Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Fakaasiga 2:1-29

2  “Ke tusi atu penei ki te agelu o te fakapotopotoga i Efeso: Konei eiloa a pati a te tino telā e puke ne ia a fetū e fitu i tena lima fakaatamai, ko ia foki telā e sasale i va o tugamoli aulo e fitu,  ‘E iloa ne au au mea ne fai, ko au galuega mo tou kufaki, me e se mafai o talia ne koe a tāgata ma‵sei, kae e tofotofo eiloa ne koe a latou kolā e fai mai i a latou ne apositolo, kae e se ne apositolo, kae ne maua aka ne koe i a latou ne tino ‵loi fua.  E fakaasi mai foki ne koe te kufaki, kae ne fa‵ki eiloa koe ona ko toku igoa, kae ne seki fi‵ta foki koe i ei.  Kae e tiga te feitu tenā, tenei loa te mea e se fiafia ei au ki a koe, me ko oti ne tiakina ne koe te alofa telā ne maua muamua ne koe.  “‘Ke na masaua la ne koe a te mea telā ne fakatamala koe i ei, kae salamō kae ke na fai eiloa au faifaiga mua. Kafai e se salamō koe, ka fanatu eiloa au ki a koe, kae ka ave keatea ne au tau tugamoli mai i tena tulaga, seiloga ke salamō koe.  Kae tenei eiloa te mea koi ‵lei ei koe, me e takalialia koe ki faifaiga a te potukau sa Nikolaitani, kolā e takalialia foki au ki ei.  Ke na fakalogo la te tino telā e isi ne ana taliga ki muna a te agaga ki fakapotopotoga: Ka talia ne au te tino telā e manumalo ke kai ki te fuaga o te lakau o te ola, telā e tu i te palataiso o te Atua.’  “Kae ke tusi atu penei ki te agelu o te fakapotopotoga i Semulana: Konei a pati a ia, telā ko ‘te tino Muamua mo te tino Fakaoti,’ ko ia telā ne mate kae ne toe ola mai,  ‘E iloa ne au ou puapuaga mo tou mativa—kae e maukoloa eiloa koe—mo muna ma‵sei ne fai atu ne tino kolā e fai mai i a latou ne Iutaia, kae tagaila e se ne Iutaia, kae ko latou ko te sunako o Satani. 10  Sa mataku ki mea kolā ko pili o logo‵mae koe i ei. Kiloke! Ka ‵pei faeloa ne te Tiapolo a nisi tino i a koutou ki te falepuipui ko te mea ke katoatoa te otou tofotofoga, kae ka puapuaga koutou i aso e sefulu. Ke na fakamaoni koe ke oko eiloa ki te mate, kae ka tuku atu ne au ki a koe te foualiki o te ola. 11  Ke na fakalogo la te tino telā e isi ne ana taliga ki muna a te agaga ki fakapotopotoga: Ko te tino telā e manumalo e se mafai lele eiloa o pakia i te mate fakalua.’ 12  “Kae ke tusi atu penei ki te agelu o te fakapotopotoga i Pelekamo: Konei eiloa a muna a te tino telā e isi sena pelu mata ‵kai kae loa telā e ‵kai i feitu e lua, 13  ‘E iloa ne au te koga telā e nofo koe i ei, ko te koga telā e tu i ei te nofogaaliki o Satani. Koi puke ‵mau eiloa koe ki toku igoa, kae e seki fakafiti ne koe tou fakatuanaki ki a au, i aso foki eiloa o Anitipa, taku molimau fakamaoni telā ne tamate i otou tafa, i te koga telā e nofo ei a Satani. 14  “‘Kae e isi eiloa ne nai mea kolā e se fiafia ei au ki a koe. E isi ne tino e ‵nofo i a koe kolā e puke ‵mau ki akoakoga a Palaamo, telā ne akoako ne ia a Palako ke fakaagasala ne ia a fanau a Isalaelu ke ‵kai ki taulaga kolā ne avatu ki tupua, kae ke aofia foki latou i amioga fakatauavaga sē ‵tau. 15  Kae e isi foki ne tino i a koutou kolā e puke ‵mau ki akoakoga a te potukau sa Nikolaitani. 16  Ke na sala‵mo. Kafai e se salamō koe, ka fanatu fakavave au ki a koe, kae ka taua atu au ki tino konā mo te pelu loa i toku gutu. 17  “‘Ke na fakalogo la te tino telā e isi ne ana taliga ki muna a te agaga ki fakapotopotoga: Ka avatu ne au ki te tino telā e manumalo a nisi vaega o te manai ‵funa, kae ka avatu foki ne au ki a ia se tamā fatu ‵kena. E tusi i luga i te tamā fatu tenā se igoa fou telā e se iloa ne se isi tino kae na ko te tino eiloa telā e maua ne ia.’ 18  “Kae ke tusi atu penei ki te agelu o te fakapotopotoga i Tuatila: Konei eiloa a muna a te Tama a te Atua, ko ia telā e ‵ka mai ana mata pelā me se ulagā afi, a ko ana alofivae e fai pelā me ne tinā kopa ‵mā, 19  ‘E iloa ne au au mea ne fai, mo tou alofa, mo tou fakatuanaki mo tau taviniga mo tou kufaki, kae e uke atu au mea ne fai fakamuli nei i lō au mea ne fai i aso mua. 20  “‘Kae tenei eiloa te mea e se fiafia ei au ki a koe, me e talia ne koe te fafine ko Iesepela, telā e fai mai i a ia se pelofeta fafine. E akoako kae takitaki ‵se foki ne tou fafine aku tavini ke aofia i amioga fakatauavaga sē ‵tau kae ke ‵kai foki ki taulaga kolā ne ofo atu ki tupua. 21  Ko oti ne tuku atu ne au te avanoaga ki a ia ke salamō, kae e se fia salamō eiloa tou fafine i ana amioga fakatauavaga sē ‵tau. 22  Kiloke! Ka fai ne au a ia ke masaki malosi a ko latou kolā e muli‵lua fakatasi mo ia ka uke olotou puapuaga, seiloga ke sala‵mo latou i olotou faifaiga mo te fafine tenā. 23  Kae ka tamate ne au ana tama‵liki ki se mala fakamataku, ko te mea ke iloa ne fakapotopotoga katoa me ko au tenei e sukesuke ki lagonaga mo mafaufauga ‵loto* o tino, kae ka toe taui atu ne au ki a koutou taki tokotasi e ‵tusa eiloa mo otou mea e fai. 24  “‘Kae e fai atu au ki nisi tino i a koutou kolā e ‵nofo i Tuatila, ko latou katoa kolā e se tau‵tali i te akoakoga tenei, ko tino eiloa kolā ne seki fakamasani ki “mea ‵loto” mai i a Satani: E se fakaeke atu ne au se isi amoga ‵mafa ki luga i a koutou. 25  Ke puke ‵mau koutou ki mea kolā ko oti ne maua ne koutou ke oko eiloa ki te taimi e oko atu ei au. 26  Kae ka avatu ne au a te pulega ki fenua o te lalolagi, ki te tino telā e manumalo kae e fakalogo mai ki a au ke oko eiloa ki te gataga. 27  Ka fakaaoga ne ia te tokotoko fiti ke pule atu ki tino ko te mea ke foafoa latou ke malipi‵lipi e pelā me ne fagu kele, e ‵tusa eiloa mo te pulega telā ko oti ne maua ne au mai i toku Tamana. 28  Kae ka avatu foki ne au ki a ia a te fetū ao. 29  Ke na fakalogo la te tino telā e isi ne ana taliga ki muna a te agaga ki fakapotopotoga.’

Fakamatalaga mai lalo

Fak 2:23
 I te ‵gana Eleni, “ko nonu o te foitino.”