Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Fakaasiga 9:1-21

9  Ne ili mai ne te tokolima o agelu tena pu. Ne matea atu ei ne au te fetū telā ne to ifo mai te lagi ki te lalolagi, kae ne avatu ki a ia te kī o te auala ki te lua ‵poko.  Ne ‵tala ne ia te lua ‵poko, kae ne fanaka te au mai te lua e pelā mo te au mai se ogaumu lasi. Ne pouli te la, penā foki loa mo te ea, ona ko te au mai i te lua.  Ne olo ifo a sē akelise mai i te au tenā ki te lalolagi; kae ne avatu te malosi ki a latou, ko te malosi foki eiloa telā e maua ne akalava o te lalolagi.  Ne fakatonu atu ei ki a latou ke se fakama‵seigina a mouku o te lalolagi, io me ko so se lakau foliki io me ko so se lakau lasi, kae ko tāgata fua kolā e se maua ne latou te fakamailoga a te Atua i olotou lae.  Ne seki talia ke tamate ne sē akelise a tino konā, kae ke fakapuapuaga atu fua latou i se lima masina. A te puapuaga o latou e fai pelā mo te ‵mae o se tino māfai ko ū ne se akalava.  Kae i aso konā ka ‵sala atu a tāgata ki te mate, kae ka se maua ne latou. Ka fia ‵mate latou kae ka tele keatea faeloa te mate mai i a latou.  Ne foliga mai a sē akelise konā e pelā me ne solofanua kolā ko toka mō te taua. Ne fai pelā me e isi ne foualiki aulo i luga i olotou ulu. A olotou mata ne fai pelā me ne mata o tino,  a ko olotou laulu e fai pelā me ne laulu o fāfine. A olotou nifo e fai pelā me ne nifo o leona;  a ko olotou ufifatafata ne fai pelā me ne ufifatafata fiti. A te logoa o olotou kapa‵kau ne fai pelā mo te logoa o kaliota e ‵taki ne solofanua kolā e ‵tele atu ki te taua. 10  E isi foki ne olotou velo mo suki e pelā me ne akalava; kae e isi eiloa se malosi i olotou velo ke fakapuapuaga atu ki tino i se lima masina. 11  E isi se lotou tupu telā e pule ki a latou, ko te agelu o te lua ‵poko. A tena igoa faka-Epelu ko Apatoni* kae i te faka-Eleni ko Apolioni.* 12  Ko oti atu te mala e tasi. Kiloke! E toe lua mala ka ‵soko atu ki ei. 13  Ne ili mai ne te tokoono o agelu a tena pu. Ne lagona ei ne au te leo e tasi mai i suki i tulimanu o te fatafaitaulaga aulo telā e tu i mua o te Atua 14  e fai atu penei ki te tokoono o agelu, telā e isi sena pu: “‵Tala mai a agelu e tokofa kolā ne ‵sai i te vaitafe lasi ko te Eufilate.” 15  Kae ne ‵tala mai a agelu e tokofa konā, kolā ne fakatoka mō te itula tenei, te aso tenei, te masina tenei, mo te tausaga tenei, ke tamate ne latou te tasi-vae-tolu o tāgata. 16  Ne lagona ne au te aofaki o kautau kolā e ‵sopo i solofanua e luaselau miliona. 17  Kae ne matea atu ne au me ne foliga mai penei a solofanua i te fakaasiga tenā, e penā foki mo tino kolā e ‵sopo i ei: e isi ne olotou ufifatafata kolā e ‵kula pelā me se afi, e lanu moana e pelā me se safaila, kae e ‵sega foki e pelā me se pauta ‵ka. A ulu o solofanua konā ne fai pelā mo ulu o leona, kae ne ‵to mai eiloa te afi, te au, mo te pauta ‵ka mai i olotou gutu. 18  Ne ‵mate atu ei te tasi-vae-tolu o tāgata i mala e tolu konā, mai i te afi, te au, mo te pauta ‵ka kolā ne ‵to mai i olotou gutu. 19  Me e maua eiloa te malosi o solofanua konā i olotou gutu mo olotou velo; me i olotou velo e fai pelā mo gata kae e isi ne olotou ulu, kae e fakaaogā ne latou a velo konā ke fakapuapuaga atu ki tino. 20  Kae ko nisi tāgata kolā ne ‵toe mai, kae seki ‵mate i mala konā, ne seki sala‵mo i mea kolā ne fai ne latou. Ne seki fakagata ne latou te lotou tapuaki atu ki temoni mo tupua kolā ne faite ki aulo, siliva, kopa, fatu, mo lakau, ko mea kolā e se mafai o ‵kite, io me e ‵logo i se mea, io me sa‵sale. 21  Kae ne seki sala‵mo latou i olotou amioga tatino mo olotou faifaiga faivailakau mo olotou amioga fakatauavaga sē ‵tau, e penā foki mo olotou amioga kai‵soa.

Fakamatalaga mai lalo

Fak 9:11
 Ko tena uiga, “ko te Fakamaseiga.”
Fak 9:11
 Ko tena uiga, “ko te Tino Fakamasei.”