Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Efeso 1:1-23

1  Au ko Paulo, se apositolo a Keliso Iesu e ‵tusa mo te loto o te Atua, ki tino tapu i Efeso kolā e fakamaoni i te ‵kau fakatasi mo Keliso Iesu:  Ke i luga i a koutou a te alofa tauanoa mo te filemu o te Atua te ‵tou Tamana mo te Aliki ko Iesu Keliso.  Ke ‵viki atu ki te Atua telā ko te Tamana o te ‵tou Aliki ko Iesu Keliso, me ko oti ne fakamanuia ne ia tatou ki fakamanuiaga faka-te-agaga katoa i te lagi i te ‵kau fakatasi mo Keliso,  me ne filifili ne ia tatou ke ‵kau fakatasi mo ia* a koi tuai o faite* te lalolagi, ko te mea ke tapu kae ‵ma tatou i mua o te Atua i te alofa.  Me ko leva ne fai tena filifiliga ke fai tatou mo fai ana tama puke e auala i a Iesu Keliso, e ‵tusa mo te mea e fiafia a ia ki ei mo te faiga foki o tena loto,  ko te mea ke vikia tena alofa tauanoa telā ne fakaeke ne ia ki luga i a tatou mo te kaimalie e auala i tena Tama fagasele.  Ona ko te tino tenā, ko fakasaoloto ei tatou ne te togiola e auala i tena toto, ao, ko te fakamagaloga o ‵tou agasala, e ‵tusa eiloa mo te lasi o tena alofa tauanoa.  Ne fakaasi mai ne ia ki a tatou a te lasi o tena alofa tauanoa i te tukumaiga o te poto katoatoa mo te loto malamalama,  mai te fakailoa mai ki a tatou a te mea ‵funa kae tapu o tena loto. Ne fai ne ia a te mea tenei e ‵tusa mo te mea e fiafia a ia ki ei telā ne fuafua eiloa ne ia 10  ke fakagalue aka te pulega i te fakaotiga o taimi ne fuafuagina, ko te mea ke fakamaopoopo fakatasi a mea katoa ki a Keliso, ko mea i te lagi mo mea i te lalolagi. Ao, ka fakamaopoopo a mea katoa ki a ia, 11  telā ko ‵kau fakatasi mo tatou kolā ko fai mo fai ne sui, me ko leva ne filifili ne ia tatou e ‵tusa mo tena fuafuaga. Ko ia telā ka fakataunu ne ia a mea katoa e ‵tusa mo tena loto, 12  ko te mea ke tavini atu tatou kolā ne ‵mua o fakamoe‵moe ki a Keliso mō te ‵malu o te Atua. 13  Kae ne fakamoe‵moe foki koutou ki a ia i te otiga ne lagona ne koutou a te munatonu, ko te tala ‵lei e uiga ki te otou fakaolataga. I te otiga ne tali‵tonu koutou, ne fakamailogagina foki koutou ki te agaga tapu telā ne folafola mai e auala i a ia, 14  ko te fakamautinoaga* telā ko leva ne fai mai e uiga ki te ‵tou tofi, i te fakasaolotoga o tino o te Atua e auala i te togiola mō ana vikiga mo tavaega. 15  I taku logoga e uiga ki te otou fakatuanaki ki te Aliki ko Iesu e pelā foki mo tino tapu katoa, tenā te pogai 16  e fakafetai atu faeloa au mō koutou. E masaua faeloa ne au koutou i aku ‵talo, 17  ko te mea ke tuku atu ne te Atua o te ‵tou Aliki ko Iesu Keliso, te Tamana o vikiga, a te agaga o te poto tonu mo fakaasiga e uiga ki a ia. 18  Ko oti ne fakamaina ne ia otou loto, ko te mea ke iloa ne koutou me se a te fakamoemoega telā ne kalagagina ei koutou, me ne a foki a koloa tāua kolā e tausi ne ia e pelā me se tofi mō tino tapu, 19  mo te lasi o tena ‵mana telā e fakaasi mai ki a tatou ana tino tali‵tonu. E fai eiloa penā ona ko te fakagaluegaga o tena malosi sē fuafuagina, 20  telā ne fakaaoga ne ia i te ‵toe fakatumaiga o Keliso mai te mate kae fakasagasaga ifo i tena feitu fakaatamai i te lagi, 21  ke sili ‵mao atu i malo mo pulega mo malosi pule mo pulega a aliki mo igoa katoa, e se gata fua i te olaga tenei, kae e penā foki i te olaga telā ka oko mai. 22  Ne tuku foki ne ia a mea katoa mai lalo i ana vae, kae ne ‵tofi ne ia ke fai mo ulu o mea katoa e uiga ki te fakapotopotoga, 23  telā ko tena foitino, kae e ‵fonu i a ia telā e fakakatoatoa ne ia a mea katoa.

Fakamatalaga mai lalo

 Telā ko te Keliso.
 Ke onoono ki te fakamatalaga mai lalo i te 1Pe 1:20.
 Io me, “ne tupe e ‵togi muamua atu” mo fai se fakamautinoaga.