Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Epelu 12:1-29

12  Tela la, ona ko tatou ko sikomia ne molimau e tokouke,* ke na ‵pei ne tatou keatea a mea ‵mafa katoa mo te agasala telā e faigofie o lave‵lave tatou i ei, kae ke na ‵tele atu tatou mo te lotomau i te fakatau‵telega tenei i ‵tou mua,  mai te ‵kilo atu faeloa ki te Sui Sili, ko te Tino telā e fakakatoatoa ne ia te ‵tou fakatuanaki, ko Iesu. Me ne kufaki ne ia te lakau fakasaua* ona ko te fiafia telā e moe i ana mua, ne seki saga atu ki tena masiasi, kae ne sagasaga ifo i te feitu fakaatamai o te nofogaaliki o te Atua.  E tonu, mafaufau faka‵lei ki te tino telā ne kufaki ne ia a pati ‵teke a tino agasala kolā e fakamasei atu fua ki a latou eiloa, ko te mea ke mo a koutou ma fi‵ta kae loto vāi‵vai.  I te otou taua atu ki te agasala tenā, ne seki oko aka eiloa koutou ki te tulaga telā ko fakamaligi ei otou toto,  kae ko puli galogalo i a koutou te fakamalosiga telā e taku ei koutou ko tama: “Taku tama, sa manatu māmā ki polopolokiga mai i a Ieova, io me e loto vāivāi koe māfai e fakatonutonu koe ne ia.  Me e polopoloki ne Ieova a te tino telā e alofa a ia ki ei. E tonu, e fakasala* ne ia a te tino telā ko oti ne fai ne ia mo fai tena tama.”  E ‵tau o kufaki koutou me tenā eiloa te vaega e tasi o te otou polopolokiga.* E fai ne te Atua a koutou e pelā me ne ana tama. Kae ko oi la te tama telā e se polopoloki ne tena tamana?  Kae kafai ne seki maua ne koutou katoa a te polopolokiga tenei, ko fai ei koutou mo fai ne tama fua‵taka kae e se ne tama tonu.  E se gata i ei, e masani sale o polopoloki tatou ne ‵tou tamana faka-te-foitino, kae e āva eiloa tatou ki a latou. E se sili fakafia atu la ke faka‵logo tatou ki te ‵tou Tamana faka-te-agaga* ko te mea ke ola tatou? 10  Me ne polopoloki ne latou a tatou i se taimi toetoe e ‵tusa mo mea kolā e ‵lei i te lotou faka‵tau, kae e polopoloki ne ia tatou mō te ‵tou ‵lei ko te mea ke ‵kau fakatasi tatou i tena ‵malu. 11  E tonu, e seai se polopolokiga e foliga mai me e fakafiafia i te vaitaimi tenei, kae e fakalogo‵mae* mai fua. Kae fakamuli loa ka ‵fua mai i ei a fuataga o te filemu mo te amiotonu i a latou kolā ne akoakogina e auala i ei. 12  Tela la, ke fakama‵losi aka a lima kolā ko gau‵gau mo tulivae kolā ko vāi‵vai, 13  kae ke faka‵tonu aka faeloa a auala mō otou vae, ko te mea ke se seke se sokogā ivi o se tino vae masei, kae ke toe faka‵lei aka. 14  Kausaki atu ke maua te filemu mo tino katoa, mo te fakatapuga telā e ‵tau o maua, me kafai e se maua, e se mafai o lavea ne se tino a te Aliki. 15  Ke onoono faka‵lei ke mo a ma se maua ne se tino i a koutou a te alofa tauanoa o te Atua; ke seai se aka poisini e ‵somo aka kae faka‵tupu fakalavelave ko te mea ke se fakamasei ei a tino e tokouke. 16  Kae ke seai se tino i a koutou e fina ki amioga fakatauavaga sē ‵tau io me se tino telā e se fakatāua ne ia a mea tapu, e pelā mo Esau, telā ne fesuiaki ne ia tena tulaga toekimua mo se ‵kaiga fua e tasi. 17  E iloa ne koutou me fakamuli ifo i te taimi ne toe manako ei tou tagata ke maua ne ia te fakamanuiaga, ne seki toe talia ke maua ne ia, me e tiga eiloa ne fakatagi atu a ia mo loimata ke toe fai se ‵fuliga ki ei, ne seki maua eiloa ne ia. 18  Me i a koutou e seki fakapili‵pili atu ki te mauga telā ne mafai o puke koutou ki ei kae telā ko ‵ka i te afi, mo se kaumana pouli mo te pouli tagataga mo se kaumatagi, 19  mo te ‵tagi o te pu mo te leo e faipati mai, kae i te lagonaga ne latou a mea konā ne fakatagi atu ei a tino ke se toe fai atu ne pati ki a latou. 20  Me ko se mafai ne latou o fa‵ki te fakatonuga tenei: “Kafai foki eiloa e patele se manu ki te mauga, e ‵tau o peipei ke mate.” 21  E se gata i ei, ona ko te fakama‵taku o mea konā, ne fai mai ei a Mose: “Au ko mataku kae polepole.” 22  Kae ko oti ne oko atu koutou ki te Mauga o Siona mo te fa‵kai o te Atua ola, ko Ielusalema faka-te-lagi, mo agelu e se lausia,* 23  e maopoopo fakatasi, mo te fakapotopotoga a te uluaki kolā ko tusi olotou igoa i te lagi, mo te Atua te Famasino o tino katoa, mo ola faka-te-agaga o tino amio‵tonu kolā ko oti ne fai ke ‵lei katoatoa, 24  mo Iesu te sokoga o te feagaiga fou, mo te toto ne faka‵pisi atu, kae telā e faipati mai i se auala e tai ‵lei atu i lō te toto o Apelu. 25  Ke fakaeteete ke mo a ma se faka‵logo* koutou ki te tino telā e faipati mai. Me kafai ne seki ‵sao a latou kolā ne seki faka‵logo ki te fakatonuga a te Atua telā ne fai atu i te lalolagi, e pefea te masei atu māfai e fulitua atu tatou ki a ia telā e faipati mai i te lagi? 26  I te taimi tenā ne galulu eiloa te lalolagi i tena leo, kae nei la ko tauto mai a ia, “Kae ka toe lūlū ne au, e se gata fua i te lalolagi, kae e pelā foki mo te lagi.” 27  A te tugapati “Kae ka toe” e fakauiga i ei ki te avega keatea o mea kolā e lūlūgina—ko mea kolā ko oti ne faite—ko te mea ke tumau a mea kolā e seki lūlūgina. 28  Tela la, ona ko te mea ka maua ne tatou te Malo telā e se mafai o lūlūgina, ke na maua faeloa ne tatou te alofa tauanoa, telā e mafai o tuku atu i ei ne tatou a te taviniga tapu telā e talia ne te Atua mo te mataku mo te fakaaloalo lasi. 29  Me i te ‵tou Atua ko te afi foki telā e ‵sunu i ei a mea katoa.

Fakamatalaga mai lalo

 I te ‵gana Eleni, “ne molimau e tokouke e pelā me se kaumana lasi.”
 Ke onoono ki te Mataupu Fakaopoopo e 7.
 I te ‵gana Eleni, e “‵kini.”
 Io me “fakamasani.”
 Io me se “Tamana o te ‵tou ola faka-te-agaga.”
 Io me “fakafanoanoa.”
 Io me “ko te fia sefulu afe.”
 Io me “fai ne fakamasakoga.”