kae ke sili atu i te pologa, e pelā me se taina pele, kae maise eiloa ki a au, kae e sili atu ki a koulua tokolua i te lu fesokotakiga faka-te-foitino, e pelā foki mo te Aliki. 17  Tela la, kafai e iloa ne koe i a au ko tou taina talitonu, ke talia aka la ne koe a ia e pelā eiloa me ko au tenā. 18  E se gata i ei, kafai ne fai ne ia se mea masei io me e kaitalafu i a koe i so se mea, fakamau aka la te mea tenā ki toku igoa. 19  Au ko Paulo tenei e tusi atu i toku lima eiloa: Ka toe ‵togi atu eiloa ne au ki a koe—e se fai atu ne au te mea tenei ona ko koe e kaitalafu foki i a au i tou ola. 20  E tonu, e toku taina, e mafai o maua ne au te fesoasoani tenei mai i a koe i te ‵kau fakatasi mo te Aliki: ke toe fakamalosi ne koe toku loto i te ‵kau fakatasi mo Keliso. 21  Au e talitonu me ka fai eiloa ne koe te mea tenei. Tela la, au e tusi atu mo te mautinoa me ka fai eiloa ne koe a mea e uke atu i lō mea kolā e fai atu ne au. 22  Kae i tafa o mea konā, fakatoka foki se koga mo oku nofo, i a au e fakamoemoe me e auala i otou talosaga ka fakasaoloto ei au ke toe fanatu ki a koutou. 23  Ko ‵moli atu alofaga o Epafala, toku taina telā e ‵pei fakatasi māua i te falepuipui i te ‵kau fakatasi mo Keliso Iesu, 24  e pelā foki mo Maleko, Alitako, Tema, mo Luka, ko oku taina e ga‵lue fakatasi matou. 25  Ke i luga i a koutou te alofa tauanoa o te Aliki ko Iesu Keliso i te agaga telā e fakaasi mai ne koutou.

Fakamatalaga mai lalo

 I te ‵gana Eleni, “se itula e tasi.”