Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Fakaasiga 18:1-24

18  Ko oti atu a mea konā kae ne matea atu ne au a te suā agelu e fanaifo mai te lagi mo te pulega lasi; kae ne maina te lalolagi kātoa i tena ‵malu.  Ne kalaga mai a ia i se leo lasi, penei: “Ko pakū tou fafine! Ko pakū a Papelonia te Sili! Kae ko fai a ia mo fai se koga e ‵nofo ei a temoni mo te koga e ‵nofo i ei a agaga* lai‵lai katoa mo manu eva sē ‵ma katoa kolā e fakatakalia‵lia!  Ona ko te uaina o tena fakavalevale ki amioga fakatauavaga sē ‵tau ne pa‵kia i ei a fenua katoa, kae ne aofia a tupu o te lalolagi i amioga fakatauavaga sē ‵tau fakatasi mo ia, kae ne mauko‵loa a tino faipisinisi* o te lalolagi ona ko te malosi o tena olaga maumea e aunoa mo se mā.”  Kae ne lagona ne au te suā leo mai te lagi e fai mai penei: “‵Tele keatea mai i a ia, oku tino, māfai e se fia ‵kau atu koutou ki ana agasala, māfai e se fia maua ne koutou se vaega o ana mala.  Me ko fua‵tu ki luga i te lagi ana agasala, kae ko masaua ne te Atua ana amioga sē fakamaoni.  Ke toe taui atu ki a ia i te auala eiloa telā ne fai ne ia ki nisi tino, e tonu, ke na taui fakalua atu ki a ia a mea kolā ko oti ne fai ne ia. I te ipu telā ko oti ne palu ne ia, palu fakalua atu sena vaega i ei.  E pelā mo te lasi o te faka‵maluga ne ia o ia eiloa mo tena ola i te olaga maumea e aunoa mo se mā, ke penā foki eiloa te lasi o tena puapuaga mo tena fanoanoa. Me ne fai atu a ia i tena loto penei, ‘Au e sagasaga e pelā me se tupu fafine, kae e sē se fafine telā ko mate tena avaga. Ka se mafai eiloa au o tagi fanoanoa.’  Tenā loa te pogai ka oko atu ei ki a ia ana mala i te aso e tasi, ko te mate, te tagi fanoanoa, mo te oge, kae ka ‵sunu fakapalele atu a ia ki te afi, me e malosi a Ieova te Atua, telā ne fakamasino ne ia a ia.  “Kae ko tupu o te lalolagi kolā ne aofia i amioga fakatauavaga sē ‵tau fakatasi mo ia kae ne ola foki i se olaga maumea e aunoa mo te mā, ka ‵tagi kae tuki olotou foitino ona ko te lotou fanoa‵noa e uiga ki a ia, māfai e ‵kilo atu latou ki te au mai i tena ‵sunuga. 10  Kae ka ‵tu latou i se koga tai ‵mao ona ko te lotou ma‵taku i ana puapuaga, kae fai atu latou penei: ‘Fakaalofa, fakaalofa, ko koe te fakai takutakua, a koe ko Papelonia te fakai malosi, me ne oko atu tou fakamasinoga i te itula e tasi!’ 11  “E penā foki loa te ‵tagi mo te fanoa‵noa o tino faipisinisi o te lalolagi e uiga ki a ia, me ko se toe ai se tino e ‵togi ne ia olotou koloa katoa, 12  ko koloa katoa ko aulo mo siliva mo fatu tāua mo penina mo laugatu lino, mo laugatu violeta mo silika mo laugatu ‵kula; penā foki loa mo mea katoa kolā e faite ki lakau ma‵nogi mo mea katoa kolā e faite ki nifo o elefane, mo mea katoa kolā e faite ki lakau ‵togi ‵mafa mo kopa, mo fiti mo fatu tāua; 13  penā foki loa mo kinamoni mo mea fakama‵nogi meakai mai Initia mo mea ma‵nogi mo sinu ma‵nogi mo pulu lipano mo uaina, mo sinu olive mo falaoa ‵ma mo saito, mo pulumakau, mo mamoe, mo solofanua mo olotou kā mo pologa mo tino ola. 14  E tonu, a fuataga ‵gali kolā ne fiafai koe ki ei ko ‵galo atu katoa mai i a koe, kae ko mea mo‵mona mo mea ‵gali katoa ko se maua nei ne koe, kae ka se toe maua eiloa ne tino a mea konā. 15  “A tino faipisinisi kolā e fakatau atu ne latou a mea konei, kae kolā ne mauko‵loa ona ko tou fafine, ka ‵tu ‵mao atu ona ko te lotou ma‵taku i ana puapuaga, kae ka ‵tagi kae fanoa‵noa foki, 16  olotou pati, ‘Fakaalofa, fakaalofa—te fa‵kai takutakua, telā ne pei ki laugatu lino mo laugatu violeta mo laugatu ‵kula, kae ne teu fakagaligali ki aulo mo fatu tāua mo penina, 17  me ne fakamaseigina a koloa e uke konā i te itula e tasi!’ “Kae ko kapeni katoa o vakamutu mo pasese katoa kolā e faima‵laga ki so se koga mo kauvaka mo latou katoa kolā e fakavae olotou olaga ki mea mai te tai, ka ‵tu ‵mao mai i a ia 18  kae ka ‵tagi paka‵laga māfai e ‵kilo atu latou ki te au mai i tena ‵sunuga, olotou pati, ‘Ko oi te fakai e ‵pau mo te fakai takutakua tenei?’ 19  Kae ka āsu aka ne latou a pefu ki luga i olotou ulu, kae ‵tagi paka‵laga, ka ‵tagi mautuutu kae fanoa‵noa foki, kae fai atu penei, ‘Fakaalofa, fakaalofa—te fa‵kai takutakua, telā ne mauko‵loa ei a latou katoa kolā e isi ne olotou vakamutu e fo‵lau i te moana ona ko te uke o ana koloa, me ne fakaseai atu a ia i te itula e tasi!’ 20  “Ke fiafia te lagi ona ko ia, e penā foki loa mo koutou te kau tapu mo te kau apositolo mo te kau pelofeta, me ko oti ne fai ne te Atua a te fakamasinoga tonu ke fakasala a ia ona ko ana mea ne fai ki a koutou!” 21  Kae ne sau aka ne te agelu malosi a te fatu e pelā me se fatu solo meakai lasi kae ‵pei atu ki te tai, ana muna: “Ka penei eiloa te galo fakavave ki lalo o Papelonia te fakai takutakua, kae ka se toe maua eiloa a ia. 22  Kae ka se toe lagona atu i a koe a leo o tino usu pese kolā e tā‵tā kitala, mo tino tā‵tā pese, mo tino ili faili mo tino ili pu, kae ka se toe lagona atu eiloa i a koe. Ka se toe ai se tufuga apo i so se galuega ka toe maua atu i a koe, kae ka se toe lagona atu i a koe te ‵tagi o se fatu solo meakai, 23  kae ka se toe ‵ka mai se moli i a koe, kae ka se toe lagona atu foki i a koe te leo o se tagata ka fakaipoipo, mo se fafine ka fakaipoipo; me i ou tino faipisinisi ko toe tāgata lauiloa eiloa i te lalolagi, me ne takitaki‵segina a fenua katoa ona ko au faifaiga faivailakau. 24  E tonu, ne maua atu i a ia a toto o pelofeta, mo tino tapu, e penā foki loa mo latou katoa kolā ne tamate i te lalolagi.”

Fakamatalaga mai lalo

Fak 18:2
 Io me ko “te mānava; muna fakaosofia.”
Fak 18:3
 Io me ko “tino faipisinisi faima‵laga.”