Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Fakaasiga 1:1-20

1  Ko te fakaasiga mai i a Iesu Keliso, telā ne avatu ne te Atua ki a ia, ke fakaasi atu ki ana tavini a mea kolā ko pili o ‵tupu. Ne uga atu ne ia tena agelu kae ne fakaasi atu ne ia te mea tenā i te faiga o fakailoga e auala i a ia ki tena tavini ko Ioane.  Ko ia telā ne molimau atu e uiga ki te muna ne tuku mai ne te Atua mo te molimau ne tuku mai ne Iesu Keliso, e tonu, ki mea katoa kolā ne matea ne ia.  E manuia te tino telā e faitau ki luga, mo latou kolā e fakalogo‵logo ki pati i te valoaga tenei, kae e faka‵logo foki ki mea kolā ne tusi i ei; me ko pili o oko mai te taimi ne fuafuagina.  Au ko Ioane, kae e tusi atu au ki fakapotopotoga e fitu kolā e ‵tu i te fenua ko Asia: Ke i luga i a koutou te alofa tauanoa mo te filemu mai i te “Tino telā e ola nei, ne ola mai mua eiloa, kae ko ia foki telā ka vau,” kae ne aumai foki i agaga e fitu kolā e ‵tu i mua o tena nofogaaliki,  kae mai i a Iesu Keliso, “te Molimau Fakamaoni,” “te Tino muamua ne fakatu aka mai te mate,” ko ia foki ko “te Pule o tupu o te lalolagi.” Ko ia telā e alofa mai ki a tatou kae ne fakasaoloto foki ne ia a tatou mai i ‵tou agasala e auala i tena toto eiloa—  kae ne fai ne ia a tatou ke fai mo fai se malo, ko faitaulaga ki tena Atua, ko tena Tamana—e tonu, ke i luga i a ia te ‵malu mo te malosi ki te se-gata-mai. Amene.  Kiloke! Ka vau a ia i kaumana, kae ka matea a ia ne mata o tino katoa, e aofia i ei a latou kolā ne velo ne latou a ia. Ka ‵tagi fanoa‵noa a matakāiga katoa o te lalolagi ona ko ia. E tonu, Amene.  “Au ko te Alefa mo te Omeka,”* ko muna a Ieova te Atua, “ko te Tino telā e ola nei, ne ola mai mua eiloa, kae ko ia foki telā ka vau, ko te Atua Malosi Katoatoa.”  Au ko Ioane, ko te otou taina telā e ‵kau fakatasi mo koutou i puapuaga, i te Malo, mo te kufaki i te tau‵tali atu i a Iesu. Au e nofo nei i te motu ko Patamo ona ko te mea ne faipati atu au e uiga ki te Atua kae molimau atu foki e uiga ki a Iesu. 10  Mai i te fakamalosiga a te agaga ne oko atu ei au ki te aso o te Aliki. Kae ne lagona ne au i oku tua se leo lasi ‵ki e pelā mo te tagi o se pu, 11  ana muna: “A mea kolā e matea ne koe ke na tusi ki lalo i se pelugā tusi kae ‵moli atu ki fakapotopotoga e fitu, i Efeso, i Semulana, i Pelekamo, i Tuatila, i Salataisa, i Filatelafia, e penā foki mo Laotikaia.” 12  Ne mafuli atu au ke matea ne au me i o oi te leo telā e faipati mai, kae ne matea atu ei ne au a tugamoli aulo e fitu, 13  kae ne tu mai i te kogaloto o tugamoli konā se tino pelā me se tama a te tagata. Ne pei a ia ki se gatu ‵loa telā ne oko ifo ki ana alofivae, kae ne ‵sai tena fatafata ki te fusi aulo. 14  Kae ko tena ulu mo ana laulu e ‵kena pelā mo te ‵kena o fulufulu mamoe, e pelā eiloa mo te kiona. Kae ko ana mata e pelā me se afi ‵ka ulaula. 15  Kae ko ana alofivae ne fai pelā mo te tinā kopa ‵mā telā e malapulapu mai i se ogaumu; kae ko tena leo ne fai pelā mo te ‵gulu mai o vai e uke. 16  Ne puke ne ia a fetū e fitu i tena lima fakaatamai, kae ne sae mai i tena gutu se pelu mata ‵kai kae loa telā e ‵kai i feitu e lua, a ko ana foliga ne fai pelā mo te la māfai ko ‵kasa malosi mai. 17  I taku kiloatuga ki a ia, ne siga ifo ei au i ana mua e pelā me se tino ko mate. Ne puke mai tena lima fakaatamai ki a au, kae fai mai, penei: “Sa mataku. Au ko te tino Muamua mo te tino Fakaoti. 18  Au foki ko te tino telā e ola. Au ne mate, kae kiloke! au e ola ki te se-gata-mai, ki te se-gata-mai eiloa, kae ko maua ne au a kī o te mate mo te Tanuga.* 19  Tela la, ke na tusi ki lalo a mea kolā ne matea ne koe, mo mea konei, penā foki loa mo mea kolā ka ‵tupu ma oti atu a mea konei. 20  Kae e pelā mo te mea ‵funa kae tapu o fetū e fitu kolā ne matea ne koe i toku lima fakaatamai, mo tugamoli aulo e fitu: E fakauiga eiloa a fetū e fitu ki agelu o fakapotopotoga e fitu, kae e fakauiga a tugamoli e fitu ki fakapotopotoga e fitu.

Fakamatalaga mai lalo

Fak 1:8
 Io me “ko te Kamataga mo te Fakaotiga.” A te Alefa mo te Omeka ko te mataimanu muamua mo te mataimanu fakaoti i mataimanu o te ‵gana Eleni.
Fak 1:18
 Ke onoono ki te Mataupu Fakaopoopo e 9.