Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Epelu 3:1-19

3  Tela la, e oku taina tapu, kolā e aofia i te kalagaga ki te lagi, ke mafau‵fau koutou ki te apositolo mo te faitaulaga sili telā e folafola* atu ne tatou—ko Iesu.  Ne fakamaoni a ia ki te Tino telā ne fakasopo ne ia a ia, e pelā eiloa mo te fakamaoni o Mose i loto i te fale o te Tino tenā.  Me e ‵tau o sili atu tena* ‵malu i lō Mose, e pelā eiloa mo te tino telā ne faite ne ia te fale e tāua atu i lō te fale.  Se mea tonu me i fale katoa ne faite ne se tino, kae ko te tino telā ne faite ne ia a mea katoa ko te Atua.  Kae ko Mose ne fakamaoni e pelā me se tavini i te fale o te Tino tenā e pelā me se fakamaoniga* o mea kolā ka fakaasi mai fakamuli,  kae ne fakamaoni a Keliso e pelā me se Tama i te fale o te Tino tenā. A tatou ko te fale o te Tino tenā, māfai e puke ‵mau tatou ki te ‵tou saolotoga o fai‵pati atu mo te fakamoemoega telā e fakamata‵mata tatou ki ei ke oko eiloa ki te fakaotiga.  Tela la, e pelā eiloa mo pati konei a te agaga tapu: “Kafai e lagona ne koutou a tena leo i te aso nei,  sa loto ma‵keke e pelā eiloa mo te taimi ne fai ei ne otou tupuga au ke kaitaua, i te aso ne tofotofo ei au ne latou i te koga lavaki,  i te taimi ne tofotofo ei au ne otou tupuga e tiga eiloa ko oti ne lavea ne latou aku galuega ‵mana i tausaga e fasefulu. 10  Tenā eiloa te pogai ne takalialia ei au ki te kautama tenā kae fai atu, ‘E ‵soko eiloa te sē faka‵logo mai o latou ki a au i olotou loto, kae e seki iloa eiloa ne latou oku auala.’ 11  Tela la, ne tauto ei au i toku kaitaua, ‘Ka se mafai o ulu atu latou ki loto i toku koga malōlō.’” 12  Ke fakaeteete koutou, e oku taina, ke mo a ma tupu aka se mea masei i te loto o se tino i a koutou e aunoa mo te fakatuanaki mai te fano keatea mai te Atua ola. 13  Ke tumau i te fakatau fakamalosi atu te suā tino ki te suā tino, i aso takitasi a koi tuai o oti atu “te Aso nei,” ko te mea ke mo a se tino i a koutou e fakamakeke tena loto ne te malosi fakaloiloi o te agasala. 14  Me ka ‵kau fakatasi eiloa a tatou mo Keliso māfai e ‵piki ‵mau tatou ki te ‵tou loto talitonu mai te kamataga ke oko eiloa ki te fakaotiga. 15  E pelā eiloa mo pati konei: “Kafai e lagona ne koutou a tena leo i te aso nei, sa loto ma‵keke e pelā eiloa mo te taimi ne fai ei ne otou tupuga au ke kaitaua.” 16  Ko oi la kolā ne lagona ne latou kae fai foki ne latou te Atua ke kaitaua? E se ko latou katoa kolā ne o‵mai keatea mai Aikupito mai lalo i a Mose? 17  E se gata i ei, ko oi ne takalialia ki ei te Atua i tausaga e fasefulu? E se ko latou kolā ne agasala kae tafola valevale olotou foitino ‵mate i te koga lavaki? 18  Kae ko oi ne tauto te Atua ke se ulu atu ki loto i tena koga malōlō? E se ko latou kolā ne seki faka‵logo? 19  Tela la, e lavea ne tatou me ne seki mafai o ulu atu latou ki loto ona ko te seai o se lotou fakatuanaki.

Fakamatalaga mai lalo

 Io me “fakailoa atu ki tino katoa.”
 Telā ko Iesu.
 Io me “se molimau.”