Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Epelu 9:1-28

9  Ne aofia i te feagaiga mua a manakoga o te tulafono e uiga ki te taviniga tapu mo tena koga tapu i te lalolagi.  Me ne fakatu aka i te faleie a te potu muamua telā e tuku i ei te tugamoli e pelā foki mo te taipola mo falaoa kolā ko oti ne ofo atu ki te Atua. Kae e fakaigoa te potu tenā ki “te Potu Tapu.”  Kae mai tua o te lua o ‵pui laugatu o te faleie e tu ei te potu telā e fakaigoa ki te “Potu Tafasili i te Tapu.”  E tuku i te potu tenei a te ipu aulo e ‵sunu ei a mea ma‵nogi mo te pusa o te feagaiga telā e ufi kātoa ki te aulo, kae e tuku foki i loto i ei te fagu aulo telā e tuku ei te manai mo te tokotoko o Alona telā ne ‵somo aka i ei a lau mo papa mā o te feagaiga.  Kae mai luga i ei ko kelupi* ‵malu kolā e fakamalu ifo ki te ‵pono* o te pusa. Kae e se tenei te taimi ke fakamatala likiliki atu ei a uiga o mea konei.  I te otiga ne faite a mea konei, e ulu atu a faitaulaga ki te potu muamua o te faleie i taimi katoa e fai ei te taviniga tapu i ei.  Kae ko te faitaulaga sili fua e ulu atu ki te lua o potu fakatasi eiloa i te tausaga, mo toto kolā e ofo atu ne ia mō ia eiloa, e pelā foki mo agasala a tino katoa kolā ne fai ona ko te lotou va‵lea.  Tela la, ne fakaasi manino mai ne te agaga tapu me e se mafai o fakaasi mai te auala ki loto i te koga tapu a koi tu te faleie muamua.  A te faleie tenei se fakatusa fua mō te taimi tenei, e ofo atu i ei a meaalofa mo taulaga e ‵tusa mo te fakatokaga tenei. E tiga te feitu tenā, e se mafai ne mea konei o fai ke ‵lei katoatoa te loto lagona o te tino telā e fai ne ia a te taviniga tapu ki te Atua. 10  A mea konā ko mea fua e uiga ki meakai mo meainu mo papatisoga kese‵kese. A mea konei ne manakoga o te tulafono e uiga ki te foitino kae ne tuku atu fua ke oko eiloa ki te taimi ne fuafuagina ke faka‵tonu aka ei a mea katoa. 11  Kae i te taimi ne vau ei a Keliso e pelā me se faitaulaga sili o mea ‵lei kolā ko oti ne fakataunu mai, ne ulu atu ei a ia ki loto i te faleie telā e sili kae e ‵lei atu kae ne seki faite ki lima o tino, kae e sē se vaega o mea ne faite i te lalolagi. 12  Ne ulu atu a ia ki loto i te koga tapu, e se mo toto o kouti io me ko tamā pulumakau, kae mo tena toto eiloa, fakatasi eiloa mō taimi katoa ke maua ei te fakaolataga ki te se-gata-mai mō tatou. 13  Me kafai e faka‵pisi atu a toto o kouti mo pulumakau ta‵gata mo lefu o se pulumakau* fafine ki luga i tino lai‵lai ke fakatapu kae faka‵ma aka ei te foitino, 14  e se sili fakafia atu la te faka‵maga o ‵tou loto lagona mai galuega sē aoga ki te toto o Keliso, telā ne ofo atu ne ia e aunoa mo se pona ki te Atua, e auala i te agaga o te se-gata-mai, ko te mea ke mafai o tuku atu ne tatou te taviniga tapu ki te Atua ola? 15  Tenā eiloa te pogai ko fai ei a ia mo fai te sokoga o te feagaiga fou, ona ko te mea ko oti ne mate se tino mō te lotou fakasaolotoga e auala i te togiola mai amioga solitulafono kolā ne fai mai lalo i te feagaiga mua, ke maua ei ne tino kolā ko oti ne kalagagina a te folafolaga e uiga ki te tofi se-gata-mai. 16  Me kafai e isi se feagaiga e fai mo te Atua, e ‵tau o tuku atu te tino fai feagaiga* ke mate. 17  Ona ko te mea e fakamau‵tu aka te feagaiga māfai ko mate se tino,* e se mafai o fakagalue aka te feagaiga i te taimi koi ola ei te tino fai feagaiga tenā. 18  Tela la, ne seki fakamau‵tu foki te feagaiga mua e aunoa mo te fakaaogaga o toto. 19  Me i te otiga ne fakaasi atu ne Mose a fakatonuga katoa o te Tulafono ki tino katoa, ne puke ne ia a toto o tamā pulumakau mo kouti mo vai mo vulu violeta mo isopo kae faka‵pisi atu ki luga i te tusi mo tino katoa, 20  ana muna: “Tenei te toto o te feagaiga telā ne fakatonu atu te Atua ke tausi ne koutou.” 21  Kae ne faka‵pisi atu ne ia te toto ki te faleie tapu mo ipu katoa kolā e fakaaoga i te taviniga tapu. 22  E tonu, toeitiiti kae faka‵ma a mea katoa ki te toto e ‵tusa mo te Tulafono, me e seai se agasala e mafai o fakamagalo seiloga ke ‵ligi ki tua te toto. 23  Tela la, e ‵tau eiloa o faka‵magina a mea kolā e fakaata mai ne latou a mea i te lagi i te auala tenei, kae ko mea i te lagi e manakogina i ei a taulaga kolā e ‵lei fakafia atu. 24  Me ne seki ulu atu a Keliso ki loto i se koga tapu telā ne faite ki lima o tino, kae telā se fakatusa fua o te mea tonu, kae ne ulu atu eiloa tou tagata ki te lagi, ko te mea ke tu atu a ia i mua o te Atua mō tatou. 25  Ne seki fai penei ko te mea ke ofo atu faeloa a ia e pelā mo te mea ne fai sale ne te faitaulaga sili māfai e ulu atu ki loto i te koga tapu i tausaga takitasi mo te toto telā e se ko tena toto. 26  Moi ne fai penā, penei ne ‵tau o logo‵mae faeloa a ia talu mai te faitega* o te lalolagi. Kae nei la, ko oti ne fakaasi mai a ia fakatasi fua mō taimi katoa i te vaitaimi o te gataga o te olaga tenei, ke fakaseai ne ia te agasala i tena faiga mo fai te taulaga. 27  Me e pelā eiloa mo te fakatokaga ke ‵mate a tino katoa i te taimi fua e tasi mō taimi katoa, kae mai tua ifo i ei ko fakamasino ei, 28  e penā foki a Keliso telā ne ofo atu i te taimi fua e tasi mō taimi katoa, ke amo ne ia a agasala a tino e tokouke. Kae ko te lua o taimi e fakaasi mai ei a ia, e se fai mō te tapalega o agasala, kae ka lavea a ia ne latou kolā e ‵sala atu mo te loto naunau ki a ia mō te lotou fakaolataga.

Fakamatalaga mai lalo

Epe 9:5  A kelupi ne agelu kolā e maluga ‵ki olotou tulaga.
Epe 9:5  A te pati Eleni telā ne ‵fuli ki te ‘‵pono’ e mafai foki o fakasino atu ki se taulaga o te faka‵maga ke maua i ei te taliaga a te Atua.
Epe 9:13  Io me “se tamā pulumakau.”
Epe 9:16  Io me “ko te sokoga o te feagaiga.”
Epe 9:17  E mafai foki o fakasino atu ki “manu ‵mate.”
Epe 9:26  Ke onoono ki te fakamatalaga mai lalo i te 1Pe 1:20.