Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Efeso 4:1-32

4  Tela la, e fakatagi atu au, te pagota ona ko te Aliki, ke sa‵sale koutou i te auala telā e fetaui mo te kalagaga telā ne kalagagina ei koutou,  mo te loto maulalo i taimi katoa, i te agamalu, mo te kufaki, kae ke fakatau fa‵ki koutou i otou mea ‵se i te alofa,  i te otou taumafai malosi ke fakatumau ne koutou te tasi o te agaga telā ko te fusi o te filemu.  E tasi te foitino, kae e tasi foki te agaga, e pelā eiloa mo te fakamoemoega e tasi telā ne kalagagina ei koutou.  E tokotasi te Aliki, e tasi te fakatuanaki, e tasi te papatisoga.  E tokotasi te Atua telā ko te Tamana o tino katoa, kae e pule a ia ki a latou katoa, e galue e auala i a latou katoa, kae e galue foki i loto i a latou katoa.  Ne tuku mai ki a tatou taki tokotasi a te alofa tauanoa e ‵tusa mo te auala e tufa mai ei ne Keliso a te meaalofa faivasaga tenā.  Tela la, ne fai mai a ia penei: “Ne ave ne ia a pagota i tena fanakaga ki luga; ne tuku mai ei ne ia a tāgata e pelā me ne meaalofa.”  Se a la te uiga o te tugapati “i tena fanakaga ki luga”? E fakauiga i ei me ne fanaifo foki a ia ki koga ma‵lalo, telā ko te lalolagi. 10  Ko te tino telā ne fanaifo ki lalo ko ia foki tenā ne fanaka ki luga ke maluga fakafia atu a ia i lagi katoa, ko te mea ke fakataunu ne ia a mea katoa. 11  Kae ne tuku mai ne ia a nisi tino ke fai pelā me ne apositolo, a ko nisi tino e pelā me ne pelofeta, a ko nisi tino e pelā me ne tino talai o te tala ‵lei, a ko nisi tino e pelā me ne tausi mamoe mo faiakoga, 12  ke fakatonutonu* aka ei a tino tapu, mō te faiga o galuega i te fakapotopotoga ke ati aka ei te foitino o Keliso, 13  ke oko ki te taimi e tasi ei tatou katoa i te fakatuanaki kae tasi foki te iloa o tatou e uiga ki te Tama a te Atua, ke fai tatou pelā me se tagata ko matua ‵lei, ko te mea ke katoatoa tena matua ‵lei e pelā mo Keliso. 14  Tela la, e se ‵tau o toe fai tatou e pelā me ne tama‵liki, kolā e peipei valevale ne galu kae agina valevale ne matagi o akoakoga a tino faitogafiti, mo olotou aofaga fakaloi‵loi. 15  Ona ko te ‵tou fai‵pati ki te munatonu, ke na ‵tupu aka tatou i te alofa i mea katoa mai lalo i a Keliso, telā ko te ulu. 16  E auala i a ia, e ‵soko fakatasi ei a vaega katoa o te foitino kae e fakafealofani a latou katoa e auala i ana sokogā ivi katoa ke tuku mai ei a mea kolā e manakogina. Kafai e ga‵lue faka‵lei ana vaega takitasi katoa, ka aoga eiloa te mea tenei ki te ola o te foitino i te taimi e tupu aka ei i te alofa. 17  Tela la, e fai atu ne au a te mea tenei kae e molimau atu foki au i mua o te Aliki, me ko se ‵tau o toe sa‵sale koutou e pelā mo tino o te lalolagi kolā e sa‵sale mo mea sē aoga i olotou mafaufau. 18  E ‵nofo olotou mafaufau i te pouliga, kae e ‵mao latou mai te olaga telā e maua mai i te Atua, ona ko te valea telā e nofo i loto i a latou, mo te ma‵keke o olotou loto. 19  Ko se iloa lele eiloa ne latou o ‵ma, kae tuku atu ne latou a latou eiloa ki amioga matafatu mo te sē āva kae e fai foki ne latou a vaegā amioga lai‵lai katoa mo te matakano‵kano. 20  Ne seki iloa ne koutou a Keliso ke fai penā, 21  māfai ko oti eiloa ne lagona ne koutou a ia kae akoako atu e auala i a ia, e ‵tusa eiloa mo te munatonu telā i loto i a Iesu. 22  Tela la, e ‵tau o tiakina ne koutou a uiga mua kolā e fetaui ‵lei mo otou amioga mua, kae kolā ko fakamaseigina nei ona ko ana manakoga faka‵se tino. 23  Kae e ‵tau o tumau koutou i te faka‵fouga o otou mafaufau,* 24  kae e ‵tau o ‵pei koutou ki uiga ‵fou kolā ne faite e ‵tusa mo te loto o te Atua i te amiotonu mo te alofa fakamaoni. 25  Tela la, ona ko te mea ko oti ne tiakina ne koutou a mea sē ‵tonu, ke na fai‵pati la koutou taki tokotasi ki otou tuakoi ki te mea tonu, me i a tatou ko fai mo fai se foitino e tasi. 26  Kafai koutou e kaitaua, ke se agasala la koutou; ke se tō te mata o te la a koi ita koutou, 27  kae ke mo a ma tuku atu se avanoaga mō te Tiapolo. 28  Ke se toe kaisoa te tino kaisoa, kae ke galue malosi a ia, ke fai ne ia a galuega ‵lei, ko te mea ke mafai o isi ne ana mea ‵lei e tufa atu ki tino kolā e ma‵nako ki ei. 29  Ke seai ne pati ma‵sei* e ‵to mai i otou gutu, kae ko pati ‵lei fua kolā e ati aka ei a tino e ‵tusa mo te mea e manakogina, ko te mea ke mafai o tuku atu a mea aoga ki tino kolā e fakalogo‵logo mai. 30  E se gata i ei, sa fakafanoanoa atu ki te agaga tapu o te Atua, telā ko oti ne fakamailoga koutou ki ei mō te aso e fakasaoloto ei koutou e alatu i te togiola. 31  Ke ave keatea mai i a koutou a vaega katoa o te loto masei, te loto ita, te kaitaua, te paka‵laga valevale mo pati faka‵mae loto, e pelā foki mo mea katoa kolā e logo‵mae ei a tino. 32  Kae ke fakatau atafai koutou te suā tino ki te suā tino, kae fakatau a‵lofa atafai, kae fakatau fakamagalo atu te suā tino ki te suā tino, e pelā eiloa mo te Atua ne fakamagalo ne ia koutou e auala i a Keliso.

Fakamatalaga mai lalo

 Io me “fakamasani.”
 Io me, “ko te malosi telā e fakagasuesue ne ia te mafaufau.”
 I te ‵gana Eleni, se “mea telā e pala.”