Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Fakaasiga 16:1-21

16  Ne lagona atu ne au se leo lasi mai i te koga tapu ne fai atu penei ki agelu e tokofitu: “Olo atu kae ke na ‵ligi ifo a tanoa e fitu o te kaitaua o te Atua ki luga i te lalolagi.”  Ne fanatu eiloa te agelu muamua kae ‵ligi ifo tena tanoa ki te lalolagi. Kae ne oko atu a foge fakalogo‵mae kae ‵pisi ki luga i tino kolā ne maua ne latou te fakailoga o te manu fekai kae tapuaki atu foki ki tena fakatusa.  Ne ‵ligi ifo ne te tokolua o agelu a tena tanoa ki te tai. Ne liu toto te tai e pelā mo te toto o se tagata mate, kae ne ‵mate atu i ei a mea ola katoa, e tonu, ko mea i loto i te tai.  Kae ne ‵ligi ifo ne te tokotolu o agelu a tena tanoa ki vaitafe mo vaipuna. Kae ne liu toto ei a mea konā.  Kae ne lagona atu ne au a pati konei a te agelu mai luga o vai konā: “Ko koe, te Tino telā e ola, kae ne ola mai mua loa, ko te Tino alofa fakamaoni, a koe e amiotonu, me ne fai ne koe a fakamasinoga konei,  ona ko te mea ne ‵ligi ne latou ki tua a toto o te kau tapu mo te kau pelofeta, kae ko oti ne fainu ne koe a latou ki toto. Kaitoa eiloa.”  Kae ne lagona atu ne au a pati konei mai te fatafaitaulaga: “Ao, e Ieova te Atua Malosi Katoatoa, e ‵sao kae ‵tonu au fakamasinoga.”  Kae ne ‵ligi ifo ne te tokofa o agelu a tena tanoa ki luga i te la; kae ne fakasaoloto te la ke ‵sunu ne ia a tino ki te afi.  Kae ne ‵paku a tino i te lasi o te ‵vela, kae ne pati ma‵sei latou ki te igoa o te Atua, telā e pule ki luga i mala konā, kae ne seki sala‵mo latou ko te mea ke ‵viki atu latou ki a ia. 10  Kae ne ‵ligi ifo ne te tokolima o agelu a tena tanoa ki luga i te nofogaaliki o te manu fekai. Kae ne pouli malosi tena malo, kae ne kamata o ū olotou nifo ona ko te lotou logo‵mae, 11  kae ne pati ma‵sei atu latou ki te Atua o te lagi ona ko olotou logo‵maega mo olotou foge, kae ne seki sala‵mo eiloa latou i olotou galuega. 12  Kae ne ‵ligi ifo ne te tokoono o agelu a tena tanoa ki luga i te vaitafe lasi ko te Eufilate, kae ne ‵masa pakupaku ei ana vai, ko te mea ke fakatoka faka‵lei te auala mō tupu mai i te saegala. 13  Kae ne matea atu ne au a fakamatalaga e tolu kolā e lai‵lai kae e foliga mai e pelā me ne lane, ne o‵mai ki tua mai te gutu o te talako, mo te gutu o te manu fekai, mo te gutu foki o te pelofeta loi. 14  A te tonuga loa, a muna konā ne fakaosofia ne temoni kae e fai ne latou a fakailoga, kae ne olo atu latou ki tupu o te lalolagi nofoaki kātoa, ke fakamaopoopo atu latou ki te taua i te aso lasi o te Atua Malosi Katoatoa. 15  “Kiloke! Au ka vau e pelā me se tino kaisoa. Ka fiafia te tino telā e ala faeloa kae pei faeloa ana gatu, ko te mea ke se sasale fuafua a ia kae ‵kilo atu a tino ki tena masiasi.” 16  Kae ne fakamaopoopo ne mea konā a latou kae ‵luku fakatasi atu ki te koga telā e taku faka-Epelu ko Amaketo. 17  Kae ne ‵ligi atu ne te tokofitu o agelu a tena tanoa ki te ea, kae ne pakū mai ei se leo lasi mai te koga tapu i te nofogaaliki, ana muna: “Ko taunu eiloa te mea tenā!” 18  Kae ne ‵lapa mai a uila, ne ‵tagi mai a leo, kae ne pa‵pa mai a fa‵tili. Ne poko i ei se mafuie lasi telā e seki poko aka eiloa talu mai te taimi ne ‵nofo ei a tino i te lalolagi, ko te ‵toe mafuie lasi eiloa tenā. 19  Ne mavae i ei te fakai lasi ki vaega e tolu, kae ne ‵siga foki i ei a fa‵kai o atufenua. Kae ne masaua ne te Atua a Papelonia te Sili, ke avatu ki a ia te ipu o te uaina o tena kaitaua fakamataku. 20  Kae ne ‵tele keatea foki i ei a motu katoa, kae ne seki toe maua atu a mauga. 21  Kae ne ‵to ifo mai te lagi a vaiua fatu fakama‵taku ki luga i tāgata, e taki tasi taleni* te ‵mafa o fatu takitasi konā, kae ne pati ma‵sei atu a tāgata ki te Atua ona ko te mala o vaiua fatu, me e seai eiloa se mala e ‵pau mo te mala tenā i te fakamataku.

Fakamatalaga mai lalo

Fak 16:21
 E nofo pelā ki te 20.4 kilokalame (45 pauna).