Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Fakaasiga 20:1-15

20  Ne matea atu ne au se agelu e fanaifo mai te lagi mo te kī o te lua ‵poko mo te seni lasi i tena lima.  Kae ne puke ne ia te talako, ko te gata taumua, telā ko te Tiapolo io me ko Satani, kae ne ‵sai atu a ia i loto i te 1,000 tausaga.  Kae ne ‵pei atu ne ia a Satani ki te lua ‵poko kae ne ‵pono faka‵mau ne ia a ia i loto i ei, ko te mea ke se toe takitaki ‵se ne ia a fenua ke oko eiloa ki te fakaotiga o te 1,000 tausaga. Kafai ko oti atu a mea konā, e ‵tau o toe ‵tala mai a ia i se taimi toetoe.  Kae ne matea atu ne au a nofogaaliki, mo latou kolā e saga‵saga i luga i ei, ne avatu ki a latou te malosi ke fai ne latou te fakamasinoga. E tonu, ne matea atu ne au a ola o latou kolā ne tamate* me ne molimau atu latou ki a Iesu, kae ne fai‵pati atu foki e uiga ki te Atua. Ne seki tapuaki atu latou ki te manu fekai io me ko tena fakatusa, kae ne seki maua ne latou tena fakailoga i olotou lae mo olotou lima. Kae ne toe ola mai latou kae ne pule mai e pelā me ne tupu fakatasi mo Keliso i te 1,000 tausaga.  (E se toe ola mai te ‵toega o tino ‵mate seiloga ke palele atu te 1,000 tausaga) Tenei eiloa te toe‵tuga muamua.  E fiafia kae e tapu so se tino telā e aofia i te toe‵tuga muamua; me e seai se pulega a te mate fakalua ki luga i a latou, kae ka fai latou mo fai a faitaulaga a te Atua mo Keliso, kae ka pule latou pelā me ne tupu fakatasi mo ia i te 1,000 tausaga.  Kae kafai ko palele atu te 1,000 tausaga, ka toe ‵tala mai a Satani mai i tena falepuipui,  kae ka fanatu eiloa a ia o takitaki ‵se a fenua i feitu e fa o te lalolagi, ko Koka mo Makoka, ke fakamaopoopo mai latou mō te taua. A te aofaki o latou konei ka fai pelā mo one i te tafatai.  Kae ka olo atu eiloa latou ki koga katoa i te lalolagi kae ka nikoi ne latou te koga e ‵nofo i ei te kau tapu mo te fa‵kai fakapelepele. Kae ne ‵to ifo te afi mai te lagi kae ne ‵sunu atu ei latou. 10  Ne ‵pei atu eiloa te Tiapolo telā ne takitaki ‵se ne ia a latou ki loto i te lase ‵ka ulaula mo te pauta ‵ka, ko te koga telā ko oti ne ‵nofo atu i ei te manu fekai mo te pelofeta loi, kae ka fakapuapuagatia* atu ki a latou i konā i ao mo po ki te se-gata-mai, ki te se-gata-mai eiloa. 11  Kae ne matea atu ne au te nofogaaliki lasi kae ‵kena mo te tino telā e sagasaga i luga i ei. Ne ‵tele keatea te lalolagi mo te lagi mai i ona mua, kae ne ‵galo atu ei a mea konā. 12  Kae ne matea atu ne au a tino ‵mate, ko tino ma‵luga mo tino ma‵lalo, ne ‵tu i mua o te nofogaaliki, kae ne ‵tala mai i ei a pelugā tusi. Ne ‵tala mai foki te suā pelugā tusi; ko te pelugā tusi o te ola. Kae ne fakamasinogina a tino ‵mate i mea kolā e tusi i pelugā tusi konā e ‵tusa eiloa mo olotou amioga. 13  Kae ne tuku mai ne te tai a tino ‵mate kolā e ‵nofo i ei, kae ne tuku mai foki ne te mate mo te Tanuga a tino ‵mate kolā e ‵nofo i ei, kae ne fakamasino a latou taki tokotasi e ‵tusa eiloa mo olotou amioga. 14  Kae ne ‵pei atu a te mate mo te Tanuga ki te lase ‵ka ulaula. E fakauiga te lase ‵ka ulaula ki te mate fakalua. 15  Kae ka ‵pei atu foki so se tino telā e se tusi tena igoa i te tusi o te ola ki te lase ‵ka ulaula.

Fakamatalaga mai lalo

Fak 20:4
 I te ‵gana Eleni, “tamate ki te takū.”
Fak 20:10
 Io me “taofi ‵mau; ‵pei ki te falepuipui.” A te nauna o te pati Eleni tenei e fakasino atu ki tausi pagota.—Ke onoono ki te Mat 18:34.