Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Epelu 6:1-20

6  Tela la, ona ko te mea ko oti ne tiaki ne tatou a akoakoga faigo‵fie e uiga ki a Keliso, e ‵tau eiloa o kausaki atu tatou ke ga‵solo o ma‵tua ‵lei, kae se toe ‵foki ki akoakoga kamata, e pelā mo te salamō i galuega ma‵sei, mo te fakatuanaki ki te Atua,  akoakoga e uiga ki te papatisoga mo te fakaekeatuga o lima, te toe‵tu mai o tino ‵mate, mo te fakamasinoga se-gata-mai.  Kae ka fai eiloa ne tatou te mea tenei, māfai e talia ne te Atua.  Me e se mafai o fai ke toe sala‵mo a latou kolā ko oti ne malamalama, kae kolā ko oti ne tami ki te meaalofa faivasaga mai te lagi, kae kolā ko oti ne maua ne latou te agaga tapu,  kae kolā ko oti ne tami ki te ‵lei o te muna a te Atua mo mea ‵mana i te olaga telā ka oko mai,  kae kolā ko ‵to keatea, me ko toe ‵tuki ne latou te Tama a te Atua ki te lakau fakasaua* kae e fakamasiasi atu ne latou a ia i mua o tino katoa.  Me ko te laukele telā e inu ki te vaiua telā e ‵to sāle atu ki luga i ei, kae e fakaola ne ia a lakau kaina ke aoga ki tino kolā e ‵toki ne latou, e maua eiloa ne ia te fakamanuiaga mai te Atua.  Kae kafai e fakaola aka ne te laukele a lakau tala‵tala mo lakau makai‵kai, ka tiaki atu me ko pili o malaia; kae ka iku atu eiloa ki te ‵sunu ki te afi.  Kae ko koutou, e oku taina pele, a tatou e tali‵tonu ki mea kolā e ‵lei atu—ko mea e uiga ki te fakaolataga—e tiga eiloa e fai‵pati atu matou i te auala tenei. 10  Me i te Atua e sē se tino sē amiotonu ko te mea ke puli i a ia otou galuega mo te alofa ne fakaasi atu ne koutou mō tena igoa, me ne tavini atu kae koi tavini atu eiloa koutou ki tino tapu. 11  Kae e ma‵nako matou ke fakaasi mai ne koutou taki tokotasi te loto finafinau eiloa tenā, ko te mea ke fakamautinoa katoatoa aka ei te otou fakamoemoega ke oko eiloa ki te fakaotiga, 12  ko te mea ke se mafai o paie koutou, kae ke fakaakoako koutou ki tino kolā ne maua ne latou a folafolaga e auala i te fakatuanaki mo te kufaki. 13  Me i te taimi ne fai atu ei ne te Atua tena folafolaga ki a Apelaamo, ne tauto atu a ia i tena igoa eiloa, ona ko te mea e seai se tino e maluga atu i a ia, 14  ana muna: “Ka fakamanuia eiloa ne au a koe, kae ka fakatokouke eiloa ne au a tau fanau.” 15  Tela la, mai tua o te fakaasiatuga ne Apelaamo a te loto kufaki, ne maua ei ne ia te folafolaga tenei. 16  Me e tau‵to eiloa a tino ki se tino telā e maluga atu i a latou, kae e fakagata ne te tautoga tenā a kinauga katoa, me se fakatalitonuga faka-te-tulafono tenā ki a latou. 17  I te auala foki tenei, i te taimi ne filifili ei ne te Atua ke fakaasi faka‵lei atu ki sui o te folafolaga me e se mafai o ‵fuli tena fuafuaga, ne fai ei ne ia se tautoga, 18  ko te mea, ke fakaasi mai i ei e auala i mea e lua kolā e se mafai o ‵fuli kae e se mafai o loi te Atua, me i a tatou kolā e ‵tele ki te koga faka‵lafi ka maua eiloa ne tatou se fakamalosiga lasi ke puke ‵mau ki te fakamoemoega telā e moe mai i ‵tou mua. 19  E fai te fakamoemoega tenei e pelā me se taula mō ‵tou ola, e mautinoa kae ‵mautakitaki, kae e takitaki ne ia ke ulu atu tatou ki te suā feitu o te ‵pui laugatu,* 20  telā ne ulu muamua atu i ei a Iesu mō tatou, kae telā ko oti ne fai mo fai te faitaulaga sili ki te se-gata-mai, e pelā eiloa mo Mekisateko.

Fakamatalaga mai lalo

 Ke onoono ki te Mataupu Fakaopoopo e 7.
 Ko te ‵pui laugatu telā e ‵pui ki ei te Potu Tafasili i te Tapu.