Epelu 11:1-40

11  A te fakatuanaki ko te talitonu mo te mautinoa ki mea kolā e fakamoe‵moe tatou ki ei, ko te fakaasiga manino o mea ‵tonu kolā e se lavea ki mata.  Me e auala i te mea tenei, ne molimau atu ei ki tino i aso mua* me ne fiafia eiloa te Atua ki a latou.  Ona ko te fakatuanaki, e iloa ei ne tatou me ne faite a mea katoa i te lagi mo te lalolagi e auala i te muna a te Atua, ko te mea ke mafai o matea atu a mea kolā e matea mai i mea kolā e se matea.  Ona ko te fakatuanaki, ne ofo atu ei ne Apelu se taulaga telā e sili atu tena aoga i lō Kaino, kae e auala i te fakatuanaki tenā ne molimau atu ei i a ia e amiotonu. Kae ne molimau atu foki te Atua ki ei mai te taliaga o ana meaalofa. E tiga eiloa ko oti ne mate tou tagata, kae e faipati mai eiloa a ia e auala i tena fakatuanaki.  Ona ko te fakatuanaki, ne ave ei keatea a Enoka ko te mea ke se lavea ne ia te mate, kae ne seki toe lavea atu a ia me ko oti ne ave ne te Atua keatea. Kae koi tuai o ave keatea a ia, ne maua eiloa ne ia se molimau me ko oti ne fakafiafia atu a ia ki te Atua.  E se gata i ei, e aunoa mo te fakatuanaki e se mafai o fakafiafia faka‵lei atu se tino ki te Atua, me e ‵tau o talitonu te tino telā e fanatu ki a ia me e ola tonu te Atua kae e avatu ne ia te taui ki tino kolā e ‵sala malosi atu ki a ia.  Ona ko te fakatuanaki, ne fakaasi atu ei ne Noa tena mataku ki te Atua i te faitega o te vaka mō te faka‵saoga o tena kāiga. I te otiga ne fakailoa atu ki a ia a mea kolā ne seki lavea ne ia, kae e auala i tena fakatuanaki ne taku fakamasei ei ne ia te lalolagi, kae ne fai a ia mo fai te sui o te amiotonu telā e iku mai i te fakatuanaki.  Ona ko te fakatuanaki, ne fakalogo eiloa a Apelaamo i te taimi ne kalagagina ei a ia ke fano ki se fenua telā ka fai mo fai tena tofi. Ne fano ei a ia e tiga eiloa ne seki iloa ne ia te koga e fano a ia ki ei.  Ona ko te fakatuanaki, ne nofo ei a ia i te fenua o te folafolaga e pelā me se fakaalofa, kae ne nofo i faleie fakatasi mo Isaako mo Iakopo, ko sui foki konā o te folafolaga eiloa tenā. 10  Me ne fakatalitali a ia ki se fa‵kai telā e isi ne ana fakavae ‵tonu, kae telā ne fakatoka* kae fakatu eiloa ne te Atua. 11  Ona ko te fakatuanaki, ne maua ei ne Sala te malosi ke mafai o fai sena tama* e tiga eiloa ko leva ne ‵seke tena taimi, me ne iloa ne ia me e fakamaoni a te tino telā ne fai atu ne ia te folafolaga ki a ia. 12  Ona ko te pogai tenei, ne fa‵nau mai ei a tama‵liki e se lausia mai te tagata fua e tokotasi, se tagata ko matua ‵ki kae ko pili o mate, ke tokouke ana tama e pelā mo fetu i te lagi kae e se mafai o lau e pelā mo one i te matafaga. 13  Ne ‵mate a latou katoa konei i te fakatuanaki, e tiga eiloa e seki lavea ne latou te fakataunuga o folafolaga konei, kae ne lavea ‵mao eiloa ne latou kae fia‵fia ki ei kae ne folafola atu foki ne latou ki tino katoa i a latou ne fakaa‵lofa kae ne tino kolā e se ‵nofo tumau i te fenua tenā. 14  Me i a latou kolā e fai‵pati mai i te auala tenei e fakamaoni mai i ei me i a latou e ‵sala malosi atu ke maua se koga mō latou. 15  Kae moi ne masaua faeloa ne latou te koga telā ne o‵mai latou i ei, penei ko maua eiloa ne latou te avanoaga ke toe ‵foki atu ki ei. 16  Kae nei la, ko kausaki atu latou ki se koga telā e ‵lei atu, se koga i te lagi. Tela la, ko se mā ei te Atua ke fakaigoa a ia ne latou ki te lotou Atua, me ko oti ne fakatoka ne ia se fa‵kai mō latou. 17  Ona ko te fakatuanaki, ne ofo atu ei ne Apelaamo a Isaako, i te taimi ne tofotofogina ei a ia, kae ne taumafai te tino telā ne maua ne ia a te folafolaga mo te fiafia, ke ofo atu tena tama eiloa e tokotasi, 18  e tiga eiloa ko oti ne fakailoa atu ki a ia penei: “A te tino telā ka fakaigoa ki ‘tau fanau’ ka vau eiloa e auala i a Isaako.” 19  Kae ne talitonu a ia me e mafai ne te Atua o toe fakatu mai a Isaako mai te mate, kae ne toe maua eiloa ne ia a Isaako i konā i se auala fakatusa. 20  Ona ko te fakatuanaki, ne fakamanuia atu foki a Isaako ki a Iakopo mo Esau e uiga ki mea kolā ka oko mai. 21  Ona ko te fakatuanaki, ne fakamanuia ei ne Iakopo a tama ta‵gata taki tokotasi a Iosefa, i te taimi ko pili ei a ia o mate, kae ne tapuaki kae fakapale atu ki luga i tena tokotoko. 22  Ona ko te fakatuanaki, ne faipati atu ei a Iosefa e uiga ki te malaga a fanau a Isalaelu o olo atu keatea mai Aikupito kae ko pili o mate a ia; kae ne tuku atu tena fakatonuga e uiga ki tena tanuga. 23  Ona ko te fakatuanaki, ne ‵funa ei a Mose ne ana mātua i masina e tolu mai tua o tena fanaumaiga, me ne lavea ne lāua te tinogali o te tamaliki kae ne seki ma‵taku lāua ki te fakatonuga a te tupu. 24  Ona ko te fakatuanaki, ne ita ei a Mose ma fakaigoa a ia ki te tama tagata a te tama fafine a Falao i te taimi ko matua ei a ia, 25  kae ne filifili aka ke fai fakamasei a ia fakatasi mo tino o te Atua i lō te kau atu ki fakafiafiaga o te agasala kolā e se tumau, 26  me ne fakatāua malosi ne ia a logo‵maega o Keliso e pelā me ne koloa e tāua atu i lō koloa katoa o Aikupito; me ne kilo ‵tonu atu a ia ki te taui telā ka maua ne ia. 27  Ona ko te fakatuanaki, ne tiaki ei ne ia a Aikupito e aunoa mo te mataku ki te kaitaua o te tupu, me ne lavea faeloa ne ia te Tino telā e se mafai o lavea. 28  Ona ko te fakatuanaki, ne fakamanatu ei ne ia te paseka mo te faka‵pisiatuga o toto, ko te mea ke se tamate a uluma‵tua a tino Isalaelu ne te agelu a te Atua. 29  Ona ko te fakatuanaki, ne olo atu ei latou i loto i te Tai Kula e pelā eiloa me se laukele malō, kae i te taumafaiga a te kau Aikupito ki ei, ne folo katoa latou ne te vai. 30  Ona ko te fakatuanaki, ne ma‵toli ifo ei a ‵pui o Ieliko i te otiga ne fakatamilo ne latou i aso e fitu. 31  Ona ko te fakatuanaki, ne seki fakaseai atu ei a te fafine talitagata ko Lahapa fakatasi mo tino kolā ne seki faka‵logo, me ne talimalo ne ia a sipai mo te filemu. 32  Kae ne a foki la aku nisi pati ka fai atu? Me ka se mafai o lava te taimi e fakamatala atu ei ne au a tala e uiga ki a Kitiona, Palako, Samasoni, Iefata, Tavita, e pelā foki mo Samuelu mo nisi pelofeta. 33  Ona ko te fakatuanaki, ne fakataka‵vale ei ne latou a malo, ne amio‵tonu latou, ne maua ne latou a folafolaga, kae ‵pono atu a gutu o leona, 34  ne taofi ne latou te malosi o te afi, ne ‵sao mai te mata o te pelu, ne toe ma‵losi latou mai se tulaga vāivāi, ne loto ‵toa i taua, kae ne fakataka‵vale ne latou a kautau kolā ne taua atu ki a latou. 35  Ne toe maua ne fāfine olotou tino ‵mate e auala i te toetu; kae ne fakasauagina a nisi tāgata me ne seki talia ne latou ke fakasaoloto latou e auala i se togiola, ko te mea ke maua ne latou te toetu telā e ‵lei atu. 36  E tonu, ne maua ne nisi tino olotou tofotofoga e auala i fakatauemuga mo ‵kini, kae e sili atu i te masei ko olotou pikifao mo te ‵pei ki te falepuipui. 37  Ne peipei latou ki fatu, ne tofotofogina latou, ne ‵soa vaeluagina, ne ‵mate latou i te pelu, ne olo sale kae ‵pei ki pa‵kili o mamoe mo pa‵kili o kouti i te taimi ne ma‵tiva ei latou, ne fakasauagina, ne fai fakama‵seigina; 38  kae ko tō ‵lei a tino konei ke ‵nofo i se lalolagi penei. Ne olo sale latou i toafa mo mauga kae ‵nofo i ana mo lua o te lalolagi. 39  Kae ko latou katoa konei, e tiga eiloa ne maua ne latou se molimau ‵lei ona ko te lotou fakatuanaki, ne seki lavea ne latou te fakataunuga o te folafolaga, 40  me ne lavea ‵mao ne te Atua se mea telā e ‵lei atu mō tatou, ko te mea ke mo a ma fai ke ‵lei katoatoa muamua latou i a tatou.

Fakamatalaga mai lalo

Epe 11:2  Io me ko “‵tou tupuga.”
Epe 11:10  Io me se “tino e fakatoka ne ia te palani o so se mea.”
Epe 11:11  I te ‵gana Eleni, ko te “fanau.”