Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Epelu 13:1-25

13  Ke na fakatumau te otou a‵lofa fakataina.  Sa puli i a koutou te uiga talimalo, me e auala i ei, ne talimalo ne nisi tino a agelu kolā e seki iloa ne latou.  Ke masaua ne koutou a tino i te falepuipui e pelā eiloa me e ‵loka fakatasi koutou mo latou, e pelā foki mo latou kolā e fai fakamaseigina, ona ko te mea koi ‵nofo fakatasi koutou i te lalolagi.*  E ‵tau o faka‵malu ne tino katoa te fakaipoipoga, kae ke se lailai te moega o te fakaipoipoga, me ka fakamasino ne te Atua a tino e fina ki amioga fakatauavaga sē ‵tau penā foki loa mo tino mulilua.  Ke ‵kalo keatea mai te fakavale‵vale ki tupe i otou olaga kae ke lotoma‵lie ki mea ko maua ne koutou. Me ko oti ne fai mai a ia: “Ka se tiaki lele ne au a koutou kae ka se tuku tiaki lele ne au a koutou.”  Ko te mea ke loto ‵toa tatou o fai aka penei: “A Ieova ko toku fesoasoani, ka se mataku lele au. Se a te mea e mafai o fai ne te tagata ki a au?”  Ke masaua ne koutou a tino kolā e fai ne latou te takitakiga i a koutou, kolā ne taku atu ne latou te muna a te Atua ki a koutou, kae kafai e mafau‵fau koutou ki ikuga o olotou amioga ‵lei ke fakaakoako la ki te lotou fakatuanaki.  E se mafuli a Iesu Keliso i te aso anafi mo te aso nei, ke oko eiloa ki te se-gata-mai.  Ke se takitaki ‵se koutou ne akoakoga kese‵kese kolā e ‵fou ki a koutou; me e ‵lei atu māfai e fakamalosi aka te loto ne te alofa tauanoa, i lō meakai,* kolā e seai se aoga ki a latou kolā e fakalave‵lave i te ‵sala atu ki ei. 10  Me e isi se ‵tou fatafaitaulaga telā e se ‵tau o ‵kai i ei a latou kolā e fai ne latou te taviniga tapu i te faleie. 11  Me e ‵sunu ke liu lefu i tua o te fa‵kai a foitino o manu kolā e ave olotou toto ne te faitaulaga sili ki loto i te koga tapu mo fai a taulaga mō agasala. 12  Tela la, ne tamate foki a Iesu i tua o te fa‵kai ko te mea ke fakatapugina a tino ki tena toto totino eiloa. 13  Tela la, ke na olo atu tatou ki a ia i tua o te fa‵kai, mai te amoga o fakatauemuga kolā ne kufaki ne ia, 14  me e se maua ne tatou i konei se fa‵kai telā e tumau, kae e ‵sala malosi atu eiloa tatou ki te fa‵kai telā ka oko mai. 15  Ke ofo atu faeloa ne tatou se taulaga o vikiga ki te Atua e auala i a ia, telā ko fuataga o ‵tou gutu kolā e tavae atu ki tena igoa i mua o tino katoa. 16  E se gata i ei, sa puli o fai a mea ‵lei kae tuku a mea kolā ko maua ne koutou ki nisi tino, me e fiafia malosi eiloa a te Atua ki vaegā taulaga penā. 17  Ke faka‵logo koutou ki a latou kolā e fai ne latou te takitakiga i a koutou kae ke ‵lago atu ki ei, me e puipui ne latou otou ola kae e tuku atu ne latou se tala ki te Atua e uiga ki ei; ko te mea ke fai ne latou te mea tenā mo te fiafia kae se mo te fi‵ta, me e fakamasei atu i ei ki a koutou. 18  ‵Talo faeloa mō matou. E tali‵tonu matou me ko maua ne matou se loto lagona ‵ma, me e ma‵nako eiloa matou ke fakamaoni matou i mea katoa kolā e fai ne matou. 19  Kae e fakamalosi atu au i se auala fakapito ke ‵talo koutou ko te mea ke vave o oko atu au ki a koutou. 20  Nei la, ke i luga i te Atua o te filemu, telā ne avaka ne ia mai te mate te tausi mamoe sili o mamoe, ko te ‵tou Aliki ko Iesu, fakatasi mo te toto o te feagaiga se-gata-mai, 21  ke faka‵fonu ne ia koutou ki mea ‵lei katoa i te faiga o tena loto, ke ga‵lue i loto i a tatou e auala i a Iesu Keliso a mea kolā e fakafiafia atu ki a ia; ke i luga i a ia te ‵malu ki te se-gata-mai ki te se-gata-mai eiloa. Amene. 22  Nei la, ko fakamalosi atu au ki a koutou, e oku taina, ke faka‵logo koutou mo te kufaki ki pati fakama‵losi loto konei, me ko oti eiloa ne fakatoka ne au te tusi tenei ki a koutou i nai pati fua konei. 23  E fakailoa atu ki a koutou me ko oti ne fakasaoloto te ‵tou taina ko Timoteo. Kafai e oko vave mai a ia, ka ma‵laga fakatasi atu māua ki a koutou. 24  ‵Moli atu oku alofaga ki a latou katoa kolā e fai ne latou te takitakiga i a koutou e pelā foki ki tino tapu katoa. E ‵moli atu foki alofaga o latou konei i Italia ki a koutou. 25  Ke i luga i a koutou katoa te alofa tauanoa o te Atua.

Fakamatalaga mai lalo

 Se tugapati fakauiga telā e fakauiga penei, “e pelā eiloa me puapuaga fakatasi koe mo latou.”
 Ko meakai kolā e fakatapu mai lalo i te Tulafono a Mose.