Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Epelu 7:1-28

7  Me i a Mekisateko tenei, te tupu o Salema, ko te faitaulaga a te Atua Tafasili i te Maluga, ne fakafetaui atu ki a Apelaamo i tena fokimaiga i te otiga ne tamate ne ia a tupu, kae fakamanuia atu ki a ia  kae ne tuku* atu ne Apelaamo ki a ia te tasi-vae-sefulu o mea katoa. Muamua la, a te uiga o tena igoa ko te “Tupu o te Amiotonu,” kae ko ia foki te tupu o Salema, telā ko te “Tupu o te Filemu.”  Ona ko te mea e seai sena tamana, sena mātua, kae seai sena gafa, e seai foki se tala e uiga ki te kamataga mo te gataga o tena olaga. Ne fai ei a ia e pelā me ko te Tama a te Atua, me e tumau eiloa a ia e pelā me se faitaulaga ki te se-gata-mai.  Tela la, ko matea ne koutou te maluga o te tagata tenei, me ne tuku atu ki ei ne Apelaamo, telā ko te ulu o te kāiga, a te tasi-vae-sefulu o toe mea ‵lei katoa mai te taua.  E tonu, mai lalo i te Tulafono, ne maua ne tama a Levi olotou tofi fakafaitaulaga kae ne maua foki te fakatonuga ke ‵tae ne latou te tasi-vae-sefulu mai i tino katoa, ko tena uiga mai i olotou taina Isalaelu, e tiga eiloa ne o‵mai a latou mai te gafa* o Apelaamo.  Kae ko te tagata tenei ne seki vau i te lotou gafa, ne puke ne ia te tasi-vae-sefulu mai i a Apelaamo kae fakamanuia atu ki te tagata telā ne maua ne ia a folafolaga.  Nei la, e se mafai o fakafiti ne tatou a te manatu me ne fakamanuia atu ne te tino maluga a te tino malalo.  I te feitu e tasi, e maua ne tino kolā e oko ki ei te mate a te tasi-vae-sefulu, kae i te suā feitu, e molimau mai a Tusitusiga Tapu me e ola faeloa te suā tino.  Kae e mafai foki o fai atu me i a Levi telā ne maua ne ia te tasi-vae-sefulu ko oti foki ne ‵togi atu ne ia a te tasi-vae-sefulu e auala i a Apelaamo, 10  me i a ia koi nofo eiloa i loto i te foitino* o tena tupuga ko Apelaamo i te taimi ne fetaui ei lāua mo Mekisateko. 11  Tela la, kafai ne maua te tulaga ‵lei katoatoa e auala i te tofi fakafaitaulaga mai te matakāiga o Levi (me se vaega tenā o te Tulafono telā ne tuku atu ki tino) kaia la ne manakogina ei ke toe sae mai se isi faitaulaga e pelā mo Mekisateko kae e se pelā mo Alona? 12  Me ona ko te mea ne sui sale a faitaulaga, e ‵tau foki o sui te tulafono. 13  Me i te tagata telā e fakauiga ki ei a mea konei se tagata loa ne vau mai se isi matakāiga, telā e seai se tino mai i ei ne galue i te fatafaitaulaga. 14  Me e manino ‵lei i te ‵tou Aliki ne tupu mai i te gafa o Iuta, se matakāiga telā ne seki faipati a Mose ki ei e uiga ki faitaulaga. 15  Kae ko gasolo aka o maina mai te mea tenei i te saemaiga o se isi faitaulaga e pelā mo Mekisateko, 16  telā ko oti ne fai penā, e se auala i te manakoga o te tulafono telā e fakavae ki luga i te gafa o te tino, kae e auala i te ‵mana o te ola telā e se mafai o fakaseai. 17  Me ne fai mai penei te molimau e uiga ki a ia: “A koe ko te faitaulaga ki te se-gata-mai e pelā eiloa mo Mekisateko.” 18  Tela la, ne ave keatea te tulafono mua ona ko tena vāivāi mo tena sē aoga. 19  Me e seai se mea e fai ne te Tulafono ke ‵lei katoatoa, kae ko te fakaasimaiga fua o te fakamoemoega telā e ‵lei atu, e fakapili‵pili atu ei tatou ki te Atua e auala i ei. 20  Kae ne seki tuku mai foki e aunoa mo se tautoga 21  (me e isi ne tāgata kolā ne fai mo fai ne faitaulaga e aunoa mo se tautoga, kae ko te tino tenei ne fai penā e auala i se tautoga ne fai e uiga ki a ia ne te Tino telā ne fai mai penei: “Ko oti ne tauto a Ieova, kae e se salamō a ia i ei, ‘A koe ko te faitaulaga ki te se-gata-mai’”) 22  ko Iesu eiloa telā ko oti ne tuku mai e pelā me se fakamaoniga mō se feagaiga telā e ‵lei atu. 23  E se gata i ei, ne ‵tau o tokouke a faitaulaga i te fakasologa tenā me e se mafai o tumau se tino e tokotasi i te tofi tenā ona ko te mate. 24  Kae ona ko ia e ola ki te se-gata-mai, e seai se tino e sui ne ia tena tofi fakafaitaulaga. 25  Tela la, e mafai o faka‵sao katoatoa ne ia a tino kolā e olo atu ki te Atua e auala i a ia, me e ola faeloa a ia ke fautua mō latou. 26  Me e ‵tau eiloa o maua ne tatou se vaegā faitaulaga sili penei, telā e alofa fakamaoni, e se agasala, e se lailai, e ‵vae keatea mai i tino agasala, kae e fakamaluga aka ke maluga atu i lagi katoa. 27  E se pelā mo faitaulaga sili konā, e se manakogina ke ofo atu ne ia a taulaga i aso takitasi, muamua mō ana agasala totino kae fakamuli mō agasala a tino katoa, me ne fai ne ia te mea tenei fakatasi eiloa mō taimi katoa i te taimi ne ofo atu ei ne ia a ia eiloa. 28  Me ne faka‵sopo ne te Tulafono a tāgata kolā e isi ne olotou vāivāiga e pelā me ne faitaulaga sili, a ko te muna o te tautoga telā ne fai mai tua o te Tulafono ne fakasopo aka i ei te Tama telā ko oti ne fai ke ‵lei katoatoa ki te se-gata-mai.

Fakamatalaga mai lalo

 I te ‵gana Eleni “ne ‵vae.”
 I te ‵gana Eleni, “mai tena foitino.”
 Io me “ka vau i tena gafa.”