Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Fakaasiga 12:1-17

12  Ne sae mai se fakailoga fakaofoofogia i te lagi. Ko te fafine telā ne teu ki te la, ne tu te masina mai lalo i ana vae, kae ne fou i tena ulu se foualiki o fetū e 12.  Ko faitama tou fafine. Kae ne tagi a ia ona ko tena logo‵mae mo tena fi‵ta i a ia ka fanau.  Kae ne sae mai foki te suā fakailoga i te lagi, kae kiloke! Ko te talako lasi telā e lanu pelā me se afi, e fitu ana ulu, e sefulu ana suki, kae e fitu foki a foualiki i ana ulu.  Ne toso ifo ne tena velo te tasi-vae-tolu o fetū o te lagi, kae ne ‵pei atu latou ki te lalolagi. Ne tu atu faeloa te talako i mua o te fafine telā ka fai o fanau, ko te mea ke na kai ne ia tena tamaliki māfai ko fanau mai.  Ne fanau mai ne te fafine se tamaliki tagata, telā ka pule ne ia a fenua katoa ki te tokotoko fiti. Kae ne ave fakavave atu te tamaliki a te fafine ki te Atua mo tena nofogaaliki.  Kae ne sola keatea te fafine ki te koga lavaki, ki te koga telā ne fakatoka ne te Atua mō ia, kae ka fagai ne latou a ia i konā i aso e 1,260.  Kae ne kamata se taua i te lagi: Ne taua atu a Mikaele mo ana agelu ki te talako, kae ne taua atu foki te talako mo ana agelu ki a latou.  Ne seki manumalo te talako, kae ne seki toe talia ke ‵nofo atu latou i te lagi.  Tela la, ne ‵pei ifo ei te talako lasi, ko te gata muamua telā e fakaigoa ki te Tiapolo io me ko Satani, kae telā e takitaki ‵se ne ia te lalolagi nofoaki kātoa. Ne ‵pei ifo a ia ki te lalolagi, kae ne ‵pei ifo foki ana agelu fakatasi mo ia. 10  Kae ne lagona ne au se leo lasi i te lagi ne fai mai penei: “Ko oko mai nei te fakaolataga mo te malosi mo te malo o te ‵tou Atua, penā foki loa mo te pulega a tena Keliso, me ko oti ne ‵pei ifo ki lalo te tino telā e ‵losi atu ki ‵tou taina. E ‵losi atu faeloa a ia ki a latou i ao mo po i mua o te ‵tou Atua! 11  Kae ne manumalo eiloa latou i a ia ona ko te toto o te Tamā Mamoe, penā foki loa mo te fekau telā ne folafola atu ne latou, kae ne seki manumanu foki latou ki olotou ola ke oko eiloa ki te mate. 12  Ona ko te mea tenā ke fiafia koe, e te lagi, fakatasi mo koutou kolā e ‵nofo atu i ei! Kae ko malaia eiloa te lalolagi mo te tai, me ko oti ne fanaifo te Tiapolo ki a koulua, kae ko oko eiloa i te kaitaua me e iloa ne ia i tena taimi ko toetoe.” 13  I te taimi ne matea ei ne te talako i a ia ko ‵pei ifo ki te lalolagi, ne fakasaua atu eiloa a ia ki te fafine telā ne fanau ne ia te tamaliki tagata. 14  Kae ne avatu se avā kapakau o se aeto lasi ki te fafine, ko te mea ke eva atu a ia ki te koga telā ne fakatoka mō ia i te koga lavaki; ke fagai a ia i konā i se taimi, i se avā taimi mo te āfa taimi* ke sao ei a ia mai te gata. 15  Kae ne luaki atu ne te gata a vai e pelā me se vaitafe mai i tena gutu ke oko atu ki te fafine, ke fai ei a ia ke malemu i te vaitafe. 16  Kae ne fesoasoani atu te lalolagi ki te fafine. Ne fakamaga ne te lalolagi tena gutu kae ne folo ne ia te vaitafe telā ne luaki atu ne te talako mai i tena gutu. 17  Ne gasolo o kaitaua malosi te talako ki te fafine, kae ne fanatu eiloa a ia o taua atu ki tino kolā ne ‵toe mai o te fanau a te fafine, kolā e faka‵logo ki tulafono a te Atua kae e ga‵lue foki i te galuega ko te molimau atu e uiga ki a Iesu.

Fakamatalaga mai lalo

Fak 12:1
 Telā ko te tolu mo te āfa taimi.