Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Fakaasiga 8:1-13

8  I te ‵talamaiga ne ia o te fitu o fakamailoga, ne seki logoa eiloa te lagi i se āfa itula.  Ne matea atu i ei ne au a agelu e tokofitu kolā e ‵tu atu i mua o te Atua, kae ne avatu ki a latou a pu e fitu.  Ne oko mai te suā agelu kae ne tu atu i tafa o te fatafaitaulaga. E isi sena ipu aulo e ‵sunu ei a mea ma‵nogi. Kae e uke a mea fakama‵nogi ne avatu ki a ia ke ofo atu i luga i te fatafaitaulaga aulo telā e tu i mua o te nofogaaliki fakatasi mo talosaga a te kau tapu katoa.  Kae ne olo fakatasi aka te au o mea ma‵nogi konā mai i te lima o te agelu mo talosaga a te kau tapu ki mua o te Atua.  I konā loa ne puke te agelu ki te ipu o mea ma‵nogi, ne faka‵fonu ne ia ki te afi mai i te fatafaitaulaga, kae ‵pei ifo ki te lalolagi. Ne pa‵pa mai a fa‵tili mo leo. Ne ‵lapa mai a uila kae poko foki te mafuie.  Ne fakatoka eiloa a agelu e tokofitu kolā ne ‵nofo mo pu e fitu ke ili mai ne latou a pu konā.  Ne ili mai ne te agelu muamua a tena pu. Kae ne oko mai i ei a vaiua fatu mo te afi, kolā ne palu tasi mo toto, kae ne ‵pei ifo ki te lalolagi. Ne ‵sunu i ei te tasi-vae-tolu o te lalolagi. Ne ‵sunu i ei te tasi-vae-tolu o lakau, kae ne ‵sunu foki i ei a mouku katoa.  Ne ili mai ne te tokolua o agelu tena pu. Kae ne ‵pei atu ki te tai se mea pelā me se mauga lasi telā e ‵ka. Kae ne liu toto i ei te tasi-vae-tolu o te tai.  Ne ‵mate atu te tasi-vae-tolu o mea ola i te tai, kae ne ‵kasa i ei te tasi-vae-tolu o vakamutu. 10  Ne ili mai ne te tokotolu o agelu tena pu. Kae ne to ifo mai i te lagi se fetū lasi telā e ‵ka pelā me se moli, kae ne to atu ki luga i te tasi-vae-tolu o vaitafe kae ki luga foki i vaipuna. 11  A te igoa o te fetū tenā ko ‵Kona. Kae ne ‵kona i ei te tasi-vae-tolu o vai, kae e tokouke a tāgata ne ‵mate atu i vai konā i te mea ko tō ‵kona. 12  Ne ili mai ne te tokofa o agelu tena pu. Ne pokomālō i ei te tasi-vae-tolu o te lā mo te tasi-vae-tolu o te masina mo te tasi-vae-tolu foki o fetū, kae ne fai ei ke pouli te tasi-vae-tolu o mea konā, kae ke sē toe maina mai te tasi-vae-tolu o te ao, e penā foki loa mo te po. 13  Ne kilo atu au, kae ne lagona foki ne au me ne fai atu te aeto telā e eva i luga i te lagi, i se leo lasi penei: “Fakaa‵lofa, fakaa‵lofa, fakaa‵lofa eiloa a latou kolā e ‵nofo i te lalolagi ona ko pu a agelu e tokotolu kolā ko pili o ili mai ne latou!”

Fakamatalaga mai lalo