Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Efeso 6:1-24

6  Tama‵liki, ke faka‵logo koutou ki otou mātua i te ‵kau fakatasi mo te Aliki, me se faiga amiotonu a te mea tenei:  “Āva ki tou tamana mo tou mātua.” Tenei te tulafono muamua telā e aofia i ei se folafolaga:  “Ko te mea ke ‵lei koutou kae ke ola leva foki koutou i te lalolagi.”  Kae ko koutou e tamana, sa fakaitaitagina otou tama‵liki, kae ke puti aka faeloa latou i polopolokiga mo fakatakitakiga a Ieova.  A koutou e pologa, ke faka‵logo koutou ki otou matai faka-te-foitino, mo te ma‵taku mo te pole‵pole mo te fakamaoni i otou loto, e pelā eiloa mo te otou faka‵logo ki a Keliso,  e se ko te mea ke fakafiafia ne koutou a tino māfai e lavea ne latou a koutou, kae e pelā me ne pologa a Keliso, i te faiga o te loto o te Atua mo te loto kātoa.  Ke ga‵lue koutou mo se kilokiloga ‵lei, e pelā eiloa me e ga‵lue koutou mō Ieova, kae e se mō tino,  me e iloa ne koutou me i so se mea ‵lei e fai ne se tino, ka toe maua eiloa ne ia te mea tenā mai i a Ieova, faitalia me ko ia se pologa io me se tino saoloto.  E penā foki koutou e matai, ke fai faeloa ne koutou penā ki a latou, kae ke tiaki a uiga fakasaua, me e iloa ne koutou me i te otou Matai telā ko te lotou Matai foki e nofo i te lagi, kae e se fakailoga tino a ia. 10  Kae ko te ‵toe mea, ke maua faeloa ne koutou a te ‵mana i te Aliki mo tena malosi sē fuafuagina. 11  Fakapei ki luga i a koutou a vaega katoa o te gatu tau mai te Atua ko te mea ke ‵tu ‵mautakitaki koutou o ‵teke atu a togafiti ma‵sei a te Tiapolo. 12  Me i a tatou e se taua mo tino kolā e faite ki ‵kano mo ivi,* kae e taua eiloa tatou mo malo, mo pulega, mo takitaki o te lalolagi pouliuli tenei, mo agaga ma‵sei i te lagi. 13  Ona ko te mea tenei, ke fakapei ki luga i a koutou a vaega katoa o te gatu tau mai te Atua, ko te mea ke mafai o ‵teke atu koutou māfai e oko mai a te aso masei, kae kafai ko oti ne fakataunu ne koutou a mea katoa, ka ‵tu ‵mautakitaki eiloa koutou. 14  Tela la, ke ‵tu ‵mautakitaki koutou kae ‵sai atu a te munatonu i otou kona e pelā me se fusi, a ko te amiotonu e pelā me se ufifatafata, 15  kae ke toka otou vae mō te folafolaatuga o te tala ‵lei o te filemu. 16  Ke fakaaoga ne koutou a te talita lasi o te fakatuanaki i so se fakanofonofoga, ko te mea ke tamate ne koutou ki ei a matasana ‵ka a te tino masei. 17  Ke talia foki ne koutou a te puloutau o te fakaolataga mo te pelu o te agaga, telā ko te muna a te Atua, 18  kae mai te fakaaogaga o vaegā ‵talo mo fakatagi katoa, ke ‵talo atu faeloa koutou i taimi katoa i te agaga. Ko te mea ke fai penā, ke ala faeloa koutou kae ‵talo atu mō tino tapu katoa, 19  e pelā foki mo au, ko te mea kafai e fakamaga toku gutu ke maua eiloa ne au a te saolotoga o faipati atu ke fakailoa atu ei te mea ‵funa kae tapu e uiga ki te tala ‵lei, 20  telā e galue ei au e pelā me se sui o te Atua telā e pikifao; ko te mea ke faipati atu au e uiga ki ei mo te loto toa e pelā eiloa mo te mea e ‵tau o fai ne au. 21  Ko te mea ke iloa foki ne koutou a mea e uiga ki a au, mo aku mea e fai, ka fakailoa atu eiloa ne Tukasi, se taina fagasele mo te tavini fakamaoni i te Aliki, a mea katoa konā ki a koutou. 22  Ka uga atu ne au a ia ki a koutou mō te pogai eiloa tenei, ko te mea ke iloa ne koutou a mea e uiga ki a matou kae ke fakamafanafana atu foki a tala konā ki otou loto. 23  Ke i luga i taina katoa te filemu mo te alofa fakatasi mo te fakatuanaki mai te Atua te Tamana mo te Aliki ko Iesu Keliso. 24  Ke i luga i a latou katoa kolā e tumau te lotou a‵lofa ki te ‵tou Aliki ko Iesu Keliso a te alofa tauanoa.

Fakamatalaga mai lalo

 I te ‵gana Eleni, ko “toto mo ‵kano.”